ໂອກາດເຂົ້າຮ່ວມກອງປະຊຸມລັດຖະບານເປີດກ້ວາງ ຄັ້ງທີ I ປີ 2024 ທີ່ຈັດຂຶ້ນລະຫວ່າງວັນທີ 15-17 ກໍລະກົດ 2024 ທ່ານ ດາວວົງ ພອນແກ້ວ ເຈົ້າແຂວງສາລະວັນ ໄດ້ໃຫ້ສຳພາດຕໍ່ສື່ມວນຊົນ ເຖິງວຽກງານທ່ອງທ່ຽວລາວ 2024 ນີ້, ໂດຍທ່ານໄດ້ຍົກໃຫ້ເຫັນວ່າ: ປີທ່ອງທ່ຽວລາວປີນີ້ ແຂວງສາລະວັນ ໄດ້ຈັດຫລາຍກິດຈະກຳ ເພື່ອເປັນການດຶງດູດເອົານັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາທ່ອງທ່ຽວພາຍໃນແຂວງ, ໄລຍະ 6 ເດືອນຜ່ານມາ ໄດ້ສຸມໃສ່ຈັດຕັ້ງປະຕິບັດຕາມປະຕິທິນທ່ອງທ່ຽວຂັ້ນແຂວງ ສຳເລັດ 7 ເມືອງ 7 ກິດຈະກໍາ ເປັນຕົ້ນ: ບຸນປະເພນີ ພະແກ້ວນໍ້າຢາດ ບ້ານາໂພ ເມືອງວາປີ, ບຸນນະມັດສະການພະຍາດນາດູ່ ເມືອງລະຄອນເພັງ, ເທສະການກາເຟຄຳ ບ້ານໂນນດູ່ ເມືອງເລົ່າງາມ, ເທສະການຜ້າຝ້າຍແພລາຍ ເຜົ່າກະຕາງ ບ້ານສາມັກຄີໄຊ ເມືອງຕຸ້ມລານ, ເທສະການໝາກພ້າວນາໄຊ ເມືອງສາລະວັນ, ບຸນປະເພນີອາຢາ ເຜົ່າປະໂກະ ເມືອງສະໝ້ວຍ ແລະເທສະການປີ້ງໄກ່ນາປົ່ງ ເມືອງຄົງເຊໂດນ ເຊິ່ງແຕ່ລະເມືອງ ໄດ້ມີການວາງສະແດງສິນຄ້າຜະລິດຕະພັນ ທີ່ເປັນໂອດັອບຂອງຕົນ ຕິດພັນກັບກິດຈະການປະກວດສິລະປະວັນນະຄະດີ ທີ່ເປັນເອກະກະລັກສະເພາະຂອງແຕ່ລະທ້ອງຖິ່ນ ເຮັດໃຫ້ບັນຍາກາດການທ່ອງທ່ຽວມີຄວາມຄຶກຄື້ນ ເຊິ່ງສາມາດດຶງດູດເອົາທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວໄດ້ຫລາຍກວ່າ 122.622 ເທື່ອຄົນ, ເທົ່າກັບ 90% ຂອງແຜນ. ໃນນີ້, ນັກທ່ອງທ່ຽວພາຍໃນ 68.198 ເທື່ອຄົນ, ນັກທ່ອງທ່ຽວສາກົນ 8.841 ເທື່ອຄົນ ແລະນັກທ່ອງທ່ຽວຊາຍແດນ 45.583 ເທື່ອຄົນ, ສາມາດສ້າງລາຍຮັບທາງກົງ ແລະ ທາງອ້ອມໄດ້ປະມານ 16 ລ້ານໂດລາສະຫະລັດ ເທົ່າກັບ 91% ຂອງແຜນການ.
