(23.9.24) ອີງຕາມການລາຍງານຂອງສື່ທ້ອງຖິ່ນແຂວງຫົວພັນ ໃຫ້ຮູ້ວ່າ: ລະຫວ່າງວັນທີ 21-22 ກັນຍາ 2024 ນີ້, ສະພາບຝົນຕົກໜັກຕິດຕໍ່ກັນຫຼາຍຊົ່ວໂມງ, ເຮັດໃຫ້ນໍ້າຫຼາຍສາຍນອງຂຶ້ນຢ່າງກະທັນຫັນ, ເຮັດໃຫ້ຖ້ວມເຮືອນຊານ, ຖະໜົນ ຫົນທາງ, ໄຮ່ນາ ແລະ ຮົ້ວສວນຂອງປະຊາຊົນໃນຂອບເຂດເທດສະບານເມືອງຊໍາເໜືອ.
ບ້ານທີ່ໄດ້ຮັບຜົນກະທົບຫຼາຍກວ່າໝູ່ປະກອບມີ: ບ້ານນາລີວ, ບ້ານນາສະກາງ, ບ້ານມີສຸກ, ບ້ານນາທົ່ງຈອງ, ບ້ານຊໍາ ເໜືອ, ບ້ານນາໜອງບົດ ແລະ ບ້ານປຸ່ງ. ສໍາລັບຜົນເສຍຫາຍຄະນະຮັບຜິດຊອບກໍາລັງເກັບກໍາຂໍ້ມູນຢູ່.
ຕໍ່ກັບສະພາບການດັ່ງກ່າວຂໍໃຫ້ທຸກຄົນຈົ່ງມີສະຕິລະມັດລະວັງ, ໂດຍສະເພາະຜູ້ທີ່ຢູ່ເຂດຕໍ່າ, ໃກ້ກັບແມ່ນໍ້າ, ຮ່ອມພູ, ຮ່ອມຜາ, ຈົ່ງກຽມພ້ອມຮັບມືກັບສະພາບການດັ່ງກ່າວໃຫ້ທັນກັບສະພາບການ. ຖ້າຫາກປະຊາຊົນມີຄວາມຕ້ອງການຄວາມຊ່ວຍເຫຼືອສາມາດຕິດຫາຄະນະຮັບຜິດຊອບຕ້ານໄພພິບັດຂັ້ນເມືອງ, ຂັ້ນແຂວງ ເພື່ອນໍາກໍາລັງມາຊ່ວຍໄດ້ຕະຫຼອດເວລາ ໂທ: 020 55524887, 020 55765892
