ທ່ານ ດາວເຮືອງ ນັນທະວົງ ຄະນະປະຈຳພັກແຂວງ ຮອງເຈົ້າແຂວງວຽງຈັນ ໄດ້ຂຶ້ນລາຍງານຫຍໍ້ກ່ຽວກັບການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ ຂອງແຂວງ ໃນໄລຍະ 6 ເດືອນຕົ້ນປີ ແລະ ຄາດຄະເນ 6 ເດືອນທ້າຍປີ 2024 ຕໍ່ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງວຽຈັນ ຊຸດທີ II ທີ່ໄດ້ໄຂຂຶ້ນໃນລະຫວ່າງ ວັນທີ 31-ກໍລະກົດ ຫາ 2 ສິງຫາ 2024 ຢູ່ທີ່ສະໂມສອນຫ້ອງວ່າການປົກຄອງແຂວງ.
ໃນໄລຍະ 6 ເດືອນຕົ້ນປີ 2024 ນີ້ສະພາບເສດຖະກິດຂອງແຂວງມີທ່າອ່ຽງຂະຫຍາຍຕົວດີຂຶ້ນ ເຮັດໃຫ້ເສດຖະກິດຂະຫຍາຍຕົວຢູ່ໃນລະດັບ 2,9% ເທົ່າກັບ 53,70% ຂອງແຜນການປີ ຄິດເປັນມູນຄ່າໄດ້ 7.834 ຕື້ກີບ (ແຜນການຫມົດປີແມ່ນ 5,4% ຄິດເປັນມູນຄ່າ11.000 ກວ່າຕື້ກີບ)
ໃນນີ້ :
– ຂະແຫນງກະສິກຳຂະຫຍາຍຕົວ 2.7% ມູນຄ່າ 2.000 ຕື້ກວ່າກີບ ກວມເອົາ 38.22% ຂອງ GDP
– ອຸດສາຫະກຳ 2,9% ມູນຄ່າ 2.000 ຕື້ກວ່າກີບ ກວມເອົາ 6% ຂອງ GDP
– ການບໍລິການ 3,6% ມູນຄ່າ 2.000 ຕື້ກວ່າກີບ ກວມເອົາ 6,6% ຂອງ GDP
– ອາກອນ 1,96% ມູນຄ່າ 153 ຕື້ກີບ ກວມ 2,71% ຂອງ GDP
ນອກຈາກນີ້ແຂວງຍັງຕ້ອງການທືນເພື່ອມາພັດທະນາທັງໝົດ 2.366 ຕື້ກວ່າກີບ ກວມເອົາ 21.15% ຂອງ GDP
ໃນນີ້ 6 ເດືອນຕົ້ນປີສາມາດຈັດຕັ້ງປະຕິບັດໄດ້ 1.911 ຕື້ກວ່າກີບ ເທົ່າກັບ 80.80% ຂອງແຜນການປີ ກວມເອົາ 17.9% ຂອງ GDP ໂດຍມີໂຄງການລົງທຶນຂອງລັດທັງຫມົດ 273 ໂຄງການ ມູນຄ່າ 7.980 ຕື້ກວ່າກີບ ເຊິ່ງປະຕິບັດສຳເລັດແລ້ວ 4.320 ຕື້ກວ່າກີບ.
ນອກນີ້ແຂວງວຽງຈັນ ໄດ້ເອົາໃຈໃສ່ຕິດຕາມຊຸກຍູ້ການຈັດຕັັ້ງປະຕິບັດ ບັນດາໂຄງການພັດທະນາໂຄງລ່າງພື້ນຖານຢູ່ພາຍໃນແຂວງເປັນຕົ້ນ:
ສ້ອມແປງເສັ້ນທາງຫລວງແຫ່ງຊາດ ເລກ 13 ເໜືອ ຊ່ວງແຂວງວຽງຈັນ, ເສັ້ນທາງຫີນເຫີບ-ຊະນະຄາມ ສຳເລັດ 64,6%, ບ້ານຈຽງ-ເມືອງແມດ ໄລຍະສອງ ສຳເລັດ 41,32%, ເສັ້ນທາງ 4507 ບ້ານນາເຄືອຫາທົ່ງຮາບ ສຳເລັດ 85,29% ແລະ ເສັ້ນທາງສາຍ A ເທດສະບານແຂວງ ສຳເລັດ 85,34%.
ໃນໄລຍະ 6 ເດືອນທ້າຍປີ 2024 ແຂວງວຽງຈັນຈະສູ້ຊົນບັນດາມາດຕະການ, ເພື່ອເຮັດໃຫ້ເສດຖະກິດມະຫາພາກຂະຫຍາຍຕົວຢ່າງຕໍ່ເນື່ອງ, ເຊິ່ງຈະໄດ້ສຸມໃສ່ວຽກງານດ້ານຕ່າງໆ ແລະ ແຜນຄາດຄະເນໝົດປີລວມຍອດຜະລິດຕະພັນພາຍໃນ GDP ຂອງແຂວງ ຈະບັນລຸຕາມແຜນທີ່ວາງໄວ້ໃນລະດັບ 5,4%, ຄິດເປັນມູນຄ່າ 11.189 ຕື້ກີບ, ລາຍຮັບສະເລ່ຍຕໍ່ຫົວຄົນ 1.191 ໂດລາສະຫະລັດ ຫຼື ເທົ່າກັບ 22,87 ລ້ານກີບ ຕໍ່ຄົນ.
ຂ່າວ: ແຂວງວຽງຈັນອອນລາຍ
