ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

61 ມື້ແລ້ວ ບໍ່ມີຜູ້ຕິດເຊື້ອໂຄວິດ-19 ເພີ່ມຂຶ້ນໃໝ່

ດຣ. ສີສະຫວາດ ສຸດທານີລະໄຊ, ຮອງຫົວໜ້າ ກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ຖະແຫຼງຂ່າວຕໍ່ສື່ມວນຊົນລາວ ໃນຕອນເຊົ້າຂອງວັນທີ 12 ມິຖຸນາ 2020 ນີ້ວ່າ: ພວກເຮົາຕີລາຄາວ່າສະພາບການລະບາດຢູ່ປະເທດເຮົາ ແລະ ປະເທດທີ່ມີຊາຍແດນຕິດຈອດກັບ ສ​ປ​ປ ລາວ ແມ່ນຜ່ອນຄາຍລົງຫຼາຍແລ້ວ. ສະເພາະຢູ່ ສປປ ລາວ 61 ມື້ແລ້ວ ບໍ່ມີຜູ້ຕິດເຊື້ອໃໝ່, ຜູ້ຕິດເຊື້ອສະສົມ 19 ຄົນ ແມ່ນປິ່ນປົວຫາຍດີ ແລະ ອອກໂຮງໝໍ ໝົດທຸກຄົນແລ້ວ.

ຜົນສຳເລັດໃນຄັ້ງນີ້ ຍ້ອນມີການຊີ້ນຳ, ນຳພາທີ່ດີຂອງການນຳຂັ້ນສູງພັກ-ລັດ ກໍ່ຄືອຳນາດການປົກຄອງທຸກຂັ້ນ, ຍ້ອນມີການຮ່ວມແຮງຮ່ວມໃຈຈາກພໍ່ແມ່ປະຊາຊົນບັນດາເຜົ່າ,ມີການສະໜັບສະໜູນຈາກບັນ​ດາ​ປະ​ເທດເພື່ອນມິດ, ອົງການຈັດຕັ້ງສາກົນ, ຄູ່ຮ່ວມພັດທະນາ, ພາກທຸລະກິດ ແລະ ອົງການຈັດຕັ້ງທາງສັງຄົມທຸກພາກສ່ວນ ເຊິ່ງຈະເປັນບົດຮຽນອັນສຳຄັນໃຫ້ແກ່ພວກເຮົາໃນການກຳນົດນະໂຍບາຍ, ແຜນປະຕິບັດງານ ໃນຕໍ່ ໜ້າ ເພື່ອສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ກໍ່ຄືພະຍາດຕິດຕໍ່ອື່ນໆ ເຊັ່ນ: ພະຍາດໄຂ້ຍຸງລາຍ, ພະຍາດໝາກແດງ.

ຂໍແກ້ຂ່າວ ພະຍາດໄຂ້ຍຸງລາຍ ສຳລັບວານນີ້ ມາຮອດປະຈຸບັນ ພະຍາດໄຂ້ຍຸງລາຍມີຜູ້ຕິດເຊື້ອທັງໝົດ 1,733 ຄົນ (ມີລາຍງານກໍລະນີໃນ 17 ແຂວງ ຍົກເວັ້ນ ແຂວງຊຽງຂວາງ, ໃນນັ້ນ ແຂວງທີ່ມີການລາຍງານຫຼາຍກວ່າໝູ່ແມ່ນ ນະຄອນຫຼວງວຽງຈັນ ເຊິ່ງມີເຖິງ 403 ຄົນ). ຈຳນວນຜູ້ ເສຍຊີວິດຍ້ອນພະຍາດໄຂ້ຍຸງລາຍມີ ທັງ ໝົດ 05 ຄົນ (ນະຄອນຫຼວງ 02 ຄົນ, ບໍລິຄຳໄຊ 01 ຄົນ, ຄຳມ່ວນ 01 ຄົນ ແລະ ໄຊຍະບູລີ 01 ຄົນ) ບໍ່ແມ່ນ 06 ຄົນ ທີ່ບາງ ສື່ໄດ້ຖະແຫຼງຂ່າວອອກວານນີ້, ເນື່ອງຈາກວ່າ ມີການເຂົ້າໃຈຜິດ ກໍລະນີແຂວງບໍລິຄຳໄຊ ແລະ ໂຮງໝໍ 103, ໝາຍຄວາມວ່າ ແມ່ນຄົນຜູ້ດຽວກັນ ມາແຕ່ແຂວງບໍລິຄຳໄຊ ມາປິ່ນປົວຢູ່ໂຮງໝໍ 103 ແລະ ເສຍຊີວິດຢູ່ນະຄອນຫຼວງວຽງຈັນ ເລີຍໄດ້ນັບເຂົ້າເປັນບັນຊີລາຍຊື່ຂອງ

ນະຄອນຫຼວງວຽງຈັນ.

ໄຂ້ຍຸງລາຍສາມາດປ້ອງກັນໄດ້ ໂດຍການປະຕິບັດ 5 ປ:

  • ປິດ​ຝາ​ພາຊະນະ​ທີ່​ເກັບ​ນ້ຳ​ໃນເຮືອນ ແລະ ນອກ​ເຮືອນ ເພື່ອ​ບໍ່ໃຫ້​ຍຸງ​ມາ​ໄຂ່​ໃສ່;
  • ປ່ຽນ​ນ້ຳ​ໃນ​ພາຊະນະ ເຊັ່ນ: ເຕົ້າ​ດອກ​ໄມ້ ນ້ຳຮອງ​ຕີນ​ຕູ້ ຖ້ານ​ຮອງ​ຈອກ​ນ້ຳ;
  • ປ່ອຍ​ປາ​ຫາງ​ນົກ​ຍຸງເພື່ອ​ກິນໜອນ​ນ້ຳ;
  • ປັບປຸງ​ການ​ອະນາໄມ ສິ່ງແວດລ້ອມ​ອ້ອມ​ເຮືອນ​ບໍ່​ໃຫ້​ມີກະໂປະກະ​ປ໋ອງ ຢາງ​ຕີນລົດ​ເກົ່າທີ່​ມີ​ນ້ຳ​ຂັງ;
  • ປະຕິບັດ​ໃຫ້​ເປັນ​ນິໄສປະຈຳ​ທຸກໆ​ອາທິດ;
  • ຖ້າ​ເປັນໄຂ້ໃຫ້​ໄປ​ພົບ​ແພດ​ໝໍ​ດ່ວນ ຖ້າ​ຫາກທຸກ​ຄົນ​ປະຕິບັດ​ໄດ້​ຕາມ 5 ປ ຢ່າງເຂັ້ມ​ງວດ​ກໍ່​ຈະ​ສາມາດ​ຫຼຸດຜ່ອນ, ປ້ອງ​ກັນ​ການ​ເຈັບຈາກເປັນ ແລະ ​ສະກັດກັ້ນ​ການ​ແຜ່ລະບາດຂອງ​ເຊື້ອ​ພະຍາດໄຂ້ຍຸງ​ໃຫ້ຫລຸດ​ລົງ​ເທື່ອ​ລະ​ກ້າວ.