6 ເດືອນຕົ້ນປີ 2024 ດ່ານພາສີ ສາກົນ ນາເພົ້າເກັບລາຍຮັບໄດ້ 125 ຕື້ກວ່າກີບ
ທ່ານ ສຸພັດ ສຸແສງໄທ ຫົວໜ້າດ່ານພາສີສາກົນ ນາເພົ້າໄດ້ໃຫ້ສໍາພາດຕໍ່ຜູ້ສື່ຂ່າວແຂວງຄໍາມ່ວນເມື່ອບໍ່ດົນມານີ້ວ່າ: ໃນປີ 2024 ນີ້, ດ່ານພາສີສາກົນນາເພົ້າໄດ້ຮັບຕົວເລກແຜນການລາຍຮັບຈໍານວນ 305 ຕື້ກີບ ຖ້າທຽບໃສ່ສົກປີ 2023 ຈໍານວນ 162 ຕື້ກວ່າກີບ, (ເພີ່ມຂຶ້ນ 142 ຕື້ກວ່າກີບ), ໃນ 6 ເດືອນຕົ້ນປີ 2024 ປະຕິບັດໄດ້ 125 ຕື້ກວ່າກີບ, ເທົ່າກັບ 41,21% ຂອງແຜນການປີ.
ລາຍຮັບຫຼັກຂອງການຈັດເກັບແມ່ນໄດ້ຈາກປະເພດນ້ຳມັນເຊື້ອໄຟ 15,37 ຕື້ກີບ; ປະເພດຄ່າທຳນຽມຕ່າງໆ ເທົ່າກັບ 35,69 ຕື້ກີບ; ປະເພດສິ້ນສ່ວນອາໄລ່ 1,67 ຕື້ກີບ; ປະເພດເຄື່ອງກໍ່ສ້າງ 2,50 ຕື້ກີບ; ປະເພດເຄື່ອງໃຊ້ໄຟຟ້າ 3,37 ຕື້ກີບ; ເຄື່ອງອຸປະໂພກ – ບໍລິໂພກ 1,605 ຕື້ກີບ; ປະເພດສິນຄ້ານຳເຂົ້າເພື່ອສົ່ງອອກ 1,457 ລ້ານກີບ; ປະເພດສິນຄ້າຕາມສັນຍາອາຊຽນ (FORM D) 24,55 ຕື້ກີບ; ປະເພດສິນຄ້າຕາມສັນຍາ (FORM S+E) 3,98 ຕື້ກີບ; ປະເພດຄ່າຊັກພິເສດສົ່ງອອກ 33,03 ຕື້ກີບ .
ທ່ານ ສຸພັດ ສຸແສງໄທໄດ້ກ່າວຕື່ມວ່າ: ສາຍເຫດທີ່ພາໃຫ້ລາຍຮັບຫຼຸດແຜນການ 6 ເດືອນຕົ້ນ ປີ 2024
ຍ້ອນວ່າໃນ 6 ເດືອນຕົ້ນ ປີ 2024 ມີຫຼາຍປະເພດສິນຄ້າເພີ່ມຂຶ້ນ ແລະ ຍັງມີຫຼາຍປະເພດສິນຄ້າມີລັກສະນະຫຼຸດ ລົງ, ເປັນຕົ້ນໝວດສິນຄ້າຕົ້ນຕໍ່ເຊັ່ນ: ເຄື່ອງກໍ່ສ້າງ, ເຄື່ອງໃຊ້ໄຟຟ້າ, ເຄື່ອງອຸປະໂພກ – ບໍລິໂພກ ແລະ ສິນຄ້າຟອມS+E, ຍ້ອນສະພາບເສດຖະກິດພາຍໃນປະເທດ ແລະ ຂອງໂລກ, ອັດຕາເງິນເຟີ້ເພີ້ມທະວີສູງຂຶ້ນເລື້ອຍໆ, ການປະຕິບັດມູນຄ່າແຈ້ງຕາມລາຄາຊື້-ຂາຍຕົວຈິງ ຍັງບໍ່ທັນຄຸ້ມຄອງໄດ້ຢ່າງມີປະສິດທິພາບ, ສ່ວນຫຼາຍແມ່ນໄດ້ເຍືອງເບິ່ງຂໍ້ມູນຂອງດ່ານອື່ນມາສົມທຽບ,ການປະຕິບັດມູນຄ່າແຈ້ງຕາມລາຄາຊື້-ຂາຍຕົວຈິງ ຍັງບໍ່ທັນຄຸ້ມຄອງໄດ້ຢ່າງມີປະສິດທິພາບ, ສ່ວນຫຼາຍແມ່ນໄດ້ເຍືອງເບິ່ງຂໍ້ມູນຂອງດ່ານອື່ນມາສົມທຽບ, ການກຳນົດວາງແຜນໃນການເກັບລາຍຮັບແຕ່ລະໄລຍະ, ແຕ່ລະເດືອນ ບໍ່ເປັນໄປຕາມເປົ້າໝາຍທີ່ຄາດໄວ້ຍ້ອນສາຍເຫດການປ່ຽນແປງຂອງຜູ້ນຳເຂົ້າ-ສົ່ງອອກ ແລະ ສະພາບແວດລ້ອມໃນຕົວ – ນອກຕົວ, ລະບົບໄຟຟ້າ ແລະ ສັນຍານທາງດ້ານເອເລັກໂທນິກຂັດຂ້ອງ,ບໍ່ຄ່ອຍປົກກະຕິເຮັດໃຫ້ການບໍລິການບາງຄັ້ງຊັກຊ້າແກ່ຍາວເວລາ.
ທ່ານ ຫົວໜ້າດ່ານພາສີສາກົນ ນາເພົ້າໄດ້ກ່າວຕື່ມອີກວ່າ: ເພື່ອເຮັດໃຫ້ຕົວເລກລາຍຮັບໄດ້ຕາມແຜນການທີ່ວາງໄວ້ ແລະ ລື່ນຄາດໝາຍ, ດ່ານພາສີສາກົນນາເພົ້າ ຈຶ່ງໄດ້ກຳນົດມາດຕະການຈຳນວນໜຶ່ງເປັນວຽກງານຈຸດສຸມ ຄື: ເອົາໃຈໃສ່ສຶກສາອົບຮົມດ້ານການເມືອງ-ແນວຄິດຢ່າງເປັນປົກກະຕິ, ຖືເອົາວຽກງານການເກັບລາຍຮັບເປັນໜ້າທີ່ການເມືອງຕົ້ນຕໍຕິດພັນກັບການເຄື່ອນໄຫວວຽກງານອື່ນໆ,ຈັດວາງໜ້າວຽກແບ່ງຄວາມຮັບຜິດຊອບໃຫ້ພະນັກງານໃນໜ້າວຽກຕ່າງໆພາຍໃນດ່ານພາສີສາກົນນາເພົ້າໃຫ້ແທດເໝາະກັບຄວາມຮູ້ – ຄວາມສາມາດຂອງແຕ່ລະບຸກຄົນ, ເພີ້ມທະວີການປະຕິບັດໜ້າທີ່ວຽກງານວິຊາສະເພາະໃຫ້ເຂັ້ມງວດຕາມກົດໝາຍພາສີ ແລະ ລະບຽບການອື່ນທີ່ກ່ຽວຂ້ອງ, ເອົາໃຈໃສ່ຕິດຕາມ,ກວດກາ ແລະ ຄຸ້ມຄອງປະເພດສິນຄ້າທີ່ເປັນລາຍຮັບຕົ້ນຕໍ. ຈຳກັດການອະນຸຍາດໃຫ້ຄ້ຳປະກັນນຳເອົາສິນຄ້າເຄື່ອງຂອງອອກຈາກສາງ ຫຼື ດ່ານພາສີກ່ອນການແຈ້ງພາສີເປັນລາຍລະອຽດ, ພ້ອມນັ້ນກໍເອົາໃຈໃສ່ຕິດຕາມ, ຄຸ້ມຄອງສິນຄ້າ ເຄື່ອງຂອງທີ່ນຳເຂົ້າຕາມນະໂຍບາຍສົ່ງເສີມການລົງທືນເພື່ອຫຼີກລ້ຽງຊ່ອງຫວ່າງການນຳເອົາໄປໃຊ້ໂດຍບໍ່ຖືກຕ້ອງຕາມເປົ້າໝາຍ, ປັບປຸງແບບແຜນວິທີເຮັດວຽກໃຫ້ກະທັດຮັດສອງຄ່ອງຕາມລະບຽບກົດ ໝາຍ, ຫຼຸດຜ່ອນຂັ້ນຕອນທີ່ບໍ່ຈຳເປັນ, ສ້າງເງື່ອນໄຂເພື່ອອຳນວນຄວາມສະດວກໃຫ້ແກ່ການນຳເຂົ້າ – ອອກສິນຄ້າເຄື່ອງຂອງທີ່ຖືກຕ້ອງຕາມລະບຽບກົດໝາຍ, ສືບຕໍ່ປະຕິບັດຄຳສັ່ງຂອງນາຍົກລັດຖະມົນຕີສະບັບເລກທີ 15/ນຍ ລົງວັນທີ 1 ພຶດສະພາ 2016 ວ່າດ້ວຍການເພີ້ມທະວີຄວາມເຂັ້ມງວດໃນການຄຸ້ມຄອງ ແລະ ການກວດກາການຂຸດຄົ້ນໄມ້, ການເຄື່ອນຍ້າຍໄມ້ ແລະ ທຸລະກິດໄມ້, ເພີ້ມທະວີວຽກງານປະສານສົມທົບກັບອຳນາດການປົກຄອງທ້ອງຖີ່ນ, ພະແນກການເງິນແຂວງ ແລະ ພະແນກການທີ່ກ່ຽວຂ້ອງເພື່ອສ້າງສີ່ງອຳນວຍຄວາມສະດວກໃນການຈັດຕັ້ງວຽກງານວິຊາສະເພາະຢູ່ດ່ານພາສີສາກົນນາເພົ້າໃຫ້ມີຄວາມເຂັ້ມແຂງ.
(ຂ່າວ: ແດງສະຫວັດ ແສນພານິດ)
