ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສະຖາປະນາ ສປປ ລາວ ຄົບຮອບ 45 ປີ
( 02 ທັນວາ 1975 – 2020 ) ຢ່າງສຸດໃຈ

“60 ປີ ແຫ່ງ ການພົວພັນມິດຕະພາບ ແລະ ການຮ່ວມມື ຣັດເຊຍ-ລາວ” – ບົດຄວາມ ຂອງທ່ານ ເຊີເກ ລາບຣົບ ລັດຖະມົນຕີການຕ່າງປະເທດ ແຫ່ງ ສ.ຣັດເຊຍ

ໃນປີນີ້, ສອງປະເທດພວກເຮົາ ສະເຫຼີມສະຫຼອງວັນສຳຄັນຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສະຫະພາບ ໂຊວຽດ ຫຼື ສະຫະພັນຣັດເຊຍ ແລະ ສປປ ລາວ ນັບແຕ່ວັນທີ 7 ຕຸລາ 1960 ເປັນຕົ້ນມາ.

75 ປີ ແຫ່ງໄຊຊະນະການປົກປ້ອງປິຕຸພູມ ແມ່ນສັນຍາລັກທີ່ມີຄວາມສໍາຄັນອັນຍິ່ງໃຫຍ່ ຊຶ່ງເປັນການສິ້ນສຸດສົງຄາມ ໂລກຄັ້ງທີ 2. ພາຍຫຼັງການປະລາໄຊ ຂອງ ນາຊີ, ອັນເປັນແຮງຊຸກຍູ້ໃຫ້ແກ່ຂະບວນການຕໍ່ສູ້ປົດປ່ອຍຊາດ ແລະ ປະຊາຊົນ ໃຫ້ຫຼຸດພົ້ນອອກຈາກອານານິຄົມ ໃນ ອາຊີ. ສປປ ລາວ ໄດ້ມີຄວາມພະຍາຍາມຕໍ່ສູ້ເປັນເວລາຫຼາຍທົດສະວັດຢ່າງໜັກໜ່ວງ ເພື່ອປົດປ່ອຍຕົນເອງ. ຕໍ່ມາໃນເດືອນຕຸລາ ປີ 1945 ຈຶ່ງໄດ້ປະກາດເອກະລາດ ເພື່ອປົກປັກຮັກສາດິນແດນຂອງຕົນ. ໃນປີ 1954 ໃນກອງປະຊຸມ ເຊີແນວ, ສະຫະພາບສັງຄົມນິຍົມໂຊວຽດ ໄດ້ມີສ່ວນຮ່ວມໃນການເຄື່ອນໄຫວ ໂດຍສະ ເໜີ ໃຫ້ຢຸດຕິການຮຸກຮານ ຂອງ ພວກຫຼ້າເມືອງຂຶ້ນຝຣັ່ງ ຕໍ່ຕ້ານປະຊາຊົນອິນດູຈີນ ແລະ ຮັບປະກັນຄວາມເປັນກາງ ຂອງປະເທດລາວ ໃນປີຕໍ່ໆມາ. ການສະເໜີສ້າງຕັ້ງສາຍພົວພັນທາງການທູດ ຂອງ ລັດຖະບານລາວ ໂດຍໄດ້ຮັບການຕອບສະໜອງ ເປັນຢ່າງດີຈາກການນໍາຂອງ ສະຫະພາບໂຊວຽດ ໃນເດືອນສິງຫາ ປີ 1960.

ບາດກ້າວໃນການເລີ່ມຕົ້ນ ແຫ່ງ ການພົວພັນສອງຝ່າຍ ໄດ້ມີບົດບາດຕົວຈິງ ໂດຍສະຫະພາບ ໂຊວຽດ ໄດ້ຈັດຕັ້ງປະຕິບັດ ດ້ວຍການສ້າງຂົວ-ທາງ ແລະ ເປີດການບໍລິການຂົນສົ່ງທາງອາກາດ ເຊື່ອມຕໍ່ ລະຫວ່າງ ຮ່າໂນຍ-ວຽງຈັນ ເພື່ອສະໜັບສະໜຸນໃນການນໍາສົ່ງວັດຖຸອຸປະກອນຕ່າງໆໃຫ້ແກ່ກອງກຳລັງແນວລາວຮັກຊາດ.

ພວກເຮົາມີຄຳສຸພາສິດທີ່ວ່າ: “ຖ້າເຈົ້າບໍ່ມີໝູ່ – ຈົ່ງຊອກຫາ, ເມື່ອຊອກຫາໄດ້ແລ້ວ – ຈົ່ງຮັກສາໄວ້ໃຫ້ດີ”. ພາຍຫຼັງການສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ໃນປີ 1975, ສະຫະພາບໂຊວຽດ ໄດ້ໃຫ້ການສະໜັບສະໜຸນ ສປປ ລາວ ທັງທາງດ້ານຍານພາຫະນະ, ນ້ຳມັນເຊື້ອໄຟ, ອາຫານ ແລະ ເຄື່ອງອຸປະໂພກ-ບໍລິໂພກ ທຸກຢ່າງທີ່ຂາດເຂີນໃນປະເທດ ແລະ ສູນເສຍໄປໃນປາງສົງຄາມ ຍ້ອນການຮຸກຮານທີ່ຍາວນານຈາກຕ່າງປະເທດ. ພາຍຫຼັງ ປີ 1978, ຢູ່ວຽງຈັນ ໄດ້ມີໂຮງໝໍ-ຄລີນິກ ພ້ອມອຸປະກອນການແພດທີ່ທັນສະໄໝ. ບັນດາຊ່ຽວຊານ ໄດ້ຖ່າຍທອດປະສົບການດ້ານກະສິກຳ-ປ່າໄມ້, ສາທາລະນະສຸກ, ການສຶກສາ ແລະ ຂະແໜງອື່ນໆ ໂດຍໄດ້ຮັບການຊ່ວຍເຫຼືອ ຈາກສະຫະພາບໂຊວຽດ ຊຶ່ງໄດ້ຄຽງບ່າຄຽງໄຫຼ່ ກັບປະຊາຊົນລາວ ໃນການຟື້ນຟູເສັ້ນທາງທີ່ຖືກທຳລາຍຈາກສົງຄາມ, ໄດ້ສ້າງຂົວ ແລະ ດຳເນີນການສຳຫຼວດທາງທໍລະນີສາດ. ພ້ອມກັນນັ້ນ, ກໍໄດ້ສ້າງສິ່ງອຳນວຍຄວາມສະດວກທາງດ້ານເສດຖະກິດສັງຄົມແຫ່ງຊາດຫຼາຍຢ່າງ. ທາງດ້ານການສຶກສາ, ໄດ້ສ້າງສະຖາບັນການສຶກສາຊັບພະວິຊາຊັ້ນກາງ ສຳລັບການຝຶກອົບຮົມຊ່ຽວຊານດ້ານເຕັກນິກ, ດ້ານສາທາລະນະສຸກ ກໍໄດ້ມີການກໍ່ສ້າງໂຮງໝໍມິດຕະພາບ ລາວ-ຣັດເຊຍ (ໂຮງໝໍ 150 ຕຽງ), ມາເຖິງປັດຈຸບັນ ຍັງເປັນປະໂຫຍດຊ່ວຍໃຫ້ປະຊາຊົນລາວ ສາມາດພັດທະນາສ້າງສາປະເທດຊາດຂອງຕົນຕາມທິດພັດທະນາແບບຍືນຍົງ.

ໃນປັດຈຸບັນ, ການພົວພັນ ລະຫວ່າງ ຣັດເຊຍ-ລາວ ແມ່ນໄດ້ຮັບການຂະຫຍາຍຕົວຢ່າງຕັ້ງໜ້າ, ການປຶກສາຫາລືແລກປ່ຽນທາງດ້ານການເມືອງ, ການພັດທະນາ ແມ່ນມີການຮ່ວມມືກັນຢ່າງຕໍ່ເນື່ອງ. ໃນປີ 2015 ປະມຸກລັດຂອງສອງປະເທດ ໄດ້ມີການພົບປະກັນ ທີ່ນະຄອນຫຼວງປັກກິ່ງ ແຫ່ງ ສປຈີນ, ເນື່ອງໃນໂອກາດສະເຫຼີມສະຫຼອງ ແລະ ສັນສະເສີນວັນສິ້ນສຸດສົງຄາມໂລກຄັ້ງທີ 2 ຄົບຮອບ 70 ປີ. ນອກຈາກນັ້ນ, ທ່ານ ວາລາດີເມຍ ປູຕິນ ປະທານາທິບໍດີ ຣັດເຊຍ ໄດ້ພົບປະກັບ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແບບສ່ວນຕົວ ໃນກອງປະຊຸມສຸດຍອດ ຣັດເຊຍ-ອາຊຽນ ທີ່ ໂຊຈີ ແລະ ຢູ່ ສີງກະໂປ ໃນເດືອນພະຈິກ ປີ 2018. ໃນເດືອນກັນຍາ ປີ 2017, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ໄດ້ເດີນທາງຢ້ຽມຢາມ ຣັດເຊຍ ຢ່າງເປັນທາງການ ເພື່ອສືບຕໍ່ເສີມສ້າງການພົວພັນຮ່ວມມືສອງຝ່າຍ ກໍຄືການຢ້ຽມຢາມທາງລັດຖະສະພາ, ອົງການຊາວໜຸ່ມ ແລະ ອົງການຈັດຕັ້ງສັງຄົມ ລວມທັງສະມາຄົມມິດຕະພາບ.

ເງື່ອນໄຂບຸລິມະສິດທັງສອງຝ່າຍ ແມ່ນການເສີມສ້າງການຮ່ວມມືທາງດ້ານເສດຖະກິດ ແລະ ການຄ້າ, ຈັດຕັ້ງປະຕິບັດໂຄງການຮ່ວມມືຂະໜາດໃຫຍ່ ໂດຍສະເພາະ ແມ່ນໂຄງການເຂື່ອນໄຟຟ້າພະລັງງານນໍ້າ, ສ້າງເງື່ອນໄຂເສີມທ່າແຮງໃຫ້ແກ່ໂຄງການຂະໜາດນ້ອຍ ແລະ ຂະໜາດກາງ ໃນຂົງເຂດອຸດສາຫະກຳເຊັ່ນ: ການສຳຫຼວດ ແລະ ການຂຸດຄົ້ນແຮ່ທາດ, ການພິມທະນາບັດ ແລະ ການຜະລິດຢາ.

ບົດບາດອັນສຳຄັນໃນພາກປະຕິບັດຕົວຈິງ ກ່ຽວກັບການເສີມຂະຫຍາຍການຮ່ວມມື ແມ່ນຄະນະກຳມະການຮ່ວມມື ດ້ານເສດຖະກິດ-ການຄ້າ, ວິທະຍາສາດ ແລະ ເຕັກນິກ ລະຫວ່າງ ລັດຖະບານ ລາວ-ຣັດເຊຍ. ໃນກອງປະຊຸມຄັ້ງວັນທີ 15 ກໍລະກົດ 2019 ທີ່ນະຄອນຫຼວງມົດສະກູ, ຄະນະກຳມະການຮ່ວມມືສອງຝ່າຍ ໄດ້ລະບຸວຽກງານທີ່ເປັນຂໍກຸນແຈສຳຄັນໃນການຈັດຕັ້ງປະຕິບັດ ຕາມຂໍ້ຕົກລົງ ແລະ ສືບຕໍ່ແຜນການໃນຕໍ່ໜ້າ.

ຂະແໜງການສຶກສາ ເປັນສິ່ງທີ່ສຳຄັນໃນການພົວພັນສອງຝ່າຍ, ທ່ານ ເຊີເກ ລາບຣົບ ລັດຖະມົນຕີກະຊວງການຕ່າງປະເທດຣັດເຊຍ ໄດ້ສະແດງຄວາມພາກພູມໃຈ ທີ່ເຫັນຄົນລາວຫຼາຍຄົນໄດ້ຜ່ານການສຶກສາຢູ່ປະເທດຣັດເຊຍ ແລະ ອະດີດສະຫະພາບໂຊວຽດ. ໃນປັດຈຸບັນ, ທຸກຄົນໄດ້ມີຖານະຕຳແໜ່ງ, ມີຄວາມຮັບຜິດຊອບໃນການນໍາຂັ້ນສູງ ແລະ ລະດັບອື່ນໆ ຂອງ ສປປ ລາວ. ໃນນັ້ນ, ມີ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ເພື່ອນຮ່ວມງານຂອງເພີ່ນເອງ ກໍຄື ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ. ການຈັດກອງປະຊຸມເວທີພາກພື້ນ ໃນເດືອນພະຈິກ ປີ 2019, ມີຜູ້ແທນເຂົ້າຮ່ວມ ຮ້ອຍກວ່າຄົນ ທີ່ມາຈາກ 15 ປະເທດ, ທີ່ເປັນອາດິດນັກສຶກສາທີ່ຮຽນຈົບຈາກສະຫະພາບ ໂຊວຽດ ແລະ ຣັດເຊຍ. ທ່ານ ລາບຣົບ ຫວັງວ່າ: ຜູ້ຕາງໜ້າຊາວໜຸ່ມລາວຍຸກໃໝ່ ຈະສືບທອດເອົາແບບຢ່າງຈາກສິດເກົ່າທີ່ເຕັມໄປດ້ວຍຄວາມຮູ້ຄວາມສາມາດ. ໃນສົກຮຽນ 2020-2021 ທີ່ຈະມາເຖີງນີ້, ພວກເຮົາໄດ້ສະໜັບສະໜູນທຶນການສຶກສາ ຈໍານວນ 92 ທຶນ ໃຫ້ແກ່ ສປປ ລາວ ຊຶ່ງເຫັນວ່າ ໄດ້ເພີ່ມຂຶ້ນເກືອບ 3 ເທົ່າ ໃນໄລຍະ 5 ປີ ທີ່ຜ່ານມາ.

 

ປະຊາຊົນຣັດເຊຍ ໄດ້ໃຫ້ຄວາມສໍາຄັນ ແລະ ເຄົາລົບນັບຖືຕໍ່ສາຍການພົວພັນຖານອ້າຍນ້ອງ ລາວ-ຣັດເຊຍ, ຕໍ່ເຫດການອັນສໍາຄັນຂອງ ສອງປະເທດ ໃນໂອກາດຄົບຮອບ 75 ປີ ແຫ່ງ ໄຊຊະນະການປົກປ້ອງປິຕຸພູມ, ພວກເຮົາຮັບຮູ້ການປະກອບສ່ວນທີ່ສຳຄັນຂອງ ສປປ ລາວ ໃນການປົກປັກຮັກສາຄວາມຈິງທາງປະຫວັດສາດ, ລວມທັງການປະຕິເສດ ຕໍ່ກັບຄວາມພະຍາຍາມກ່າວຫາທີ່ບິດເບືອນຕໍ່ປະຫວັດສາດ.

ສອງປະເທດພວກເຮົາ ໄດ້ມີການພົວພັນກັນຢ່າງໃກ້ຊິດໃນເວທີສາກົນ, ມີທັດສະນະຄ້າຍຄືກັນຕໍ່ບັນຫາສຳຄັນທັງໃນພາກພື້ນ ແລະ ສາກົນ. ພວກເຮົາມີຄວາມສາມັກຄີ ແລະ ຄວາມມຸ້ງໝັ້ນໃນການສ້າງລະບຽບການປົກຄອງໂລກ ທີ່ມີຄວາມຍຸຕິທຳ ແລະ ໂລກຫຼາຍຂົ້ວ ທີ່ມີປະຊາທິປະໄຕ ບົນພື້ນຖານຫຼັກການຂອງກົດບັດສະຫະປະຊາຊາດ ແລະ ເຄົາລົບສິດທິຂອງປະຊາຊົນ ຕໍ່ແບບແຜນພັດທະນາທີ່ໂດດເດັ່ນຂອງຕົນເອງ. ພວກເຮົາພ້ອມທີ່ຈະເສີມຂະຫຍາຍການປຶກສາຫາລື ກັບ ສປປ ລາວ, ເຂົ້າຮ່ວມຢ່າງຕັ້ງໜ້າໃນເວທີພາກພື້ນອາຊຽນ ດ້ານຄວາມໝັ້ນຄົງ. ກອງປະຊຸມສຸດຍອດອາຊີຕາເວັນອອກ ເພື່ອຜົນປະໂຫຍດໃນການສົ່ງເສີມຂໍ້ລິເລີ່ມກ່ຽວກັບຮູບແບບຂອງສະຖາປັດຕະຍາກຳແຫ່ງຄວາມໝັ້ນຄົງທີ່ເທົ່າທຽມກັນ ແລະ ບໍ່ສາມາດແບ່ງແຍກໄດ້ໃນພາກພື້ນອາຊີ-ປາຊີຟິກ, ຮັກສາການເຕີບໂຕແບບຍືນຍົງ ຂອງທຸກໆປະເທດໃນພາກພື້ນ, ຮັບປະກັນການເຊື່ອມໂຍງຂອງແຕ່ລະປະເທດໃນຂອບເຂດຂະບວນການເຊື່ອມໂຍງ. ຂ້າພະເຈົ້າຂໍຖືໂອກາດນີ້ ສະແດງຄວາມຊົມເຊີຍ ແລະ ອວຍພອນມາຍັງບັນດາເພື່ອນຮ່ວມງານຝ່າຍລາວ ເນື່ອງໃນໂອກາດຄົບຮອບ 75 ປີ ວັນການທູດລາວ (12 ຕຸລາ 1945-12 ຕຸລາ 2020).

ການພົວພັນຮ່ວມມືທາງດ້ານການທະຫານ ລາວ-ຣັດເຊຍ ກໍ່ໄດ້ຮັບການເສີມຂະຫຍາຍ ນັບມື້ນັບເລິກເຊິ່ງ. ໃນປີຜ່ານມາ, ໄດ້ມີການຊ້ອມຮົບຮ່ວມກັນທີ່ເອີ້ນວ່າ «ລາຣົສ 2019», ຊຶ່ງຈັດຂຶ້ນຢູ່ ສປປ ລາວ ເປັນຄັ້ງທຳອິດ. ນັບແຕ່ປີ 2018 ເປັນຕົ້ນມາ, ມີຊ່ຽວຊານຈາກ ສູນປະຕິບັດງານດ້ານລະເບີດຝັງດິນສາກົນ ຂອງກຳລັງປະກອບອາວຸດ ສະຫະພັນຣັດເຊຍ ໄດ້ມາດຳເນີນການເກັບກູ້ລະເບີດທີ່ຍັງບໍ່ທັນແຕກ ໃນປາງສົງຄາມ ໃນຊຸມປີ 1964-1973 ຢູ່ ແຂວງບໍລິຄຳໄຊ ແລະ ແຂວງຊຽງຂວາງ. ການຈັດສົ່ງລົດຕັງ T-34 ຈຳນວນ 30 ຄັນ ໃຫ້ປະເທພວກເຮົາ ໃນເດືອນມັງກອນ ປີ 2019, ທີ່ເປັນຂອງຂວັນ ຈາກລັດຖະບານ ສປປ ລາວ ໄດ້ຮັບການຕອບຮັບຈາກປະຊາຊົນຊາວຣັດເຊຍ ຢ່າງຫຼວງຫຼາຍ.

ໃນເວລາທີ່ຫຍຸ້ງຍາກສົບສົນ, ເພື່ອນສະຫາຍ ລາວ ສາມາດເພິ່ງພາອາໄສການຊ່ວຍເຫຼືອຈາກ ຣັດເຊຍ ໄດ້ສະເໝີ. ໃນເດືອນສິງຫາ ປີ 2018, ຄະນະສະເພາະກິດ ຂອງກະຊວງສະຖານະການສຸກເສີນ ໄດ້ຈັດສົ່ງ-ມອບເຄື່ອງຊ່ວຍເຫຼືອດ້ານມະນຸດສະທຳ ໃຫ້ແກ່ປະຊາຊົນລາວ ທີ່ໄດ້ຮັບຜົນກະທົບຈາກໄພນໍ້າຖ້ວມຂະໜາດໃຫຍ່ ຢູ່ແຂວງອັດຕະປື ແລະ ໃນເດືອນພຶດສະພາ ປີ 2020, ໄດ້ມອບອຸປະກອນລະບົບການກວດພະຍາດ ໂຄວິດ-19 ຊຶ່ງຜະລິດໂດຍຣັດເຊຍ ຈຳນວນ 1.000 ເຄື່ອງມອບ ໃຫ້ຝ່າຍລາວ ເພື່ອສະກັດກັ້ນການແຜ່ລະບາດການຕິດເຊື້ອພະຍາດໂຄວິດ-19 ແລະ ການຊ່ວຍເຫຼືອ ຍັງຈະສືບຕໍ່ໃນອະນາຄົດ.

ເປັນເວລາ 60 ປີ ຊຶ່ງພວກເຮົາບໍ່ພຽງແຕ່ສາມາດປົກປັກຮັກສາ, ແຕ່ຍັງເສີມຂະຫຍາຍມູນເຊື້ອແຫ່ງມິດຕະພາບ, ຄວາມສາມັກຄີ ແລະ ການສືບຕໍ່ສະໜັບສະໜູນຊຶ່ງກັນ ແລະ ກັນ. ມື້ນີ້ ພວກເຮົາປະເຊີນໜ້າກັບພາລະໜ້າທີ່ໃໝ່ ໃນການສ້າງການຮ່ວມມືຮອບດ້ານ ແລະ ນຳໄປສູ່ຂອບເຂດໃໝ່. ຂ້າພະເຈົ້າ ເຊື່ອໝັ້ນວ່າ: ດ້ວຍຄວາມພະຍາຍາມຮ່ວມກັນ ພວກເຮົາຈະສາມາດບັນລຸຜົນສຳເລັດທີ່ສຳຄັນໃນທຸກຂົງເຂດ ເພື່ອຜົນປະໂຫຍດຂອງປະເທດ ແລະ ປະຊາຊົນຂອງພວກເຮົາ ກໍຄືເພື່ອຜົນປະໂຫຍດໃນການຄໍ້າປະກັນ ສັນຕິພາບ, ຄວາມໝັ້ນຄົງ ແລະ ສະຖຽນລະພາບ ໃນພາກພື້ນອາຊີ-ປາຊີຟິກ