ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

73 ມື້ຜ່ານມາ ສປປ ລາວ ບໍ່ພົບຜູ້ຕິດພະຍາດໂຄວິດ19ໃໝ່

ດຣ.ຣັດສະໝີ ວົງຄໍາຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຄະນະສະເພາະກິດຄວບຄຸມ ໂຄວິດ19 ຖະແຫລງຕໍ່ສື່ມວນຊົນເຖິງສະພາບການເຝົ້າລະວັງ COVID-19 ຢູ່ ສປປ ລາວວ່າ:  ຮອດ 17 ໂມງ ວັນທີ 23 ມິຖຸນາ 2020  ມີຜູ້ເດີນທາງເຂົ້າມາລາວທັງໝົດ 1,842 ຄົນ, ໃນນັ້ນຜ່ານດ່ານລາວ-ໄທ 1,300 ຄົນ ຜ່ານດ່ານລາວ – ຈີນ 39 ຄົນ, ຜ່ານດ່ານລາວ – ຫວຽດນາມ 530 ຄົນ, ທຸກຄົນແມ່ນໄດ້ແທກອຸນຫະພູມຮ່າງກາຍ, ແລະ ໄດ້ເກັບຕົວຢ່າງມາກວດ ແລ້ວນຳສົ່ງໄປ​ຫາສະຖານທີ່ ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ຮອງຫົວໜ້າກົມຄວບຄຸມພະຍາດຕິດຕໍ່ ໃຫ້ຮູ້ເຖິງວຽກງານເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດວ່າ: ວັນທີ 23 ມິຖຸນາ 2020, ໄດ້ເກັບຕົວຢ່າງມາກວດວິເຄາະທັງໝົດ 304 ຄົນ .ມີ ແຮງງານລາວກັບມາແຕ່ໄທ 220 ຄົນ, ແຮງງານລາວມາແຕ່ຈີນ 7 ຄົນ, ແຮງງານຫວຽດນາມ 1 ຄົນ, ບຸກຄົນທົ່ວໄປ 76 ຄົນ, ຜົນກວດທັງໝົດແມ່ນ ບໍ່ພົບເຊື້ອ.

ສັງລວມການກວດວິເຄາະ ແລະກວດຫາເຊື້ອ ແຕ່ເດືອນມັງກອນ ຮອດ ວັນທີ 23 ມິຖຸນາ 2020 ໄດ້ເກັບຕົວຢ່າງມາກວດທັງໝົດ 13,507 ຕົວຢ່າງ, ກວດພົບເຊື້ອສະສົມ 19 ຄົນທີ່ປິ່ນປົວດີແລ້ວ (73 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).

ປະຈຸບັນ, ທົ່ວປະເທດ ມີສູນຈໍາກັດບໍລິເວນຜູ້ເດີນທາງເຂົ້າມາລາວທັງໝົດ 91 ສູນ, ມີຜູ້ຈຳກັດບໍລິເວນຢູ່ສູນ 2,828 ຄົນ, ແຕ່ລະຄົນໄດ້ເກັບຕົວຢ່າງມາກວດວິເຄາະຫາເຊື້ອ ແຕ່ບໍ່ພົບຜູ້ຕິດເຊື້ອໃໝ່.

ເຖິງວ່າປະເທດຂອງພວກເຮົາຈະບໍ່ມີລາຍງານການລະບາດຂອງເຊື້ອພະຍາດໂຄວິດ19 ມາໄດ້73 ມື້ແລ້ວກໍຕາມ ຂໍໃຫ້ທ່ານຕິດຕາມຂ່າວ ຈາກພາກປົກກະຕິຂອງໂທລະພາບ, ວິທະຍຸກະຈາຍສຽງ, ໜັງສືພິມ ແລະ ສື່ຕ່າງໆ. ລາຍລະອຽດຂອງຄຳແນະນຳ, ຂໍ້ມູນທີ່ເປັນທາງການໄດ້ຈາກເວັບໄຊ້ www.covid19.gov.la ແລະ ເຟດບຸກຂອງສູນສື່​ສານ​ເພື່ອ​ສຸ​ຂະ​ພາບ ແລະ ສຸຂະສຶກສາ.