ທ່ານ ນາງ ສີພະຈັນ ນັນທະວົງສາ ກຳມະການປະຈຳພັກ, ປະ ທານກວດກາພັກ-ລັດ, ຮອງປະທານ ສູນການແຮງລາວສ້າງຊາດ (ສນຊ) ໄດ້ໃຫ້ສໍາພາດ ໃນໂອກາດວັນສ້າງຕັ້ງສູນກາງແນວລາວສ້າງຊາດ ຄົບຮອບ 74 ປີ (13 ສິງຫາ 1950-13 ສິງຫາ 2024) ກ່ຽວກັບການກຳເນີດ, ເຕີບໃຫຍ່ຂະຫຍາຍຕົວຕະ ຫລອດໄລຍະ 74 ປີຜ່ານມາຂອງແນວລາວສ້າງຊາດ ເຊິ່ງສູນກາງແນວລາວສ້າງຊາດ ສາມາດເປີດກວ້າງແນວໂຮມແຫ່ງຊາດ ຢ່າງກວ້າງຂວາງໃນທົ່ວປະເທດ, ທັງຮ່ວມສຳພັນສູ້ຮົບກັບຫວຽດ ນາມ ແລະ ກຳປູ ເຈຍ, ຍາດແຍ່ງການຊ່ວຍເຫລືອສະໜັບສະໜູນຈາກສາກົນ ເປັນຕົ້ນ ບັນດາປະເທດສັງຄົມນິຍົມ. ພ້ອມນີ້, ຍັງດຳເນີນການຕໍ່ສູ້ຕ້ານລັດທິລ່າເມືອງຂຶ້ນແບບໃໝ່ ແລະ ລູກແຫລ່ງຕີນມືຂອງພວກເຂົາ, ທັງຮ່ວມສຳພັນກັບກຳລັງເປັນກາງຮັກຊາດ, ທັງຕໍ່ສູ້ດ້ວຍອາວຸດ ສົມທົບກັບການຕໍ່ສູ້ດ້ວຍການ ເມືອງ, ກົດໝາຍ ແລະ ການຕ່າງປະເທດ, ທັງຕໍ່ສູ້ປິດລັບສົມທົບກັບການຕໍ່ສູ້ເປີດເຜີຍ, ທັງຕໍ່ສູ້ທັງເຈ ລະຈາ ແລະ ລວມລາວເຖິງ 3 ຄັ້ງ, ຕີຊະນະສັດຕູເທື່ອລະກ້າວ, ເທື່ອລະບັ້ນຮົບ ກ້າວຂຶ້ນຍາດເອົາໄຊຊະນະຢ່າງສົມບູນດ້ວຍການໂຄ້ນລົ້ມອຳນາດການປົກຄອງລ່າເມືອງຂຶ້ນແບບໃໝ່ ແລະ ລະບອບສັກດີນາຢ່າງສິ້ນເຊີງ ແລະ ສະ ຖາປະນາ ສປປ ລາວ ຂຶ້ນໃນວັນທີ2 ທັນວາ 1975, ພາປະເທດຊາດກ້າວເດີນຕາມເສັ້ນທາງສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນະຖາວອນ. ໃນໄລຍະໃໝ່ນີ້, ແນວລາວສ້າງຊາດ ບໍ່ໄດ້ເຮັດພາລະບົດບາດນຳພາ ແລະ ຄຸ້ມຄອງລັດຄືໃນໄລຍະກ່ອນ, ແຕ່ແນວລາວສ້າງຊາດ ຍັງມີພາລະບົດບາດສຳຄັນຍິ່ງ ໃນຖານະເປັນອົງການສຳພັນທາງການເມືອງຂອງລະບອບປະຊາທິປະໄຕ ປະຊາຊົນ, ເປັນບ່ອນເຕົ້າໂຮມຄວາມສາມັກຄີທົ່ວປວງຊົນ ແລະ ສຶກສາອົບ ຮົມປະຊາຊົນບັນດາເຜົ່າ, ຊັ້ນຄົນ, ສາສະໜາ ລວມທັງຄົນເຊື້ອຊາດລາວຢູ່ຕ່າງປະເທດ ເພື່ອປະກອບ ສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ຕະຫລອໄລຍະແຫ່ງການເຄື່ອນໄຫວຂອງ ແນວລາວສ້າງຊາດ 74 ປີທີ່ຜ່ານມາ, ມັນຍິ່ງຮຽກ ຮ້ອງໃຫ້ພວກເຮົາຈົ່ງພ້ອມ ກັນສືບຕໍ່ເສີມຂະຫຍາຍມູນເຊື້ອດັ່ງກ່າວ ເປັນຕົ້ນ ເພີ່ມທະວີກ້ອນກໍາລັງມະ ຫາສາມັກຄີຢ່າງແໜ້ນແຟ້ນກວ່າເກົ່າ ບົນພື້ນຖານຄວາມເປັນເອກະພາບໃນອຸດົມການ ແຫ່ງການສ້າງປະເທດຊາດ ໃຫ້ຮັ່ງມີເຂັ້ມແຂງ, ປະຊາຊົນຮັ່ງມີຜາສຸກ ແລະ ສັງຄົມມີປະຊາ ທິປະໄຕ, ສີວິໄລ ແລະ ຍຸຕິທໍາ; ຖືຄວາມສາມັກຄີເປັນອັນໜຶ່ງອັນດຽວຂອງທົ່ວປວງຊົນ ເພາະຄວາມສາມັກຄີເປັນໝາກຫົວໃຈໃນການຕັດສິນການຄົງຕົວ ແລະ ຂະຫຍາຍຕົວ ຂອງຊາດ; ສືບຕໍ່ປຸກລະດົມກໍາລັງແຮງຂອງປະຊາຊົນບັນດາເຜົ່າ, ທຸກຊັ້ນຄົນ, ສາສະໜາ ແລະ ເພດ-ໄວເຂົ້າຮ່ວມ ແລະ ປະກອບສ່ວນເຂົ້າໃນທຸກຂະບວນການທີ່ສໍາຂອງຊາດຢ່າງຫ້າວຫັນ; ໂຄສະນາ, ສຶກສາອົບ ຮົມ, ປຸກລະດົມເສີມຂະຫຍາຍສິດເປັນເຈົ້າຂອງປະຊາຊົນບັນດາເຜົ່າໃນການປະຕິບັດແນວທາງ, ນະໂຍບາຍ, ລັດຖະທໍາມະນູນ, ກົດໝາຍ ແລະ ແຜນພັດທະນາເສດຖະກິດ-ສັງຄົມແຫ່ງຊາດແຕ່ລະໄລຍະ.
ທ່ານ ນາງ ສີພະຈັນ ນັນທະວົງສາ ຍັງໃຫ້ຮູ້ອີກວ່າ: ນັບແຕ່ປີ 2020-2030 ເປັນໄລຍະເວລາທີ່ສໍາຄັນທີ່ສຸດຂອງພັກ, ລັດ, ແນວລາວສ້າງຊາດ ແລະ ປະຊາຊົນລາວບັນດາເຜົ່າ ຊຶ່ງມີທັງຂໍ້ສະດວກ ແລະ ສິ່ງທ້າທາຍທົດສອບໃຫຍ່ຫລວງ ເລັ່ງທວງໃຫ້ພວກເຮົາຕ້ອງບາກບັ່ນບຸກບືນຜ່ານຜ່າພາປະເທດຊາດຫລຸດພົ້ນອອກຈາກສະພາວະດ້ອຍພັດທະນາ, ສ້າງບາດລ້ຽວໃໝ່ໃນການພັດທະນາປະເທດຕາມທິດຍືນຍົງ ແລະ ສີຂຽວ, ກ້າວຂຶ້ນສູ່ຈຸດໝາຍສັງຄົມນິຍົມຢ່າງໜັກແໜ້ນ. ດ້ວຍເຫດນັ້ນ, ມັນຮຽກ ຮ້ອງໃຫ້ແນວລາວສ້າງຊາດ ຕ້ອງໄດ້ສືບຕໍ່ເສີມຂະຫຍາຍມູນເຊື້ອອັນສະຫງ່າອົງອາດຂອງຕົນ ໃຫ້ແຂງ ແຮງກວ່າເກົ່າ, ຈັດຕັ້ງຜັນ ຂະຫຍາຍ 9 ຂໍ້ແຂ່ງຂັນ, 4 ການຫັນປ່ຽນໃໝ່ ແລະ 4 ເສີມສ້າງຂອງວຽກງານແນວໂຮມໃຫ້ໜັກແໜ້ນ, ເຂັ້ມແຂງ, ເຄື່ອນໄຫວມີປະສິດທິພາບ, ປະສິດທິຜົນ; ສືບຕໍ່ສ້າງ, ປັບປຸງ ແລະ ເພີ່ມທະວີຄວາມສາມັກຄີປອງດອງທີ່ເປັນປຶກແຜ່ນຂອງທຸກຊົນເຜົ່າ, ຊັ້ນຄົນ, ສາສະໜາ ແລະ ເພດໄວຢູ່ພາຍໃນປະເທດ ແລະ ສືບຕໍ່ສົ່ງເສີມໃຫ້ພີ່ນ້ອງຊາວລາວ ທີ່ດຳລົງຊີວິດຢູ່ຕ່າງປະເທດ ມີສ່ວນຮ່ວມໃນພາລະກິດສ້າງສາປະເທດຊາດໃຫ້ຫລາຍຂຶ້ນ; ເສີມຂະຫຍາຍຢ່າງແຂງແຮງ ແລະ ເຕັມສ່ວນບົດບາດຂອງແນວລາວສ້າງຊາດເຂົ້າໃນການຕິດຕາມ, ກວດກາ, ໃຫ້ຄໍາປຶກສາການປະຕິບັດລັດຖະທຳມະນູນ ແລະ ກົດໝາຍຂອງບັນດາອົງການອຳນາດລັດຂັ້ນຕ່າງໆ. ຢາກເຮັດໄດ້ຄືແນວນັ້ນ, ອົງການແນວລາວສ້າງຊາດທຸກຂັ້ນ ຕ້ອງໄດ້ສືບຕໍ່ປັບປຸງຕົນເອງໃນທຸກດ້ານໃຫ້ໜັກແໜ້ນ, ເຂັ້ມແຂງ, ຍົກລະດັບຄວາມສາມາດໃນການປະຕິບັດພາລະບົດບາດ, ໜ້າທີ່ວຽກງານໃຫ້ໄດ້ຕາມທີ່ກົດໝາຍໄດ້ກຳນົດໄວ້.
ຂ່າວ: ສົມຫວັງ
