ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນບົດລາຍງານໂດຍສັງເຂບກ່ຽວກັບສະພາບການຈັດຕັັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ ຕິດພັນກັບການຈັດຕັັ້ງປະຕິບັດ 2 ວາລະແຫ່ງຊາດ ໄລຍະ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2024 ທີ່ ທ່ານ ສອນໄຊ ສີພັນດອນ, ນາຍົກລັດຖະມົນຕີ ສະເໜີຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ 10 ມິຖຸນາ 2024 ໄດ້ຍົກໃຫ້ເຫັນຜົນສໍາເລັດໃນການປະຕິບັດ ວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ວ່າ: ໃນເງື່ອນໄຂທີ່ສະພາບແວດລ້ອມພາຍນອກ, ພາຍໃນປະເທດ ມີຄວາມຫຍຸ້ງຍາກຫຼາຍດ້ານ, ລັດຖະບານໄດ້ສຸມໃສ່ປັບປຸງວຽກງານຂົງເຂດນີ້ ໂດຍໄດ້ພະຍາຍາມປັບປຸງ, ຍົກລະດັບເຄື່ອງມືວຽກງານຖະ ແຫຼ່ງຂ່າວ, ການອອກຂ່າວ ເປັນທັນສະໄໝ ໃຫ້ມີຄຸນນະພາບສູງຂຶ້ນ. ຜ່ານການຈັດຕັ້ງປະຕິບັດ ກໍສາມາດຕີຖອຍບັນດາສື່ສັງຄົມ ທີ່ອອກຂ່າວບິດເບືອນຄວາມຈິງ ໄດ້ດີຂຶ້ນເປັນກ້າວໆ.
ພ້ອມນີ້, ໄດ້ສືບຕໍ່ປັບປຸງພື້ນຖານໂຄງລ່າງ ແລະ ຍົກສູງຄຸນນະພາບຂອງການບໍລິການທ່ອງທ່ຽວຕິດການອະນຸລັກຮັກສາ ແລະ ສົ່ງເສີມຮີດຄອງປະເພນີວັດທະນະທຳອັນດີງາມຂອງບັນດາເຜົ່າໃຫ້ດີຂຶ້ນ ໃນປີທ່ອງທ່ຽວລາວ2024 ນີ້ (ມາດຕະການທີ 3 ໃນ 7ມາດຕະການເພີ່ມຕື່ມ ຕາມມະຕິ 118/ສພຊ). ຜ່ານການປະຕິບັດເຫັນວ່າດໍາເນີນໄປດ້ວຍຂະບວນການທີ່ຟົດຟື້ນດີ ສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເປັນທ່າແຮງໜຶ່ງທີ່ສໍາຄັນໃຫ້ແກ່ການຂະຫຍາຍຕົວຂອງເສດຖະກິດ, ຊຶ່ງຄາດຄະເນ ໃນ 6 ເດືອນຕົ້ນປີ ມີຈຳນວນນັກທ່ອງທ່ຽວ 1.856.209 ເທື່ອຄົນ, ເທົ່າກັບ 52,74% ຂອງແຜນການປີ (ມະຕິ ສະພາ: 3.519.565 ເທື່ອຄົນ); ສ້າງລາຍຮັບໄດ້ 505.370.543 ໂດລາ, ເທົ່າກັບ 68,10% ຂອງແຜນການ (ແຜນການ: 742.048.185 ໂດລາ).
ນອກຈາກນີ້, ລັດຖະບານ ໄດ້ສຸມໃສ່ຊີ້ນໍາການສ້າງຄອບຄົວວັດທະນະທຳ, ຊຶ່ງໃນໄລຍະ 3 ເດືອນ ປະຕິບັດໄດ້ 8.720 ຄອບຄົວ, ເທົ່າກັບ 33,33% ຂອງແຜນການປີ ແລະ 6 ເດືອນຕົ້ນປີ ຄາດວ່າຈະສາມາດປະຕິບັດໄດ້ 16.000 ຄອບຄົວ, ເທົ່າ ກັບ 62% ຂອງແຜນການປີ (ມະຕິສະພາ: 26.000 ຄອບຄົວ) ແລະ ສ້າງບ້ານ ວັດທະນະທຳ ໄດ້ 86 ບ້ານ, ເທົ່າກັບ 57,33% ຂອງແຜນການ ແລະ 6 ເດືອນຕົ້ນປີ ຈະສາມາດປະຕິບັດໄດ້ 97 ບ້ານ ຫຼື ເທົ່າກັບ 64,7% ຂອງແຜນການປີ (ມະຕິສະພາ: 150 ບ້ານ).