ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

7 ບໍລິສັດ ສົນໃຈຜະລິດຜ້າອັດປາກ-ດັງ ຢູ່ ສປປ ລາວ

ໃນໂອກາດເຂົ້າຮ່ວມຖະແຫຼງຂ່າວກັບຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ຫຼື ໂຄວິດ-19 (COVID-19) ປະຈໍາມື້ນີ້ວັນທີ 10 ເມສາ 2020, ທ່ານ ສົມຈິດ ອິນທະມິດ, ຮອງລັດຖະມົນຕີກະຊວງ ອຸດສາຫະກໍາ ແລະ ການຄ້າ ໃຫ້ຮູ້ວ່າ: ປະຈຸບັນນີ້ ມີ 7 ບໍລິສັດທັງພາຍໃນ ແລະ ຕ່າງປະເທດແມ່ນສະແດງຄວາມສົນໃຈຢາກຜະລິດຜ້າອັດປາກ-ດັງຢູ່ລາວ ຄື: ກຸ່ມບໍລິສັດ ດວງຈະເລີນ, ເອພີ, ໂມດີໂອ, ລາວທາພາ, ໄອໂຊລອຍ, ແພດດາວັນ ແລະ ບໍລິສັດຜະລິດອຸປະກອນການແພດນານາຊິນ, ໂດຍຄາດວ່າຈະສາມາດຜະລິດຜ້າອັດປາກ-ດັງລວມກັນໄດ້ປະມານ 6.400.000 ອັນຕໍ່ວັນ. ມາຮອດຕອນນີ້, ມີ 3-4 ບໍລິສັດທີ່ກໍາລັງຕິດຕັ້ງເຄື່ອງຈັກຢູ່ ເພື່ອໃຫ້ທັນທົດລອງການຜະລິດໃນທ້າຍເດືອນ ເມສາ 2020 ນີ້.

ທ່ານ ສົມຈິດ ອິນທະມິດ ໃຫ້ຮູ້ຕື່ມວ່າ: ປັດຈຸບັນ, ກະຊວງອຸດສະຫະກຳ ແລະ ການຄ້າ ພວມເລັ່ງໃຫ້ກະຊວງ ສາທາລະນະສຸກ ອອກຢັ້ງຢືນຄຸນນະພາບໃຫ້ ແລະ ຄະນະຮັບຜິດຊອບກໍ່ໄດ້ໃຫ້ການສະໜັບສະໜູນຊ່ວຍເຫລືອບັນດາ ບໍລິສັດເຫຼົ່ານີ້ ຫລາຍຢ່າງ, ໃນນັ້ນ ລວມເຖີງການສໍາຫຼວດຜົນກະທົບຂອງໂຮງງານຜະລິດທີ່ມີຕໍ່ສິ່ງແວດລ້ອມ ຊຶ່ງຈະໄດ້ດຳເນີນການຕາມພາຍຫລັງ ເພື່ອໃຫ້ບໍລິສັດສາມາດດໍາເນີນການຜະລິດອອກມາຮັບໃຊ້ສັງຄົມໃຫ້ທັນກັບຄວາມຕ້ອງການຕົວຈິງຂອງສັງຄົມ ກໍ່ຄື ໃນສະພາບທີ່ເຊື້ອພະຍາດໂຄວິດ-19 ພວມແຜ່ລະບາດຢ່າງໜ້າເປັນຫ່ວງຢູ່ໃນປັດຈຸບັນນີ້.

ໂດຍ: ມົດແດງນ້ອຍ