ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ພ້ອມດ້ວຍຄະນະ ໄດ້ເຄື່ອນໄຫວຍູ້ຊຸກຍູ້ວຽກງານການເງິນ ໂດຍສະເພາະແມ່ນການເກັບລາຍຮັບເຂົ້າງົບປະມານ ປະຈໍາປີ 2024 ຢູ່ດ່ານຊາຍແດນສາກົນວັງເຕົ່າ ເມືອງໂພນທອງ ແຂວງຈໍາປາສັກ ໃນວັນ 2 ກັນຍາ 2024.
ໃຫ້ກຽດຕ້ອນຮັບ ແລະ ຮ່ວມເຮັດວຽກ ໂດຍທ່ານ ພັນໂທ ສີຜາ ຂຸນພົນພັກດີ ຮັກສາການ ຫົວໜ້າຄະນະຄຸ້ມຄອງດ່ານຊາຍແດນສາກົນວັງເຕົ່າ, ມີທ່ານ ສຸກກະເສີມ ສີຫາວົງ ຫົວໜ້າພະແນກການເງິນແຂວງ, ຕະຫຼອດຮອດພະນັກງານວິຊາການທີ່ກ່ຽວຂ້ອງ ເຂົ້າຮ່ວມ.
ທ່ານ ພູຊ່ອງ ສົມຄິດ ຫົວໜ້າດ່ານພາສີສ່ກົນວັງເຕົ່າ ແລະ ທ່າບົກວັງເຕົ່າ ລາງານວ່າ: ຈັດຕັ້ງປະຕິບັດຈັດເກັບລາຍຮັບ ໃນ 8 ເດືອນ ປີ 2024 ໄດ້ທັງໝົດ 1,018 ຕື້ກີບ, ທຽບໃສ່ແຜນການປີປະຕິບັດໄດ້ 75,48%, ທຽບໃສ່ໄລຍະດຽວຂອງປີກ່ອນ ເພີ່ມຂຶ້ນ 29,68%. ຄາດຄະເນໝົດປີ ຈະຈັດເກັບລາຍຮັບ ໄດ້ 1.475 ຕື້ກີບ ເທົ່າກັບ 109,22%.
ທ່ານ ລັດຖະມົນຕີກະຊວງການເງິນ ກໍມີຄໍາເຫັນໂອ້ລົມ ໂດຍເນັ້ນໜັກໃຫ້ຄະນະ ພັກ-ຄະນະຄຸ້ມຄອງດ່ານຊາຍແດນສາກົນວັງເຕົ່າສືບຕໍ່ເອົາໃຈໃສ່ປະຕິບັດໜ້າທີ່ການເມືອງທີ່ໄດ້ຮັບມອບໝາຍໃຫ້ມີຜົນສໍາເລັດ, ມີການແບ່ງງານ, ແບ່ງຄວາມຮັບ ຜິດຊອບ ຢ່າງລະອຽດຈະແຈ້ງ, ມີການສະຫຼຸບ, ມີການກວດກາ, ຕີລາຄາປະເມີນຜົນການນໍາພາ - ຊີ້ນໍາ ຢ່າງເປັນປົກກະຕິ ແລະ ຕໍ່ເນື່ອງ.
ຂ່າວ-ພາບ: ທູນທອງໃຈ
