ທ່ານ ສົມພອນ ໄຊດວງຕາ ເຈົ້າເມືອງທົ່ງມີໄຊ ໄດ້ລາຍງານຕໍໍ່ກອງປະຊຸມ ທີ່ສະມາຊິກສະພາແຫ່ງຊາດ ລົງເຜີຍແຜ່ຜົນສຳເລັດ ກອງປະຊຸມ ຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ເມືອງທົ່ງມີໄຊ. ໃນອາທິດຜ່ານມານີ້ວ່າ:

ຕະຫຼອດໄລຍະຜ່ານມາ ຄະນະພັກ, ອົງການປົກຄອງເມືອງ ໄດ້ຖືເອົາວຽກງານການເມືອງແນວຄິດ ຊີ້ນຳ-ນຳພາໃຫ້ຄະນະພັກ, ສະມາຊິກພັກ, ພະນັກງານ, ກຳລັງປະກອບອາວຸດ ແລະ ປະຊາຊົນ ມີສະຕິເຄົາລົບລະບຽບກົດໝາຍ ແລະ ສະໜັບສະໜູນຕໍ່ການນຳພາຂອງພັກ ມີຄວາມຕື່ນຕົວເປັນເຈົ້າການເຂົ້າໃນການປົກປັກຮັກສາ ແລະ ສ້າງສາເມືອງທົ່ງມີໄຊໃຫ້ກ້າວຂຶ້ນ. ໄດ້ຖືເອົາວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ກາຍເປັນຂອງທົ່ວປວງຊົນຮອບດ້ານ ສຸມໃສ່ຊຸກຍູ້ວຽກງານຮາກຖານ ໃຫ້ມີຄວາມສະຫງົບຄວາມໜັກແໜ້ນເຂັ້ມແຂງ ປະກົດການຫຍໍ້ທໍ້ເກີດຂຶ້ນໄດ້ຮັບການແກ້ໄຂທັນເວລາ.

  1. ຂົງ​ເຂດ​ເສດ​ຖະ​ກິດ:

ໄລ​ຍະຜ່ານມາ​​ເມືອງ​ພວກ​ເຮົາ​ໄດ້ສຸມໃສ່​ທຸກ​ທ່າ​ແຮງ​ບົ່ມ​ຊ້ອນ​ຢູ່​ພາຍ​ໃນ​ເມືອງ​ ເພື່ອມາກໍ່ສ້າງພື້ນຖານໂຄງລ່າງ  ອັນຈໍາເປັນຂອງເມືອງ.

  • ໃນສົກງົບປະມານ ປີ 2021 ເມືອງຂອງພວກເຮົາ ໄດ້ຮັບຕົວເລກທີ່ແຂວງມອບໃຫ້ເກັບລາຍຮັບ

ພາຍໃນເມືອງທັງໝົດ 1.130,00ລ້ານກີບ, ການຈັດຕັ້ງປະຕິບັດຕົວຈິງ ໃນໄລຍະຜ່ານມາ  ຈັດເກັບລາຍຮັບພາຍໃນເມືອງ ໄດ້ທັງໝົດ 610,23 ລ້ານກີບ (ທຽບໃສ່ແຜນປີປະຕິບັດໄດ້ 54%), ດຸ່ນດ່ຽງຈາກແຂວງ 680,42 ລ້ານກີບ; ປະຕິບັດລາຍຈ່າຍ= 488,99 ລ້ານກີບ (ທຽບໃສ່ແຜນປີ ປະຕິບັດໄດ້27,01%),

–  ການຜະລິດເປັນສິນຄ້າຂອງປະຊາຊົນ:ໄດ້ເອົາໃຈໃສ່ ຊຸກຍູ້ ສົ່ງເສີມ ໃຫ້ປະຊາຊົນຜະລິດເປັນສິນຄ້າໃຫ້ຫຼາຍ ໂດຍເລັ່ງໃສ່ການປູກຝັງ ແລະ ລ້ຽງສັດປະເພດຕ່າງໆ ເພື່ອສ້າງລາຍຮັບໃຫ້ແກ່ຄອບຄົວເຊັ່ນ:

– ໄດ້ເອົາໃຈໃສ່ຊຸກຍູ້ການປູກເຂົ້ານາແຊງ ເນື້ອທີ່ແຜນການ 12 ເຮັກຕາ, ປະຕິບັດໄດ້ 16,76 ເຮັກຕາ (ທຽບໃສ່ແຜນການ ເພີ່ມຂຶ້ນ 39,66%), ມາຮອດປະຈຸບັນ ເກັບກູ້ສໍາເລັດ 100%, ຜົນຜະລິດ 60,34 ໂຕນ.

– ການປູກພືດລະດູແລ້ງເນື້ອທີ່ 111,88 ເຮັກຕາ, ໃນນີ້ ສາລີຫວານ, ຜັກກິນໃບ, ໝາກແຕງ, ໝາກໂມ ຜັກບົ່ວ, ຜັກທຽມ, ຜັກກະລໍາປີ ແລະ ອື່ນໆ, ມາຮອດປະຈຸບັນ ເກັບກ່ຽວ ສຳເລັດ 100%, ຜົນຜະລິດ 825 ໂຕນ,  ຈາກນັ້ນກໍໄດ້ຕິດຕາມ, ຊຸກຍູ້ການລ້ຽງໝູລາດຂອງປະຊາຊົນ.

– ໄດ້ເອົາໃຈໃສ່ ຊຸກຍູ້ການປູກພືດລະດູຝົນ ແລະ ການປູກເຂົ້ານາປີ ເຊັ່ນ: ເນື້ອທີ່ການປູກເຂົ້ານາປີ 1.327 ເຮັກຕາ, ປະຈຸບັນປັກດໍາແລ້ວ 99,77 % ແລະ ພືດລະດູຝົນ ໃນເນື້ອທີ່ແຜນການ 290 ເຮັກຕາ ( ປະຈຸບັນພວມເກັບກຳຂໍ້ມູນຍັງບໍ່ທັນສະຫຼຸບຂາດຕົວໄດ້ ) ເຊັ່ນ: ປູກສາລີ, ໝາກເດືອຍ, ມັນຕົ້ນ ແລະ ອື່ນໆ, ເຊິ່ງປະຈຸບັນພວມປະເຊີນກັບສັດຕູພືດທໍາລາຍເຂົ້ານາປີ (ບົ້ງກິນໃບທໍາລາຍເຂົ້ານາປີ) ຈາກນັ້ນໄດ້ລົງສັກຢາປ້ອງກັນພະຍາດເຕົ້າໂຮມເລືອດ ງົວ-ຄວາຍ, ອະຫິວາໝູ ແລະ ສັດປີກ; ນອກນີ້ມີຫຼາຍຄອບຄົວໄດ້ຫັນມາປູກຫຍ້າເປັນອາຫານສັດ ຈາກລ້ຽງຕາມທໍາມະຊາດ(ໃນເມື່ອກ່ອນ) ເຊິ່ງປະຈຸບັນ ຫັນມາລ້ຽງແບບເປັນຄັງ ຫຼື ເປັນສວນ ເຮັດໃຫ້ຫຼາຍຄອບຄົວມີລາຍຮັບເພີ່ມຂຶ້ນ.

  • ໄດ້ເອົາໃຈໃສ່ສະກັດກັ້ນ, ປ້ອງກັນການແຜ່ລະບາດຂອງພະຍາດອະຫິວາໝູ ຢ່າງຕໍ່ເນື່ອງ

ມາຮອດປະຈຸບັນສະພາບການລະບາດຂອງພະຍາດໝູ ແມ່ນບໍ່ພົບໝູຕິດເຊື້ອ ແລະ ຕາຍ. ຄຽງຄູ່ກັບຂົງເຂດເສດຖະກິດນັ້ນ, ຂົງເຂດວັດທະນະທໍາ-ສັງຄົມເອົາໃຈໃສ່ຍົກສູງຄຸນນະພາບຂອງວຽກງານການສຶກສາ  ດ້ວຍການປັບປຸງຄຸນນະພາບການຮຽນ-ການສອນຂອງຄູອາຈານ ແລະ ນັກຮຽນຢ່າງໃກ້ຊິດ ແລະ ຕໍ່ເນື່ອງເພື່ອເຮັດໃຫ້ຄຸນນະພາບການສຶກສາ ນັບມື້ນັບດີຂຶ້ນ, ໄດ້ໂຈະການຮຽນ-ການສອນຊົ່ວຄາວ ຍ້ອນການລະບາດຂອງພະຍາດ ໂຄວິດ-19  ນັບແຕ່ວັນທີ 27 ເມສາ ເຖິງປະຈຸບັນ ແລະ ໄດ້ເປີດການຮຽນ-ການສອນ ຈົບຊັ້ນ ປ5, ມ4 ແລະ ມ7 ໃນວັນທີ 31 ພຶດສະພາ 2021 ທີ່ຜ່ານມານີ້.  ດ້ານສາທາລະນະສຸກ: ໄດ້ເອົາໃຈໃສ່ປັງປຸງຍົກລະດັບເຄື່ອງມືຮັບໃຊ້ດ້ານວິຊາການ, ປັບປຸງຂອດບໍລິການໃຫ້ສະດວກວ່ອງໄວ ນັບທັງປັບປຸງສະຖານທີ່ບໍລິການຄົນເຈັບໄປຕາມມາດຖານ 5 ດີ 1 ພໍໃຈ ໃຫ້ດີຂຶ້ນເທື່ອລະກ້າວ, ນອກນີ້ ໄດ້ເອົາໃຈໃສ່ປ້ອງກັນ, ຕ້ານ ແລະ ສະກັດກັ້ນການແຜ່ລະບາດຂອງພະຍາດ ຕາມລະດູການ ໂດຍສະເພາະແມ່ນ ພະຍາດຖອກທ້ອງ, ພະຍາດໄຂ້ຍຸງລາຍ ແລະ  ພິເສດໄດ້ສົມທົບກັບຄະນະສະເພາະກິດຂັ້ນເມືອງ ເອົາໃຈໃສ່ຕ້ານ, ສະກັດກັ້ນ, ປ້ອງກັນ ການແຜ່ລະບາດຂອງພະຍາດອັກເສບປອດຈຸລະໂລກສາຍພັນໃໝ່ ໂຄວິດ-19 ຕາມມາດຕະການຕ່າງໆ ທີ່ທາງຄະນະສະເພາະກິດຂັ້ນແຂວງ, ຂັ້ນເມືອງວາງອອກໃນແຕ່ລະໄລຍະ ວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ: ເປັນວຽກງານໜື່ງທີ່ສໍາຄັນ ເປັນກະບອກສຽງຂອງພັກ ໃນການໂຄສະນາເຜີຍແຜ່, ຊຸກຍູ້ ແລະ ຜັນຂະຫຍາຍແນວທາງຂອງພັກ, ລະບຽບກົດໝາຍຂອງລັດ ໃນໄລຍະຜ່ານມາກໍ່ໄດ້ເຄື່ອນໄຫວເພື່ອຕອບສະໜອງຂໍ້ມູນຂ່າວສານ ໃຫ້ສັງຄົມຮັບຮູ້ຢ່າງທົ່ວເຖິງ,  ພ້ອມນີ້ໄດ້ສົມທົມກັບຄະນະສະເພາະກິດ ແລະ ຄະນະກໍາມະການຂັ້ນເມືອງ ຕິດຕາມກວດກາຮ້ານບັນເທີງພາຍໃນເມືອງ ໃຫ້ເຄື່ອນໄຫວຖືກຕ້ອງຕາມລະບຽບການໃນແຕ່ລະໄລຍະ, ແຕ່ລະບ້ານກໍ່ມີການກະຈາຍຂ່າວໃຫ້ພໍ່ແມ່ປະຊາຊົນຮັບຮູ້ຢ່າງທົ່ວເຖິງ ວຽກງານແຮງງານແລະ ສະຫວັດດີການສັງຄົມ:ໄດ້ເອົາໃຈໃສ່ຊຸກຍູ້ສົ່ງເສີມແລະອໍານວຍຄວາມສະດວກໃນການ ຊອກວຽກເຮັດງານທຳ ໃຫ້ຊາວໜຸ່ມ-ໄວໜຸ່ມ ແລະ ປະຊາຊົນຢູ່ພາຍໃນເມືອງ, ຈາກນັ້ນໄດ້ປະຕິບັດນະໂຍບາຍຕໍ່ພະນັກງານ-ລັດຖະກອນ, ບຳນານ, ເສຍອົງຄະ ແລະ ຜູ້ອາຍຸສູງ ຢ່າງເປັນປົກກະຕິ.

ໃນຕໍ່ໜ້າເພື່ອສືບຕໍ່ຈັດຕັ້ງປະຕິບັດໃນແຕ່ລະຂົງເຂດວຽກງານ ໃຫ້ປະກົດຜົນເປັນຈິງ ເມືອງພວກເຮົາໄດ້ວາງທິດທາງແຜນການ ແລະ ຄາດໝາຍສູ້ຊົນ​ລວມ​ບາງ​ດ້ານ​ດັ່ງນີ້:

  • ສືບ​ຕໍ່ເພີ່ມທະວີຄວາມສາມັກຄີປອງດອງພາຍໃນ​ເມືອງ​ໃຫ້​ໜັກ​ແໜ້ນ​ເຂັ້ມ​ແຂງ, ກໍ່​ສ້າງ ແລະ ປັບ​ປຸງ​ລະ​ບອບ​ປະ​ຊາ​ທິ​ປະ​ໄຕ​ປະ​ຊາ​ຊົນ ​ໃຫ້​ກ້າວ​ຂຶ້ນ​ຕາມ​ແນວ​ທາງ​ການ​ເມືອງ​ຂອງ​ພັກ ຕິດພັນກັບການຫັນລົງກໍ່ສ້າງຮາກຖານ-ພັດທະນາຊົນນະບົດຮອບດ້ານ, ປັບປຸງການຈັດຕັ້ງພາຍໃນເມືອງໃຫ້ເຂັ້ມແຂງ​ເທື່ອ​ລະ​ກ້າວ.
  • ສືບຕໍ່ຊຸກຍູ້ສົ່ງເສີມການຜະລິດຂອງປະຊາຊົນໃຫ້ເປັນຂະບວນກ້ວາງຂວາງ ແນໃສ່ຍົກສະມັດຕະ

ພາບການຜິດລິດໃຫ້ສູງຂຶ້ນ, ຄຸ້ມ​ຄອງ​ການ​ຂຸດ​ຄົ້ນ​ຊັບ​ພະ​ຍາ​ກອນ​ທຳ​ມະ​ຊາດ​ຢ່າງ​ປະຫ​ຍັດ ແລະ ຄຸ້ມ​ຄ່າ ນັບ​ທັງ​ການ​ຈັດ​ເກັບ​ລາຍ​ຮັບ​ເຂົ້າ​ງົບ​ປະ​ມານ​ ໃຫ້ໄດ້ຕາມແຜນ ຫຼື ລື່ນແຜນການ ຕິດ​ພັນ​ກັບ​ການ​ປົກ​ປັກ​ຮັກ​ສາ​ສິ່ງ​ແວດ​ລ້ອມ, ລົງຊຸກຍູ້ການສົ່ງເສີມ ປູກພືດລະດູຝົນ ແລະ ການປູກເຂົ້ານາປີ ໃຫ້ທ່ວງທັນກັບເວລາ, ເຮັດໃຫ້ການເຕີບໂຕທາງເສດຖະກິດຂອງເມືອງສະເລ່ຍບໍ່ໃຫ້ຫຼຸດ 8,84 %.

  • ສືບ​ຕໍ່​ປົກ​ປັກ​ຮັກ​ສາອຳ​ນາດ, ອະ​ທິ​ປະ​ໄຕແລະ  ​ຜືນ​ແຜ່ນ​ດິນ​ອັນຄົບຖ້ວນ​ໄວ້​ໃຫ້​​​ໝັ້ນ​ຄົງ, ສ້າງສະຕິເຄົາລົບລະຽບກົດໝາຍຂອງພົນລະເມືອງໃຫ້ເຂັ້ມງວດ, ຮັບປະກັນໃຫ້ເມືອງມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ, ຕ້ານ ແລະສະ​ກັດ​ກັ້ນ​ ທຸກ​ເລ່​ລ່ຽມ​ກົນ​ອຸ​ບາຍ​ມ້າງ​ເພ​ທຳ​ລາຍ​ຂອງ​ສັດຕູ​, ​ກຳ​ຈັດ​ປັດ​ເປົ່າ​ປະ​ກົດ​ການ​ຫ​ຍໍ້​ທໍ້​ດ້ານ​ຕ່າງໆ​ ທີ່​ເກີດ​ຂຶ້ນ​ໃນ​ສັງ​ຄົມ​ໃຫ້​ຫລຸດ​ນ້ອຍ​ຖອຍ​ລົງແລະໝົດ​ໄປ​ເທື່ອ​ລະ​ກ້າວ.
  • ສືບ​ຕໍ່​ພັດ​ທະ​ນາ​ຊັບ​ພະ​ຍາ​ກອນ​ມະ​ນຸດ​ໃຫ້​ມີ​ຄຸນ​ນະ​ພາບ, ກະກຽມຄວາມພ້ອມເພື່ອ ປະກາດເປັນເມືອງສາທາລະນະສຸກແບບຢ່າງ ແລະ ເມືອງວັດທະນະທຳ ສົ່ງ​ເສີມ​ວຽກ​ງານຝຶກ​ອົບ​ຮົມ​ທາງ​ດ້ານ​ສີ​ມື​ແຮງ​ງານ ແລະ ກວດກາຄຸ້ມຄອງແຮງງານຢູ່ບັນດາຫົວໜ່ວຍແຮງງານຕ່າງໆໃຫ້ຖືກຕ້ອງຕາມລະບຽບກົດໝາຍ,​ ສົ່ງເສີມການ​ສ້າງວຽກ​ເຮັດ​ງານ​ທຳ ຕິດ​ພັນ​ກັບ​ການພັດ​ທະ​ນາ​ແຫຼ່ງ​ທ່ອງ​ທ່ຽວ​ທີ່​ມີ​ຢູ່​ໃຫ້​ເປັນ​ທີ່​ດຶງ​ດູດ​ຈິດ​ໃຈ​ຂອງ​ແຂກ​ພາຍ​ໃນ ແລະ ຕ່າງ​ປະ​ເທດ ໄປຄຽງ​ຄູ່​ກັບ​ການປົກ​ປັກ​ຮັກ​ສາ ແລະ ເສີມ​ຂະ​ຫ​ຍາຍ​ຮີດ​ຄອງ​ປະ​ເພ​ນີ, ວັດ​ທະ​ນາ​ທຳ​ອັນ​ດີ​ງາມ​ຂອງ​ຊາດ, ຂອງ​ທ້ອງ​ຖິ່ນ​ຢ່າງ​ຕັ້ງ​ໜ້າ.

 

Loading...