ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

6 ແຂວງພາກເໜືອທາບທາມຮ່າງວິໄສທັດ,ຍຸດທະສາດ ແລະ ແຜນພັດທະນາວຽກງານກວດສອບແຫ່ງລັດ

ກອງປະຊຸມທາບທາມຮ່າງວິໄສທັດຮອດປີ 2030,ຍຸດທະສາດຮອດປີ 2025 ແລະ ແຜນພັດທະນາວຽກງານກວດສອບແຫ່ງລັດຮອດປີ 2020 ແລະ ເຜີຍແຜ່ກົດໝາຍວ່າດ້ວຍອົງການກວດສອບແຫ່ງລັດ ໄດ້ຈັດຂຶ້ນໃນຕອນເຊົ້າຂອງວັນທີ 12 ກຸມພາ 2018 ທີ່ຫ້ອງປະຊຸມຂອງພະແນກພາຍໃນແຂວງອຸດົມໄຊ ໂດຍການເປັນປະທານຂອງທ່ານ ບຸນປອນ ວັນນະຈິດ ຮອງປະທານອົງການກວດສອບແຫ່ງລັດ,ເຂົ້າຮ່ວມມີຕາງໜ້າຈາກອົງການປົກຄອງແຂວງ ແລະ ອົງການທີ່ກ່ຽວຂ້ອງຈາກ 6 ແຂວງພາກເໜືອ ຜົ້ງສາລີ,ຫຼວງນ້ຳທາ,ບໍ່ແກ້ວ,ໄຊຍະບູລີ,ແຂວງອຸດົມໄຊ ແລະ ແຂວງຫຼວງພະບາງ,ນອກຈາກນີ້ກໍມີຕາງຈາກພະແນກການ-ອົງການອ້ອມຂ້າງຂອງແຂວງອຸດົມໄຊເຂົ້າຮ່ວມ.

ໃນກອງປະຊຸມຜູ້ເຂົ້າຮ່ວມແມ່ນໄດ້ຮັບຟັງການຜ່ານຮ່າງແຜນຍຸດທະສາດການພັດທະນາວຽກງານກວດສອບແຫ່ງລັດຮອດປີ 2020,ຍຸດທະສາດຮອດປີ 2025 ແລະ ວິໄສທັດຮອດປີ 2030 ໃນນັ້ນຜູ້ເຂົ້າຮ່ວມແມ່ນຈະໄດ້ພ້ອມກັນຄົ້ນຄ້ວາປະກອບຄຳຄິດຄຳເຫັນໃສ່ຮ່າງວິໄສທັດ ຍຸດທະສາດ ແລະ ແຜນພັດທະນາວຽກງານກວດສອບແຫ່ງລັດ ເພື່ອເຮັດໃຫ້ຮ່າງແຜນພັດທະນາວຽກງານກວດສອບແຫ່ງລັດ ຍຸດທະສາດ ແລະ ວິໄສທັດ ມີຄວາມສອດຄ່ອງກັບສະພາບຄວາມເປັນຈິງ ແລະ ແທດເໝາະກັບການເຕີບໃຫ່ຍຂະຫຍາຍຕົວຂອງເສດຖະກິດ-ສັງຄົມແຕ່ລະໄລຍະ ເຮັດໃຫ້ການຈັດຕັ້ງປະຕິບັດວຽກງານກວດສອບມີຄວາມຄ່ອງຕົວ ມີປະສິດທິພາບ ປະສິດທິຜົນ ແລະ ທ່ວງທັນກັບສະພາບການ ແນໃສ່ສະກັດກັ້ນປະກົດການຫຍໍ້ທໍ້ທາງດ້ານການເງິນ ແລະ ການນຳໃຊ້ງົບປະມານແຫ່ງລັດ ເຮັດໃຫ້ການຄຸ້ມຄອງລັດ ຄຸ້ມຄອງເສດຖະກິດ-ສັງຄົມມີຄວາມເປັນເອກະພາບ ມີປະສິດທິພາບ ປະສິດທິຜົນ ແລະ ປະຢັດ. ຊຸກຍູ້ການພັດທະນາເສດຖະກິດແຫ່ງຊາດໃຫ້ຂະຫຍາຍຕົວ ແລະ ໝັ້ນທ່ຽງ ທັງເປັນການປະຕິບັດເນື້ອໃນຈິດໃຈຂອງກອງປະຊຸມໃຫຍ່ຄັ້ງທີ 10 ຂອງສູນກາງພັກໃຫ້ປະກົດຜົນເປັນຈິງ. ໃນກອງປະຊຸມຄັ້ງນີ້ຍັງໄດ້ມີການເຜີຍແຜ່ກົດໝາຍວ່າດ້ວຍການກວດສອບແຫ່ງລັດ ( ສະບັບປັບປຸງປີ 2016 ) ເພື່ອໃຫ້ຜູ້ເຂົ້າຮ່ວມໄດ້ຮັບຮູ້ ແລະ ເຂົ້າໃຈກ່ຽວກັບກົດໝາຍວ່າດ້ວຍການກວດສອບຢ່າງເລິກເຊິ່ງ.

ສີຈັນ ເກດວົງສາ