ວັນທີ 1 ຕຸລາ 2024ນີ້, ທີ່ໂຮງໝໍແຂວງຫຼວງພະບາງ ໄດ້ຈັດຊຸດຝຶກອົບຮົມຍົກລະດັບການຜ່າຕັດແກ່ນຕາຂຸ້ນ ໂດຍເຕັກນິກບາດແຜນ້ອຍ ເພື່ອຍົກລະດັບປະສິດທິພາບ ດ້ານວິຊາການຕາ ໃຫ້ແພດຊ່ຽວຊານຕາ ແລະພະຍາບານຕາ ໃນ 5 ແຂວງ ຄື : ແຂວງອຸດົມໄຊ, ບໍ່ແກ້ວ, ຫຼວງພະບາງ,ໄຊຍະບູລີ ແລະ ແຂວງວຽງຈັນ, ໃຫ້ກຽດເຂົ້າຮ່ວມເປັນປະທານຂອງ ທ່ານ ດຣ.ນາງ ວຽງສາຄອນ ຫຼວງປະດິດ ຮອງກົມປິ່ນປົວ ແລະ ຟື້ນຟູໜ້າທີ່ການ ກະຊວງສາທາລະນະສຸກ, ທ່ານ ດຣຄຳສອນ ພົງສະຫັວດດີ ຫົວໜ້າພະແນກສາທາລະນະສຸກ ແຂວງຫຼວງພະບາງ, ມີບັນດາແຂກທີ່ຖືກເຊີນຈາກກະຊວງ, ສູນກາງ, ມູນນິທິເຟຮດໂຣໂລ ປະຈຳລາວ ແລະພະນັກງານງານແພດຊ່ຽວຊານຕາ, ພະຍາບານຕາເຂົ້າຮ່ວມ.
ຊຸດຝຶກອົບຮົມຄັ້ງນີ້ ແມ່ນຈະດໍາເນີນໄປ ເປັນເວລາ 4 ວັນເຕັມ, ຊຶ່ງສຳມະນາກອນຈະໄດ້ຮຽນຮູ້ ທາງພາກທິດສະດີ ແລະ ພາກປະຕິບັດຕົວຈິງກັບຄົນເຈັບ ໃນການກວດ,ບົ່ງມະຕິ, ໃຫ້ຄຳແນະນຳ, ການກະກຽມກ່ອນຜ່າຕັດ, ການດຳເນີນການຜ່າຕັດ ແລະ ການຕິດຕາມຫຼັງຜ່າຕັດ ໂດຍມີຄູຝຶກຈາກຕ່າງປະເທດ, ມີທີ່ປຶກສາ ແລະ ຜູ້ຊີ້ນຳ ຈາກສູນປິ່ນປົວຮັກສາສຸຂະພາບຕາ, ຈຸດປະສົງຂອງການຝຶກອົບຮົມເພື່ອຍົກລະດັບລະດັບຄວາມຮູ້ຂອງແພດຊ່ຽວຊານຕາ ແລະ ພະຍາບານຕາ ຮັບປະກັນດ້ານຄຸນນະພາບໃນການຜ່າຕັດຕາຂຸ້ນໂດຍເຕັກນິກບາດແຜນ້ອຍ, ປັບປຸງ ແລະ ພັດທະນາລະບົບມາດຕະຖານການຜ່າຕັດຕາຂຸ້ນ ໃຫ້ມີຄຸນະພາບເພີ່ມຂຶ້ນ. ສ້າງຄວາມເຂັ້ມແຂງໃຫ້ແກ່ລະບົບວຽກງານສຸຂະພາບຕາ ໃນ ສປປ ລາວ, ນຳສະເຫນີຂໍ້ແນະນຳກ່ຽວກັບມາດຖານຄຸນນະພາບການຜ່າຕັດຕາຂຸ້ນ ແລະ ການ ປຶກສາຫາລືໃຫ້ຄຳຄິດເຫັນ ກ່ຽວກັບມາດຖານຄຸນນະພາບການຜ່າຕັດຕາຂຸ້ນ ຢູ່ໃນໂຮງຫມໍແຂວງ, ການຕິດຕາມຜົນໄດ້ຮັບການຜ່າຕັດຕາຂຸ້ນ ແຕ່ລະແຂວງຈະໄດ້ກະກຽມນຳສະເຫນີແລກປ່ຽນບົດຮຽນ ກ່ຽວກັບຂໍ້ມູນການຕິດຕາມຜົນໄດ້ຮັບການຜ່າຕັດຕາຂຸ້ນ ໃນ 6 ເດືອນຜ່ານມາ, ການຄັດເລືອກຄົນເຈັບ ແລະ ການກວດຄົນເຈັບກ່ອນການຜ່າຕັດກໍລະນີຕ່າງໆ ນຳສະເຫນີເຕັກນິກ ກໍລະນີທີ່ພົບຄວາມຫຍຸ້ງຍາກ ແລະການແກ້ໄຂທີ່ທ້າທາຍ, ການຄິດໄລ່ສະຫນອງແກ່ນຕາທຽມ ໃຫ້ຖືກຕ້ອງໂດຍນຳໃຊ້ວິທີການພິເສດ, ປຶກສາຫາລືກັບແພດຊ່ຽວຊານ, ແລກປ່ຽນບົດຮຽນທາງດ້ານວິຊາການຫລັງຜ່າຕັດ, ນຳສະເຫນີເຕັກນິກເພື່ອຫລີກລ້ຽງການເກີດຄວາມຫຍຸ້ງຍາກ ແລະອຸປະສັກໃນໄລຍະການນຳໃຊ້ວິທີການຜ່າຕັດບາດແຜນ້ອຍ, ການຈັດການຄວາມຫຍຸ້ງຍາກໃນການຜ່າຕັດ,ບັນຫາທີ່ມັກເກີດຂຶ້ນເລື້ອຍໆ ແລະ ວິທີແກ້ໄຂ ແລະ ນຳສະເຫນີຜົນການປະເມີນ ນໍາໃຊ້ເຄື່ອງມືທີ່ທັນສະໄໜ
ການຝຶກອົບຮົມຄັ້ງນີ້ ເພື່ອປັບປຸງຄຸນນະພາບການພັດທະນາ ມາດຖານການຕ່າຕັດແກ່ນຕາຂຸ້ນ. ເພື່ອໃຫ້ສຳມະນາກອນ ນຳເອົາຄວາມຮູ້ທີ່ໄດ້ຮຽນ ໄປນໍາໃຊ້ວຽກງານໃນໂຮງໝໍທີ່ຕົນປະຈໍາການຢູ່ ໃຫ້ໄດ້ຮັບເປັນຊ່ຽວຊານດ້ານການຜ່າຕັດແກ່ນຕາຂຸ້ນ ແລະ ເພື່ອນໍາໃຊ້ເຂົ້າໃນການບໍລິການປະຊາຊົນຢ່າງມີປະສິດທິພາບ.
