ໄລຍະ 6 ເດືອນຕົ້ນປີ 2024, ທົ່ວເມືອງ ສາມັກຄີໄຊ ແຂວງ ອັດຕະປື ມີອຸບັດຕິເຫດຕາມທ້ອງຖະໜົນເກີດຂຶ້ນທັງໝົດ 46 ລາຍ, ທຽບໃສ່ໄລຍະດຽວກັນຂອງປີຜ່ານມາອຸບັດຕິເຫດເພີ່ມຂຶ້ນ 16 ລາຍ ມີພາຫະນະເປເພ 74 ຄັນ, ເປ່ເພເລັກນ້ອຍ 62 ຄັນ, ເປ່ເພສົມຄວນ 12 ຄັນ, ມີຄົນໄດ້ຮັບບາດເຈັບ 69 ຄົນ, ຍິງ 21 ຄົນ, ບາດເຈັບເລັກນ້ອຍ 82 ຄົນ, ຍິງ 18 ຄົນ, ບາດເຈັບສົມຄວນ 11 ຄົນ, ຍິງ 3 ຄົນ ແລະ ບໍ່ມີຜູ້ເສຍຊີວິດ, ລວມມູນຄ່າເສຍຫາຍຈາກການເກີດອຸບັດຕິເຫດທັງໝົດ 118 ລ້ານກວ່າກີບ.
ທ່ານ ພັນຕີ ຄໍາໃບ ແກ້ວພາວົງ ຮອງພະແນກຕໍາຫຼວດ ກອງບັນຊາການປ້ອງກັນຄວາມສະຫງົບ ເມືອງສາມັກຄີໄຊ ຜູ້ຊີ້ນຳວຽກງານຈະລາຈອນ ໄດ້ໃຫ້ສຳພາດວ່າ: ໄລຍະທີ່ຜ່ານມາສະພາບອຸບັດເຫດຕາມທ້ອງຖະໜົນໃນຂອບເຂດທົ່ວແຂວງອັດຕະປື ມີທ່າອ່ຽງເພີ່ມຂຶ້ນ ເຖິງວ່າເຈົ້າໜ້າທີ່ຕໍາຫຼວດຈະລາຈອນເມືອງ ຈະໃຊ້ມາດຕະການຕ່າງໆ ເພື່ອຫຼຸດຜ່ອນການອຸບັດຕິເຫດແລ້ວກໍ່ຕາມ.
ສາເຫດຕົ້ນຕໍທີ່ເຮັດໃຫ້ເກີດອຸບັດຕິເຫດແຕ່ລະຄັ້ງນັ້ນມາຈາກຫຼາຍປັດໃຈ ເປັນຕົ້ນ ຍ້ອນຜູ້ຂັບຂີ່ຈໍານວນໜຶ່ງຍັງບໍ່ທັນເປັນເຈົ້າການ ໃນການປະຕິບັດລະບຽບການສັນຈອນຢ່າງເຂັ້ມງວດ, ໂດຍສະເພາະຂັບຂີ່ໄວເກີນກໍານົດ, ບໍ່ໃຫ້ກຽດກັບຜູ້ໃຊ້ເສັ້ນທາງຮ່ວມກັນ, ການແຊງຊ້າຍ-ຂວາ ບໍ່ຮັບປະກັນ, ຂັບຂີ່ລົດເປັນພຶງເປັນແພ ແລະ ອື່ນໆ, ອຸບັດຕິເຫດສ່ວນໃຫຍ່ແມ່ນເກີດຂຶ້ນແຕ່ເວລາ 15 ໂມງ ຫາ 21 ໂມງ ແລະ ອຸບັດຕິເຫດທີ່ເກີດຂຶ້ນແມ່ນຢູ່ໃນກຸ່ມພະນັກງານ-ລັດຖະກອນ, ກໍາມະກອນ ແລະ ກຸ່ມນັກຮຽນ-ນັກສຶກສາ, ອຸປະຕິເຫດທີ່ມັກເກີດຂຶ້ນຫຼາຍກວ່າໝູ່ແມ່ນຢູ່ 4 ແຍກ, 3 ແຍກ ໃນເທດສະບານເມືອງ.
