ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 7 ພຶດສະພາ 2024 ປວງຊົນລາວ, ຫວຽດນາມ ແລະກໍາປູເຈຍ ຈະໄດ້ສະຫລອງວັນໄຊຊະນະບັ້ນຮົບດຽນບຽນຟູຄົບຮອບ 70 ປີແລ້ວ ນັ້ນແມ່ນໝາກຜົນແຫ່ງການຕໍ່ສູ້ເສຍສະຫລະ ບໍ່ຍອມຈໍານົນ ຂອງປະຊາຊົນສາມຊາດອິນດູຈີນ , ປີ 1953 ການຕໍ່ສູ້ຂອງປະຊາຊົນສາມຊາດ ຕ້ານພວກລ່າເມືອງຂຶ້ນແບບເກົ່າ ໄດ້ກ້າວເຂົ້າສູ່ປີທີ 8, ກຳລັງປະຕິວັດ ຍິ່ງຕີກໍ່ຍິ່ງເຂັ້ມແຂງ ແລະ ຍິ່ງຍາດເອົາທ່າເປັນເຈົ້າການ, ກຳລັງປະກອບອາວຸດໄດ້ເຕີບໃຫຍ່ທາງດ້ານຈຳນວນ ແລະ ຄຸນນະພາບ; ຄວາມສາມັກຄີຮ່ວມສຳພັນສູ້ຮົບລະຫວ່າງ 3 ຊາດອິນດູຈີນ ມີຄວາມແໜ້ນແຟ້ນຍິ່ງຂຶ້ນ, ຈາກບັນດາໄຊຊະນະອັນຍິ່ງໃຫຍ່ ໃນທົ່ວສະໜາມຮົບໃນສາມປະເທດອິນດູຈີນ ລາວ – ຫວຽດນາມ ແລະ ກຳປູເຈຍ ໄດ້ບັງຄັບໃຫ້ພວກສັດຕູຕົກຢູ່ໃນທ່າຮັບຈົນຕາແຈ ແລະ ນັບມື້ນັບອ່ອນເພຍ.
ຢູ່ຫວຽດນາມ ແມ່ນໄລຍະທີ່ປະຊາຊົນຫວຽດນາມຕໍ່ສູ້ຕ້ານກັບພວກລ່າເມືອງຂຶ້ນແບບເກົ່າດ້ວຍຄວາມຕັດສິນໃຈທີ່ວ່າ: “ຍອມເສຍສະຫຼະຊີວິດເພື່ອປະເທດຊາດ”. ບັນດາກໍາລັງປະກອບອາວຸດຂອງຫວຽດນາມ ຍາດໄດ້ໄຊຊະນະຢ່າງຕໍ່ເນື່ອງໃນທຸກສະໜາມຮົບ, ເລີ່ມຈາກບັ້ນຮົບດັບສູນກຳລັງຂອງສັດຕູ 2 ໝື່ນຄົນທີ່ບຸກເຂົ້າເຂດທີ່ໝັ້ນຫວຽດບັກ (1947 ) ກ້າວໄປເຖິງໄຊຊະນະບັ້ນຮົບຊາຍແດນ (1950), ບັ້ນຮົບຮວ່າບິງ (1951), ບັ້ນຮົບໄຕບັກ ( 1952 ) ແລະ ບັ້ນຮົບພາກເໜືອລາວ (1953 ).ໄຊຊະນະດັ່ງກ່າວໄດ້ສ້າງທ່າ ແລະ ກຳລັງແຮງອັນໃໝ່ໃຫ້ແກ່ການເຕີບໃຫຍ່ຂະຫຍາຍຕົວດ້ວຍຈຳນວນ ແລະ ຄຸນນະພາບ ຂອງກອງທັບ ແລະ ປະຊາຊົນຫວຽດນາມ ເປັນເຈົ້າການໃນການບຸກໂຈມຕີສັດຕູຢູ່ທຸກໆສະໜາມຮົບເຮັດໃຫ້ສັດຕູຕົກຢູ່ໃນທ່າຮັບ, ໃນໄລຍະດຽວກັນນັ້ນ ພວກລ່າເມືອງຂຶ້ນພວມຖືກປະລາໄຊທາງດ້ານການທະຫານ, ປະສົບກັບວິກິດການດ້ານການເມືອງ ແລະ ເສດຖະກິດຢ່າງໜັກໜ່ວງ ເຖິງວ່າພວກເຂົາໄດ້ທຸ້ມເທກ້ອນທຶນອັນມະຫາສານໃຫ້ແກ່ສົງຄາມຮຸກຮານເຖິງ 3.000 ຕື້ຝຣັ່ງ, ປ່ຽນຜູ້ສຳເລັດລາຊະການສູງສຸດ 5 ເທື່ອ, ປ່ຽນຜູ້ບັນຊາການທະຫານສູງສຸດຢູ່ອິນດູຈີນ 7 ເທື່ອ, ປ່ຽນລັດຖະບານຝຣັ່ງເຖິງ 19 ຊຸດ ແຕ່ກໍ່ບໍ່ສາມາດເຮັດໃຫ້ສະພາບການ ໃນອິນດູຈີນຫັນປ່ຽນໄປໃນທາງທີ່ເປັນຜົນດີໃຫ້ພວກເຂົາໄດ້.
ໄຊຊະນະດຽນບຽນຟູ ບໍ່ພຽງແຕ່ແມ່ນໄຊຊະນະຂອງປະຊາຊົນຫວຽດນາມ ແຕ່ຍັງແມ່ນໄຊຊະນະຂອງປະຊາຊົນລາວ ແລະ ປະຊາຊົນກຳປູເຈຍ ທີ່ໄດ້ຮ່ວມສຳພັນສູ້ຮົບ, ຮ່ວມຄຸ້ມຄອງຕ້ານກັບສັດຕູໂຕດຽວກັນເພື່ອປົດປ່ອຍຕົນເອງ, ໄຊຊະນະດັ່ງກ່າວໄດ້ດັບມອດເຈດຈຳນົງ ແລະ ການຮຸກຮານຂອງລັດທິລ່າເມືອງຂຶ້ນແບບເກົ່າ, ບັງຄັບໃຫ້ລັດຖະບານຝຣັ່ງຈຳຕ້ອງຍອມເຊັນສັນຍາເຊີແນວກ່ຽວກັບອິນດູຈີນ, ຮັບຮູ້ຄວາມເປັນເອກະລາດແຫ່ງຊາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຫວຽດນາມ, ລາວ ແລະ ກຳປູເຈຍ.