ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ແຫລ່ງຂ່າວຈາກ ແຂວງບໍ່ແກ້ວ ໃຫ້ຮູ້ວ່າ: ກອງປະຊຸມເປີດກວ້າງ ລະດົມຄວາມຄິດເຫັນໃສ່ເນື້ອໃນໂຄງການ ການເມືອງຂອງພັກ ແລະ ເຊື່ອມຊຶມເອກະສານສໍາຄັນຂອງພັກ ປະຊາຊົນ ປະຕິວັດລາວ ຈັດຂຶ້ນໃນວັນທີ 25 ເມສາ 2024 ທີ່ແຂວງບໍ່ແກ້ວ ໂດຍການເປັນປະທານຂອງທ່ານ ກິແກ້ວ ໄຂຄໍາພິທູນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ແຫ່ງ ສປປ ລາວ, ມີອະດີດການນໍາ, ຄະນະພັກ, ຄະນະນໍາ 6 ແຂວງພາກເໜືອ (ບໍ່ແກ້ວ, ຫລວງນໍ້າທາ, ອຸດົມໄຊ, ຫລວງພະບາງ, ໄຊຍະບູລີ ແລະ ແຂວງຜົ້ງສາລີ ເຂົ້າຮ່ວມ).
ທ່ານ ກິແກ້ວ ໄຂຄໍາພິທູນ ໄດ້ກ່າວວ່າ: ໂຄງການ ການເມືອງ ຂອງພັກແມ່ນການກຳນົດແນວທາງ ແຜນນະໂຍບາຍຍາວນານ ຂອງພັກ, ໂຄງການ ການເມືອງປຽບເໝືອນເປັນເຂັມທິດຊີ້ບອກທາງໃນການບູລະນະລະບອບ ປະຊາທິປະໄຕ ປະຊາຊົນ ຕາມເສັ້ນທາງສັງຄົມນິຍົມໃຫ້ສົມບູນຍິ່ງຂຶ້ນ, ໂຄງການ ການເມືອງແມ່ນທິດສະດີປະຕິວັດ ຂອງພັກ ແລະ ປຽບເໝືອນທວນໄຟເຍືອງທາງໃຫ້ປະຊາຊົນ ໃນພາລະກິດປະຕິວັດມີຜົນສຳເລັດຢ່າງມີໄຊ. ຕະຫລອດໄລຍະຜ່ານມາ, ພັກປະຊາຊົນ ປະຕິວັດລາວ ເປັນຜູ້ຈັດຕັ້ງ ແລະ ນຳພາທຸກໄຊຊະນະ ຂອງການປະຕິວັດລາວ ພັກໄດ້ວາງແຜນດຳເນີນງານ ໂຄງການ ການເມືອງ ຂອງຕົນ ເພື່ອນຳພາການປະຕິວັດລາວຈາກໄຊຊະນະນີ້ໄປສູ່ໄຊຊະນະໃໝ່ ທີ່ໃຫຍ່ຫລວງກວ່າເກົ່າ ແຕ່ລະໂຄງການ ການເມືອງໄດ້ເປັນຂີດໝາຍອັນໃສແຈ້ງທີ່ໄດ້ເປັນການສ່ອງແສງໃຫ້ເຫັນເຖິງການເຕີບໃຫຍ່ຂະຫຍາຍຕົວ ຂອງພັກເຮົາ. ປັດຈຸບັນ, ການສ້າງໂຄງການ ການເມືອງ ຂອງພັກ ເປັນສະບັບທີ 3 (ສະບັບທີ 1 ແມ່ນປີ 1955, ສະບັບທີ 2 ປີ 1972) ເຊິ່ງຈະເປັນຂີດໝາຍອັນສຳຄັນ ຂອງຍຸກສະໄໝໃໝ່ ຂອງການປະຕິວັດ ຢູ່ປະເທດເຮົາ ແລະ ເປັນຄວາມຮັບຜິດຊອບ ຂອງທົ່ວພັກ. ພ້ອມກັນນັ້ນ, ການຈັດຕັ້ງປະຕິບັດສຳເລັດໂຄງການການເມືອງສະບັບນີ້ຈະສ້າງໄດ້ບາດກ້າວເດີນທີ່ໜັກແໜ້ນ, ເຮັດສຳເລັດພາລະກິດແຫ່ງການສ້າງລະບອບ ປະຊາທິປະໄຕ ປະຊາຊົນ ແລະ ນຳພາປະເທດຊາດກ້າວເດີນຂຶ້ນ ຕາມເສັ້ນທາງສັງຄົມນິຍົມ, ປະຕິບັດຕາມທິດຊີ້ນຳ ຂອງຄະນະບໍລິຫານງານສູນກາງພັກ, ເຊິ່ງຄະນະຮັບຜິດຊອບຮ່າງໂຄງການ ການເມືອງ ໄດ້ຮ່າງເນື້ອໃນໂຄງການ ການເມືອງສະບັບດັ່ງກ່າວ ແລະ ຜ່ານກອງປະຊຸມຄົບຄະນະບໍລິຫານງານສູນກາງພັກ ໃນໄລຍະຜ່ານມາ ພ້ອມກັນນັ້ນ ກໍໄດ້ປັບປຸງເປັນສະບັບທີ 5. ສະນັ້ນ, ເພື່ອຮັບປະກັນໃຫ້ແກ່ເນື້ອໃນໂຄງການ ການເມືອງ ຂອງພັກ ສະບັບນີ້ໄດ້ມີຄວາມຮັດກຸມ, ມີຄວາມຖືກຕ້ອງ ແລະ ມີເນື້ອໃນທີ່ມີວິທະຍາສາດ ທັງເປັນການຕອບສະໜອງແກ່ການກຳນົດທິດທາງ ແລະ ການປະຕິບັດໜ້າທີ່ ຂອງພັກປະຊາຊົນ ປະຕິວັດລາວ ໃນຕໍ່ໜ້າໃຫ້ປະກົດຜົນເປັນຈິງນັ້ນ ຈິ່ງມີຄວາມຈຳເປັນຕ້ອງໄດ້ລະດົມແນວຄວາມຄິດຂອງທົ່ວພັກຢ່າງເປີດກວ້າງ ໂດຍສະເພາະແມ່ນຄະນະບໍລິຫານງານພັກກະຊວງ-ອົງການ ແລະ ຄະນະບໍລິຫານງານພັກແຂວງ ໃນຂອບເຂດທົ່ວປະເທດ.
ກອງປະຊຸມຄັ້ງນີ້, ເປັນການເປີດກວ້າງລະດົມຄວາມຄິດເຫັນເຂົ້າໃສ່ຮ່າງເນື້ອໃນໂຄງການການເມືອງ ຂອງພັກ ເຊິ່ງໄດ້ຈັດພ້ອມກັນ 3 ພາກ ໄປພ້ອມໆກັນ ໂດຍມີບັນດາແຂວງອ້ອມຂ້າງເຂົ້າຮ່ວມ ຄື: ພາກເໜືອ ຈັດຢູ່ແຂວງ ບໍ່ແກ້ວ, ພາກກາງ ຈັດຢູ່ແຂວງວຽງຈັນ ແລະ ພາກໃຕ້ ຈັດຢູ່ແຂວງເຊກອງ.
ໂອກາດນີ້, ທ່ານ ກິແກ້ວ ໄຂຄຳພິທູນ ໄດ້ສະເໜີໃຫ້ບັນດາຄະນະຜູ້ແທນກອງປະຊຸມຈາກບັນດາແຂວງອ້ອມຂ້າງ ແລະ ຄະນະຜູ້ແທນຈາກແຂວງເຈົ້າພາບ ຈົ່ງໄດ້ລົງເລິກເນື້ອໃນທີ່ກ່ຽວຂ້ອງ ໂດຍສະເພາະບັນຫາທີ່ມີລັກສະນະກວມລວມທາງດ້ານທິດສະດີ, ພຶດຕິກໍາ ພ້ອມກັນນັ້ນ ບັນດາທິດທາງ, ໜ້າທີ່ຈຸດສຸມ ຂອງເນື້ອໃນໂຄງການ ການເມືອງ ຂອງພັກ, ບັນດາທ່າອ່ຽງ ຂອງສະພາບການພາກພື້ນ ແລະ ສາກົນ ທີ່ສົ່ງຜົນສະທ້ອນຕໍ່ກັບການຈັດຕັ້ງປະຕິບັດທິດທາງ, ຈຸດໝາຍດັ່ງກ່າວ ພ້ອມທັງບັນດາຈຸດພິເສດສະພາບການໃນການພັດທະນາປະເທດຊາດ ກໍຄືການພັດທະນາເສດຖະກິດ-ສັງຄົມ ຂອງປະເທດເຮົາ.
ຂ່າວ: ຄໍາເພັງ ສີສະຫວ່າງ