ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

6ມື້ ລຽນຕິດ ສປປ ລາວ ບໍ່ພົບຜູ້ຕິດເຊື້ອພະຍາດໂກວິດ 19

ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ທັງເປັນຜູ້ປະຈຳການຄະນະສະເພາະກິດເພື່ອປ້ອງກັນຄວບຄຸມ ແລະ ແກ້ໄຂພະຍາດໂຄວິດ 19 ຖະແຫລງຂ່າວຕໍ່ສື່ມວນຊົນ ເຖິງສະພາບການລະບາດຂອງພະຍາດ ໂກວິດ 19 ໃນຕອນບ່າຍວັນທີ 18 ເມສານີ້ ທີ່ສູນປະຕິບັດງານ ຄະນະສະເພາະກິດ ຄວບຄຸມພະຍາດ ໂກວິດ 19 ວ່າ: ໄດ້ເກັບຕົວຢ່າງມາກວດທັງໝົດ 27 ຄົນ, ໃນນີ້ ມີ ນະຄອນຫຼວງວຽງຈັນ 23 ຄົນ, ຫຼວງພະບາງ 1 ຄົນ, ສະຫວັນນະເຂດ 3 ຄົນ  ທັງ 3 ຄົນແມ່ນແຮງງານລາວທີ່ກັບມາແຕ່ໄທ. ຜົນກວດທັງໝົດ 27 ກໍລະນີ ບໍ່ພົບເຊື້ອ. ໝາຍວ່າໃນວັນທີ 17 ເມສາ 2020 ບໍ່ມີກໍລະນີໃໝ່.

ນັບແຕ່ເດືອນມັງກອນ ຮອດ ວັນທີ 17 ເມສາ 2020 ໄດ້ເກັບຕົວຢ່າງມາກວດທັງ  ໝົດ ມີ 1,318 ຄົນ, ກວດພົບ ຈໍານວນຜູ້ສໍາຜັດໃກ້ຊິດທັງໝົດ ທີ່ໄດ້ຕິດຕາມ ແຕ່ວັນທີ  9 ມີນາ – 17 ເມສາ 2020 ມີ ທັງໝົດ 313 ຄົນ,  ໝົດກໍານົດຕິດຕາມ ທັງໝົດ 263 ຄົນ, ຍັງສືບຕໍ່ຕິດຕາມທັງໝົດ 50 ຄົນ, ໃນນີ້ ຢູ່ນະຄອນຫຼວງວຽງຈັນ 24 ຄົນ ໃນນັ້ນ 13 ຄົນ ແມ່ນຕິດຕາມຢູ່ໂຮງໝໍ 103, ຕິດຕາມຢູ່ເຮືອນ 10 ຄົນ ແລະ ອີກ 1 ຄົນ ແມ່ນຕິດຕາມຢູ່ເຮືອນສວນ , ສ່ວນແຂວງ ໄຊສົມບູນ  26 ຄົນ ທັງໝົດຕິດຕາມຢູ່ ແຄ້ມພູຄຳ ຍັງອີກ 1 ມື້ຈະໝົດກຳນົດ.

ທ່ານຮອງລັດຖະມົນຕີກະຊວງສາທາລະນະສຸກ ໃຫ້ຮູ້ອີກວ່າ: ຄະນະສະເພາະກິດ ພວກເຮົາໄດ້ສຶກສາຮ່ວມກັບອົງການອະນາໄມໂລກເຫັນວ່າ ຂະບວນການລະບາດຂອງປະເທດໃກ້ຄຽງ ຫຼັງຈາກມີການຕິດເຊື້ອຄັ້ງທຳອິດແລ້ວ ຮອດມື້ທີ່ 40 ແມ່ນມື້ທີ່ມີການລະບາດສູງສຸດ, ສະເພາະລາວເຮົາ ມາຮອດມື້ນີ້ກໍ່ເປັນມື້ທີ່ 26 ແລ້ວ ເຊີ່ງຈະຕ້ອງໄດ້ສືບຕໍ່ເຝົ້າລະວັງຢ່າງເຂັ້ມງວດ, ອີກບັນຫາໜື່ງ ປະຈຸບັນນີ້ ປະເທດທີ່ມີການລະບາດຜ່ອນຄາຍລົງແລ້ວນັ້ນ ກໍ່ຍັງກັບມີຜູ້ຕິດເຊື້ອຄືນໃໝ່ເຊີ່ງມີການວິເຄາະວ່າເຊື້ອອາດຈະຍັງຢູ່ນຳຄົນເຈັບທີ່ບໍ່ມີອາການສະແດງອອກ ໃນໄລຍະ 49 ວັນ.

ສະນັ້ນ, ຈີ່ງຮຽກຮ້ອງໃຫ້ພໍ່ແມ່ປະຊາຊົນບັນດາເຜົ່າ ຈົ່ງສືບຕໍ່ໃຫ້ການຮ່ວມມືເປັນເຈົ້າການຮ່ວມກັນປະຕິບັດຄຳສັ່ງ ເລກທີ 06/ນຍ ແລະ ບັນດາຂໍ້ແນະນຳຕ່າງໆຢ່າງເຂັ້ມງວດ ເພື່ອໃຫ້ສະພາບການລະບາດຂອງພະຍາດໂຄວິດຜ່ອນຄາຍລົງ ຈຶ່ງຈະສາມາດກັບມາດຳລົງຊີວິດຕາມປົກກະຕິໄດ້. ຍ້ອນວ່າສະພາບການລະບາດທົ່ວໂລກຍັງສືບຕໍ່ ມີຜູ້ຕິດເຊື້ອ ແລະ ເສຍຊີວິດເພິ່ມຂຶ້ນເປັນປະຈຳແຕ່ລະວັນ