ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

7 ຄົນທີ່ສູນຫາຍຍ້ອນນ້ຳໄຫລຊຸຢູ່ເມືອງວຽງໄຊຍັງບໍ່ທັນຄົ້ນພົບເທື່ອ

ມາຮອດວັນທີ 12 ສິງຫາ 2019, ອົງການປົກຄອງເມືອງ ວຽງໄຊ, ແຂວງ ຫົວພັນ ກໍ່ຍັງບໍ່ທັນສາມາດຄົ້ນພົບປະຊາຊົນຈຳນວນ 7 ຄົນຈາກ 2 ຄອບຄົວຢູ່ບ້ານ ຫີນດໍາ ທີ່ສູນຫາຍຈາກເຫດນ້ຳໄຫລຊຸ ຍ້ອນຝົນຕົກໜັກ ເນື່ອງຈາກອິດທິພົນຂອງພະຍຸວິພາ ພັດຜ່ານໃນລະຫວ່າງວັນທີ 2-3 ສິງຫາຜ່ານມານີ້; ແຕ່ທາງອົງການປົກຄອງເມືອງ ຢັ້ງຢືນວ່າຈະສືບຕໍ່ລະດົມທຸກພາກສ່ວນໃຫ້ມີສ່ວນຮ່ວມຄົ້ນຫາຜູ້ສູນຫາຍຈົນກ່ວາຈະພົບ. 
ທ່ານ ພອນສຸກ ອິນທະວົງ, ເຈົ້າເມືອງໆ ວຽງໄຊ ໃຫ້ສໍາພາດວ່າ: ນັບແຕ່ມື້ເກີດເຫດເປັນຕົ້ນມາ, ທາງອົງການປົກຄອງເມືອງຮ່ວມກັບອົງການປົກຄອງແຂວງໄດ້ແຕ່ງຕັ້ງທີມງານລົງຊອກຄົ້ນຫາຜູ້ສູນຫາຍຢ່າງຕໍ່ເນື່ອງ ຈົນມາຮອດວັນທີ 9 ສິງຫາ ຈຶ່ງໄດ້ປຸກລະດົມຫລາຍພາກສ່ວນ, ບວກກັບກອງຮ້ອຍທະຫານຊາຍແດນ 215 ດໍາເນີນການຄົ້ນຫາຄັ້ງໃຫຍ່ ໂດຍມີກໍາລັງທັງໝົດປະມານ 200 ກ່ວາຄົນ ລົງຊອກຄົ້ນນັບແຕ່ຈຸດເກີດເຫດຢູ່ບ້ານຫີນດໍາແລວນ້ຳງາ ຫາ ຊາຍແດນຫວຽດນາມ, ໄລຍະທາງປະມານ 7 ກິໂລແມັດ ຢ່າງລະອຽດສົມຄວນ, ດ້ວຍການນຳໃຊ້ໄມ້ແຫລມ ແລະ ອຸປະກອນອື່ນໆ ເຂົ້າໃນການຊອກຄົ້ນ ແຕ່ກໍ່ຍັງບໍ່ທັນພົບເຫັນເທື່ອ. 


ເຈົ້າເມືອງໆວຽງໄຊ ກ່າວຕື່ມວ່າ: ປັດຈຸບັນ ເຫລືອພຽງຈຸດດຽວທີ່ສົງໃສວ່າຈະມີຜູ້ສູນຫາຍຕິດຄ້າງຢູ່ ຊຶ່ງຢູ່ຫ່າງຈາກຈຸດເກີດເຫດປະມານ 1 ກິໂລແມັດ, ເປັນເຂດທົ່ງນາມີເນື້ອທີ່ນາ ປະມານ 1 ໄລ່, ບາງຈຸດມີນ້ຳເວີນເລິກປະມານ 1 ຫາ 2 ແມັດ, ບາງຈຸດກໍ່ມີຕົມ ແລະ ຊາຍໄຫຼຊຸມາກອງທັບຖົມຢູ່ສູງສົມຄວນ, ເຮັດໃຫ້ການຊອກຄົ້ນດ້ວຍກຳລັງຄົນບໍ່ສາມາດໄດ້ຮັບຜົນ. ປັດຈຸບັນ, ແມ່ນກຳລັງຄົ້ນຄ້ວາຫາວິທີນຳໃຊ້ກົນຈັກເຂົ້າໄປເພື່ອຊ່ວຍສະໜັບສະໜູນການຊອກຄົ້ນຢູ່. ນອກຈາກນີ້, ອົງການປົກຄອງເມືອງໆວຽງໄຊ ຈະສົມທົບກັບ ອົງການເມືອງກອນເຊິນ, ແຂວງ ແທັງຮວາ ຂອງຫວຽດນາມ ເພື່ອຊອກຫາຜູ້ສູນຫາຍຊ່ວຍກັນ ເພາະບາງເທື່ອ, ອາດເປັນໄປໄດ້ທີ່ຜູ້ສູນຫາຍຈະຖືກນ້ຳໄຫລຊຸໄປເຖິງພື້ນທີ່ຂອງເມືອງ ກອນເຊິນ ທີ່ມີຊາຍແດນຕິດຈອດກັບເມືອງ ວຽງໄຊ, ຈົນກ່ວາຈະພົບເຫັນຜູ້ສູນຫາຍທັງໝົດ.


ໂດຍ: ບຸນຕຽງ ຈັນທະວົງ