ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນໄລຍະ 6 ເດືອນຕົ້ນປີ 2024 ລວມຍອດຜະລິດຕະພັນພາຍໃນ ຫລື GDP ຂອງແຂວງອຸດົມໄຊ ຂະຫຍາຍຕົວໃນລະດັບ 3,18% ລວມມູນຄ່າ GDP ບັນລຸ 9.000 ຕື້ກວ່າກີບ.
ທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ ໃຫ້ສຳພາດຕໍ່ສື່ມວນຊົນເມື່ອບໍ່ດົນມານີ້ວ່າ: ການພັດທະນາເສດຖະກິດ- ສັງ ຄົມຂອງແຂວງອຸດົມໄຊ ແມ່ນອີງໃສ່ຫລາຍທ່າເເຮງ ເຊັ່ນ: ຈຸດທີ່ຕັ້ງຂອງແຂວງ, ການບໍລິການທ່ອງທ່ຽວ, ບໍລິການດ້ານການປະຊຸມ, ຂົນສົ່ງສິນຄ້າຂຶ້ນສະຖານີລົດໄຟ, ການຜະລິດກະສິກຳ ແລະ ຊັບພະຍາກອນແຮ່ທາດ. 6 ເດືອນຕົ້ນປີນີ້ ລວມມູນຄ່າ GDP ບັນລຸ 9.000 ຕື້ກວ່າກີບ. ໃນນີ້ ຂະແໜງອຸດສາຫະກຳຂະຫຍາຍຕົວ 4,38%, ກວມເອົາ 12,62% ຂອງ GDP, ຂະແໜງບໍລິການ ຂະຫຍາຍຕົວ 1,60%, ກວມເອົາ 50,45% ຂອງ GDP, ພາສີ-ອາກອນ ຂະຫຍາຍຕົວ 1,84%, ກວມເອົາ 1,26% ຂອງ GDP. ໃນນີ້ຂະແໜງກະສິກຳ ຂະຫຍາຍຕົວ 4,51%, ກວມເອົາ 35,67% ຂອງ GDP.
ອຸດົມໄຊ ເປັນແຂວງທີ່ມີເສັ້ນທາງລົດໄຟລາວ-ຈີນ ຜ່ານ 3 ເມືອງ, ມີ 3 ສະຖານີ; ມີເສັ້ນທາງເລກທີ 13 ເໜືອ ແລະ ທາງລົດໄຟ ລາວ-ຈີນ ຕັດກັບເສັ້ນທາງ 2E, 2W ເຊື່ອມຕໍ່ແຕ່ພາກຕາເວັນຕົກສ່ຽງໃຕ້ຂອງ ສສ ຫວຽດນາມ ຜ່ານແຂວງຜົ້ງສາລີ ໄປຫາພາກເໜືອແຂວງໄຊຍະບູລີ ແລະ ພາກຕາເວັນອອກສ່ຽງເໜືອ ຂອງຣາຊະອານາຈັກໄທ; ພ້ອມນີ້ ກໍມີສາຍແມ່ນໍ້າຂອງໄຫຼຈາກເມືອງຫ້ວຍຊາຍແຂວງບໍ່ແກ້ວ ຜ່ານເມືອງປາກແບງ ໄປຫາ ແຂວງຫຼວງພະບາງ.
ດ້ານການທ່ອງທ່ຽວ ມີແຫຼ່ງທ່ອງທ່ຽວທາງດ້ານທໍາມະຊາດ ປະຫວັດສາດແລະ ວັດທະນະທໍາ ເຊັ່ນ: ນໍ້າກັດຢໍລະປ່າ, ຖໍ້າຈອມອອງ ເມືອງໄຊ, ວັດພະເຈົ້າສິງຄໍາ ເມືອງຫຼາ ແລະ ສະຖານທີ່ແຫຼ່ງທ່ອງທ່ຽວອື່ນໆ ເຮັດໃຫ້ໃນໄລຍະ 6 ເດືອນຕົ້ນປີມີນັກທ່ອງທ່ຽວເຂົ້າມາຜ່ານ ແລະ ພັກແຮມຢູ່ ແຂວງອຸດົມໄຊ 113.000 ກວ່າເທື່ອຄົນ, ສ້າງລາຍຮັບເຂົ້າແຂວງອຸດົມໄຊ ໄດ້ 6ລ້ານ5ແສນກວ່າ ໂດລາສະຫະລັດ. ໃນນີ້, ພົ້ນເດັ່ນ ແມ່ນຣີສອດນໍ້າກັດຢໍລະປ່າ ໄດ້ຮັບຮອງເປັນຣີສອດລະດັບ 5 ດາວ ແລະ ເປີດນໍາໃຊ້ ພິພິຕະພັນຊີວະນານາພັນ ນໍ້າກັດຢໍລະປ່າ ເປັນແຫ່ງທໍາອິດຂອງ ສປປ ລາວ ແລະ ເປັນແຫ່ງທີ 3 ຂອງໂລກ; ໂຮງແຮມງາມລາວ ແລະ ຣີສອດເລີແກຼນ ປາກແບງ ໄດ້ຮັບຮອງເປັນສະຖານທີ່ພັກເຊົາມາດຕະຖານ ສີຂຽວອາຊຽນ, ປັດຈຸບັນ ໄດ້ເຊັນສັນຍາໂຄງການກໍ່ສ້າງໂຮງແຮມແລນມາກອຸດົມໄຊ ຈະລົງມືກໍ່ສ້າງໃນມໍ່ໆນີ້, ພ້ອມນີ້ຍັງໄດ້ຈັດງານບຸນປະເພນີບັນດາເຜົ່າ ຕິດພັນກັບການເປີດປີທ້ອງທ່ຽວລາວ 2024 ຢ່າງມີບັນຍາກາດຟົດຟື້ນດີ ແລະ ອື່ນໆ.
May be an image of 1 person, dais and text