6 ເດືອນຕົ້ນປີນີ້ ແຂວງອຸດົມໄຊ ຕ້ອນຮັບນັກທ່ອງທ່ຽວ113.025 ເທື່ອຄົນ

ທ່ານບຸນຄົງ ຫລ້າຈຽມພອນ ເຈົ້າແຂວງອຸດົມໄຊ ໃຫ້ຮູ້ໃນໂອກາດໃຫ້ສໍາພາດຕໍ່ສື່ມວນຊົນເມື່ອບໍ່ດົນມານີ້ວ່າ: ໃນໄລຍະ 6 ເດືອນຕົ້ນປີນີ້ ແຂວງອຸດົມໄຊ ໄດ້ເອົາໃຈໃສ່ປັບປຸງການບໍລິການ ໂຮງແຮມ, ເຮືອນພັກ, ຣີສອດ, ຮ້ານອາຫານ ແລະ ສະຖານ ທີ່ທ່ອງທ່ຽວ ໃຫ້ມີມາດຕະຖານດີຂຶ້ນ ໃນນີ້, ພົ້ນເດັ່ນ ແມ່ນຣີສອດນໍ້າກັດ ຢໍລະປ່າ ໄດ້ຮັບຮອງເປັນຣີສອດລະດັບ 5 ດາວ ແລະ ເປີດນໍາໃຊ້ ພິພິຕະພັນຊີວະນາໆ ພັນ ນໍ້າກັດຢໍລະປ່າ ເຊິ່ງເປັນແຫ່ງທໍາອິດຂອງ ສປປ ລາວ ແລະ ເປັນແຫ່ງທີ 3 ຂອງໂລກ; ໂຮງແຮງງາມລາວ ແລະ ຣີສອດເລີແກຼນ ປາກແບງ ໄດ້ຮັບຮອງເປັນສະຖານທີ່ພັກເຊົາມາດຕະຖານ ສີຂຽວອາຊຽນ, ປະຈຸບັນ ໄດ້ເຊັນສັນຍາໂຄງການກໍ່ສ້າງໂຮງແຮມແລນມາກອຸດົມໄຊ ເຊິ່ງຈະໄດ້ລົງມືກໍ່ສ້າງ ໃນມໍ່ໆນີ້ ພ້ອມນີ້, ພວກເຮົາຍັງໄດ້ຈັດງານບຸນປະເພນີບັນດາເຜົ່າ ຕິດພັນກັບການ ເປີດປີທ້ອງທ່ຽວລາວ 2024 ຢ່າງມີບັນຍາ ກາດຟົດຟື້ນດີ.

ທ່ານໃຫ້ຮູ້ຕື່ມວ່າ: ໃນໄລຍະ 6 ເດືອນຕົ້ນປີທີ່ຜ່ານມາ ມີນັກທ່ອງທ່ຽວເຂົ້າມາຜ່ານ ແລະ ພັກແຮມຢູ່ ແຂວງອຸດົມໄຊ ທັງໝົດ 113.025 ເທື່ອຄົນ, ສ້າງລາຍຮັບເຂົ້າແຂວງອຸດົມໄຊ ໄດ້ທັງໝົດ 6,533,353 ໂດລາສະຫະລັດ.

ສໍາລັບແຂວງອຸດົມໄຊ ມີແຫຼ່ງທ່ອງທ່ຽວທີ່ຫນ້າທີ່ຊົມຫລາຍແຫ່ງ ບໍ່ວ່າຈະເປັນດ້ານທຳມະຊາດ,ປະຫວາດສາດ ແລະ ວັດທະນະທຳ ໃນນັ້ນແຫລ່ງທ່ອງທ່ຽວທີ່ໄດ້ຮັບການພັດທະນາ ແລະ ເປີດບໍລິການ ເປັນຕົ້ນ: ນໍ້າກັດຢໍລະປ່າ, ຖ້ຳຈອມອອງ, ວັດພະເຈົ້າສິງຄໍາ, ວັດພູທາດໄຊມຸງຄຸນ ຣັດຕະນະມິ່ງເມືອງ, ພູຫຍ້າຄາຫົວພະຍາໃຫຍ່, ຕາດຫຼັກ 11, ວັດຄົກຄໍ້, ຕາດນໍ້າແຮງ, ນໍ້າອອກຮູນາທົ່ງ ແລະ ອື່ນໆ.

ຂ່າວ: BT, ວລສ

ພາບ+ຂໍ້ມູນ: ຈັນສະໝອນ