ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ກະຊວງແຜນການແລະການລົງທຶນ ແລະກະຊວງສຶກສາທິການ ໄດ້ຊີ້ແຈງຕໍ່ຂໍ້ຊັກຖາມຂອງສະມາຊິກສະພາແຫ່ງຊາດ

 ການດຳເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ 8 ໃນວັນທີ 20/10/2017, ທີ່ຫໍສະພາແຫ່ງຊາດຫລັກ 6 ນະຄອນຫລວງວຽງຈັນ ດຳເນີນໄປພາຍໃຕ້ການເປັນປະທານຂອງທ່ານ ນາງ ປານີ ຢາທໍຕູ້, ປະທານສະພາແຫ່ງຊາດ ຕອນເຊົ້າສະມາຊິກສະພາແຫ່ງຊາດໄດ້ປະກອບຄຳເຫັນຕໍ່ບົດລາຍງານຂອງອົງການກວດສອບແຫ່ງລັດ ແລະບົດລາຍງານຂອງອົງການກວດກາລັດຖະບານຢ່າງຟົດຟື້ນ ແລະມີຄວາມຮັບຜິດຊອບສູງ ຊື່ງໄດ້ຍົກໃຫ້ເຫັນບັນຫາພົ້ນເດັ່ນ ແລະ ຈຸດອ່ອນຂໍ້ຄົງຄ້າງທີ່ອົງການກວດສອບແລະອົງການກວດກາລັດຖະ ບານຕ້ອງໄດ້ປັບປຸງແກ້ໄຂ, ສະມາຊິກສະພາແຫ່ງຊາດຫລາຍທ່ານໄດ້ສະເໜີໃຫ້ສະພາແຫ່ງຊາດແລະລັດຖະບານເພີ່ມມາດຕະການຢ່າງຈິງຈັງຕໍ່ເປົ້າ ໜາຍ ການກະທຳຜິດ ຫລືຜູ້ລະເມີດລະບຽບກົດໝາຍພາຍຫລັງກວດພົບວ່າມີໂຄງການນອກແຜນເກີດຂື້ນ ເນື່ອງຈາກໄລ ຍະຜ່ານມາການ ຈັດຕັ້ງປະຕິບັດມາດຕະການຕໍ່ຜູ້ລະເມີດຍັງເຮັດບໍ່ທັນໄດ້ດີເທົ່າທີ່ຄວນ ເພື່ອຫລຸດຜ່ອນປະກົດການຫຍໍ້ທໍ້ໃນຂົງເຂດນີ້ໃຫ້ໜ້ອຍລົງ ແນໃສ່ເຮັດໃຫ້ສະພາບເສດຖະກິດຂອງປະເທດມີຄວາມຄ່ອງຄົວ ແລະໜັ້ນທ່ຽງ.

ສ່ວນຕອນບ່າຍວັນທີ 20/10/2017 ຕາງໜ້າລັດຖະບານໄດ້ຂຶ້ນຊີ້ແຈງຕອບຂໍ້ຊັກຖາມຂອງສະມາຊິກສະພາແຫ່ງຊາດ  ເລີ່ມຕົ້ນຈາກທ່ານ ສຸພັນ ແກ້ວມີໄຊ, ລັດຖະມົນຕີກະຊວງ ແຜນການແລະການລົງທືນ ໄດ້ຊີ້ແຈງຫລາຍບັນຫາທີ່ຜູ້ແທນໃຫ້ຄວາມສົນໃຈເປັນພິເສດ ເປັນຕົ້ນການຕິດຕາມ, ຄຸ້ມຄອງໂຄງການລົງທືນຂອງລັດພາຍຫລັງການອະນຸມັດເຂົ້າແຜນແລ້ວ ໄດ້ຈັດຕັ້ງປະຕິບັດຕາມມາດຕາ 53 ຂອງກົດໜາຍວ່າດ້ວຍການລົງທືນຂອງລັດ, ລວມເຖິງບັນດາໂຄງການຊ່ວຍເຫລືອຂອງຕ່າງປະເທດເພື່ອການພັດ ທະນາ ຊື່ງລ້ວນແຕ່ດຳເນີນຕາມຂັ້ນຕອນການຈັດຕັ້ງປະຕິບັດຢ່າງລະອຽດ ແລະເຂັ້ມງວດ ເພື່ອຮັບປະກັນໃຫ້ທຸກໂຄງການມີປະສິດທິຜົນສູງສຸດ.

ທ່ານ ນາງ ວັນເພັງ ແກ້ວລະຄອນ, ສະມາຊິກສະພາແຫ່ງຊາດເຂດເລືອກຕັ້ງທີ 9 ແຂວງຊຽງຂວາງ ສະເໜີໃຫ້ກະຊວງສຶກສາທິການ ແລະກິລາ ເບີ່ງຄືນກ່ຽວກັບການຮັບຄູອາສາສະໝັກທີ່ມີຢ່າງກ້ວາງຂວາງໃນປະຈຸບັນ ຄວນມີມາດຕະການຢ່າງລະອຽດ ເພື່ອຄັດເລືອກໃຫ້ໄດ້ບຸກຄະລາກອນທີ່ມີຄວາມຮູ້ຄວາມສາມາດ ແລະມີປະສົບການທີ່ສຸດ.

   ໂອກາດນີ້ທ່ານນາງ ແສງເດືອນ ຫລ້າຈັນທະບູນ, ລັດຖະມົນຕີກະຊວງສຶກສາທິການ ແລະ ກິລາ ຊີ້ແຈງວ່າ: ການຮັບຄູອາສະໜັກບາງຄັ້ງ ມີຄວາມຈຳເປັນ ເນື່ອງຈາກອີງໃສ່ຄວາມຕ້ອງການຕົວຈິງດ້ານວິຊາ ແລະເງື່ອນໄຂຕົວຈິງຂອງແຕ່ລະທ້ອງຖີ່ນ ແຕ່ໃນຕໍ່ໜ້າກະຊວງສຶກສາທິການການ ແລະກິລາ ຈະພະຍາຍາມນຳເອົາບັນຫານີ້ໄປພິຈາລະນາຕື່ມ ເພື່ອເຮັດໃຫ້ວຽກງານການສຶກສາມີຄຸນນະພາບ.

ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ 8 ຕາມວາລະແລ້ວຈະສືບຕໍ່ໃນວັນທີ 23/10/2017 ໂດຍຜູ້ຕາງໜ້າລັດຖະບານຈະສືບຕໍ່ຊີ້ແຈງຕອບຂໍ້ຊັກຖາມຂອງສະມາຊິກສະພາແຫ່ງຊາດ ເປັນຕົ້ນທະນາຄານແຫ່ງ ສປປລາວ, ກະຊວງ ພະລັງງານ ແລະບໍ່ແຮ່, ກະຊວງແຮງງານແລະສະຫວັດດີການສັງຄົມ, ກະຊວງການເງິນ ລວມເຖິງການຊີ້ແຈງກ່ຽວກັບວຽກງານກວດສອບແຫ່ງລັດ ແລະວຽກງານກວດກາຂອງລັດຖະບານ.

ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອລ້າໂຄງການ ໂຄງການຈັດຕັ້ງການບໍລິການດ້ານສຸຂະພາບຜົ້ງປາກ ແລະ ແຂ້ວ ທີ່​ ແຂວງ​ຄຳ​ມ່ວນ ແລະ ແຂວງ​ສະ​ຫວັນ​ນະ​ເຂດ ເປັນຈໍານວນເງິນ 273,530 ໂດລາສະຫະລັດ. ພິ​ທີ​ເຊັນ​ສັນ​ຍາ​ໂຄງ​ການຊ່ວຍເຫຼືອລ້າ​ດັ່ງ​ກ່າວໄດ້​ຖືກ​ຈັດ​ຂຶ້ນ​ທີ່​ສະ​ຖານ​ທູດ​ຢີ່​ປຸ່ນ ໃນ​ວັນ​ທີ 18 ຕຸລາ 2017, ​  ລະ​ຫວ່າງພະ​ນະ​ທ່ານ ທາ​ເຄ​ຊິ ຮິ​ຄິ​ຮາ​ຣະ, ເອກ​ອັກ​ຄະ​ຣາ​ຊະ​ທູດ​ຢີ່​ປຸ່ນ​ປະ​ຈຳ ລາວ, ແລະ ທ່ານ ໂຕະ​ຊິ​ມິ​ຊຶ ໂມະ​ຈິ​ດະ ຫົວ​ໜ້າອົງ​ການ​ຊ່ວຍ​ເຫລື​ອ​ສາ​ກົນ​ ທາງ​ດ້ານ​ການ​ສຶກ​ສາ​ທັນ​ຕະ​ກຳ ​ແຫ່ງ​ປະ​ເທດ​ຍີ່​ປຸ່ນ (OISDE), ເຊິ່ງ​ເປັນອົງ​ການບໍ່​ຫວັງ​ຜົນ​ກຳ​ໄລ​ຈາກ​ປະ​ເທດຍີ່​ປຸ່ນ, ໂດຍ​ມີ ດ.ຣ. ບຸນຖົມ ຊາມົນຕີ, ຮອງອະທິການບໍດີ ມະຫາວິທະຍາໄລ ວິທະຍາສາດສຸຂະພາບ, ດ.ຣ. ດ.ຣ. ຄຳຮຸ່ງ ພົມມະວົງສາ, ປະທານສະມາຄົມທັນຕະກຳລາວ, ດ.ຣ. ວໍລະສັກ ພູນສິຣິ, ຫົວໜ້າພະແນກຄຣິນິກທັນຕະກຳ, ດ.ຣ. ບຸນຍົງ ສີດາພອນ, ຮອງຄະນະບໍດິ ຄະ​ນະ​ທັນ​ຕະ​ກຳ ແລະ ພາກສ່ວນທີ່ກ່ຽວຂ້ອງ​ຈາກ​ກະ​ຊວງຕ່າງໆໃຫ້​ກຽດ​ເຂົ້າ​ຮ່ວມ​ເປັນສັກຂີ​ພະ​ຍານ.

​​ໂຄງ​ການ “ການຈັດຕັ້ງການບໍລິການດ້ານສຸຂະພາບຜົ້ງປາກ ແລະ ແຂ້ວ ໂດຍການຝຶກອົບຮົມໃຫ້ແກ່ພະຍາບານ, ນັກສຶກສາໂຮງຮຽນວິ​ຊາ​ຊີບ​ພະ​ຍາ​ບານ ແລະ ພະນັກງານຈາກພະແນກສາທາລະນະສຸກ ທີ່​ ແຂວງຄຳ​ມ່ວນ ແລະ ສ​ະ​ຫວັນ​ນະ​ເຂດ” ນີ້​ ແມ່ນ​ປີ​ທີ​ສາມ ຂອງ​ໂຄງ​ການ​ທີ່​ມີ​ໄລ​ຍະ​ສາມ​ປີ ແລະ ຈະ​ໃຫ້​ກາ​ນ​ຊ່ວຍ​ເຫລື​ອ​ຕ່າງໆ ທີ່ຈຳເປັນ​ໃຫ້​ແກ່ພະ​ຍາ​ບານ ຢູ່ສຸກ​ສາ​ລາທ້ອ​ງ​ຖິ່ນ ແລະ ນັກຮຽນ ຂອງໂຮງຮຽນວິຊາຊີບພະຍາບານ, ນອກຈາກນີ້ ຍັງມີການບໍລິການ ກວດສຸຂະພາບແຂ້ວ ແລະ ໃຫ້ຄຳປຶກສາສຳລັບປະຊາຊົນ ໃນທ້ອງຖິ່ນ ອີກດ້ວຍ. ຈຸດ​ປະ​ສົງຂອງໂຄງ​ການ ​​ກໍ່​ແມ່ນ​ເພື່ອ ສ້າງ​ຄວາມ​ເຂັ້ມ​ແຂງຂອງການ​ບໍ​ລິ​ການ​ສຸ​ຂະ​ພາບໂຜ້ງ​ປາກ ແລະ ແຂ້ວ ແລະ ຊ່ວຍຫລຸດຈຳນວນຜູ້​ເປັນພະຍາດຊຶມເຊື້ອ, ເຊີ່ງ​ກໍ​ຄື​ພະ​ຍາດ​ທາງໂຜ້ງ​ປາກ ແລະ ແຂ້ວໃນທ້ອງຖິ່ນ. ໂຄງການ​ດັ່ງກ່າວຄາດ​ວ່າຈະປະ​ສົບ​ຜົນ​ສຳ​ເລັດ ໂດຍ​ທີ່​ວ່າການ​ບໍ​ລິ​ການສຸຂະພາບຜົ້ງປາກ ແລະ ແຂ້ວຈະໄດ້​ຮັບ​ການ​ຂະ​ຫຍາ​ຍໄປທົ່ວປະເທດລາວ ແລະ ຈະຊ່ວຍໃຫ້ປະເທດລາວ ສ້າງລະບົບການບໍລິການໂຜ້ງປາກ ແລະ ແຂ້ວຂອງຕົນເອງໄດ້ຢ່າງ​ມີ​ປະສິດທິ​ຜົນ.

ປະ​ເທດ​ລາວ​ເປັນ​ປະ​ເທດ​ດຽວ​ໃນ​ອາ​ຊີ​ຕາ​ເວັນ​ອອກ​ສຽງ​ໃຕ້ ທີ່ບໍ່​ມີ​ລະ​ບົບ​ສຳ​ລັບພະ​ຍາ​ບານ​ທັນ​ຕະ​ກຳ. ດັ່ງ​ນັ້ນ​ແລ້ວ, ປະ​ເທດ​ລາວ​ຈຶ່ງ​ຂາດ​ແຄນ​ຊັບ​ພະ​ຍາ​ກອນ​ມະ​ນຸດ​ທີ່​ຈະ​ມາ​ຊ່ວຍ​ສົ່ງ​ເສີມ​ກິດ​ຈະ​ກຳການບໍລິການດ້ານສຸຂະພາບຜົ້ງປາກ ແລະ ແຂ້ວ. ອົງ​ການ OISDE ໄດ້​ປະ​ຕິ​ບັດ​ວຽກ​ງານ​ໂຄງ​ການ ການບໍລິການດ້ານສຸຂະພາບຜົ້ງປາກ ແລະ ແຂ້ວ ທີ່ ສ​ປ​ປ ລາວ​ ນັບ​ຕັ້ງ​ແຕ່​ປີ 2002.

 

ໃນວັນທີ 12 ຕຸລາ 2017, ທີ່ ທໍານຽບປະທານາທິບໍດີ ແຫ່ງ ສາທາລະນະລັດ ມານຕາ, ນະຄອນຫຼວງ ວາແລດຕາ, ທ່ານ ຄຳອິນ ຄິດຈະເດດ ໄດ້ເຂົ້າຢື່ນສານຕາຕັ້ງຕໍ່ ພະນະທ່ານ ນາງ ມາຣີ ຫຼຸຍສ໌ ໂຄເລໂຣ ເປຣກາ (Marie-Louise Coleiro Preca), ປະທານາທິບໍດີ ແຫ່ງ ສະທາລະນະລັດ ມານຕາ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສາທາລະນະລັດ ມານຕາ ໂດຍມີສຳນັກງານຕັ້ງຢູ່ ເຊີແນວ, ປະເທດສະວິດ.

ໃນໂອກາດນີ້, ທ່ານທູດ ໄດ້ນຳເອົາຄວາມຢື້ຢ້ຽມຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດຂອງ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ເຖິງ ພະນະທ່ານປະທານາທິບໍດີ ແລະ ຜ່ານພະນະທ່ານໄປຍັງລັດຖະບານ ແລະ ປະຊາຊົນມານຕາ ທຸກຖ້ວນໜ້າ.

ທ່ານທູດ ໄດ້ສະແດງຄວາມຊົມເຊີຍຕໍ່ຜົນສຳເລັດການພັດທະນາເສດຖະກິດ-ສັງຄົມຂອງສາທາລະນະລັດ ມານຕາ ທີ່ໄດ້ມີການເຕີບໃຫຍ່ຂະຫຍາຍຕົວຢ່າງຕໍ່ເນື່ອງຜ່ານມາ ແລະ ທັງມີບົດບາດສຳຄັນທາງດ້ານການເມືອງຢູ່ໃນເວທີສາກົນ ແລະພາກພື້ນ ໂດຍສະເພາະແມ່ນຢູ່ໃນຂົງເຂດອີຢູ; ໄດ້ແຈ້ງການພັດທະນາເສດຖະກິດ-ສັງຄົມຂອງ ສປປ ລາວ ໂດຍສະເພາະການຜັນຂະຫຍາຍການພັດທະນາທີ່ຍືນຍົງ ແລະ ການເປົ້າໝາຍການພັດທະນາເພື່ອນຳເອົາ ສປປ ລາວ ຫລຸດພົ້ນອອກຈາກ ສະຖານະພາບຄວາມດ້ອຍພັດທະນາໃນປີ 2020; ພ້ອມທັງແຈ້ງປີການທ່ອງທ່ຽວແຫ່ງຊາດປີ 2018;

ເນື່ອງຈາກວ່າ ນັບແຕ່ສາທາລະນະລັດ ມານຕາ ແລະ ສປປລາວ ສ້າງຕັ້ງສາຍພົວພັນການທູດນຳກັນໃນວັນທີ 13 ມັງກອນ 2011, ສອງປະເທດຍັງບໍ່ທັນມີການຮ່ວມມືທີ່ເປັນຮູບປະທຳ. ທ່ານທູດໄດ້ສະເໜີໃຫ້ມີການຮ່ວມມືທາງດ້ານການພັດທະນາເສດຖະກິດ-ສັງຄົມນຳກັນ ໂດຍສະເພາະ ດ້ານການທ່ອງທ່ຽວ, ການສຶກສາ ແລະ ເຕັກນິກວິຊາການ; ໄດ້ສະແດງຄວາມຂອບໃຈທີ່ພະນະທ່ານປະທານາທິບໍດີ ໄດ້ໃຫ້ການຕອບຮັບຢ່າງອົບອຸ່ນ ແລະ ໄດ້ສະແດງຄວາມໝາຍໝັ້ນທີ່ຈະສົ່ງເສີມການຮ່ວມມືຂອງສອງປະເທດໃນຕໍ່ໜ້າ; ອວຍພອນໃຫ້ພະນະທ່ານປະທານາທິບໍດີ, ລັດຖະບານ ແລະ ປະຊາຊົນມານຕາທຸກທົ່ວໜ້າໃຫ້ມີຄວາມສົມບູນພູນສຸກ, ມີຄວາມເຕີບໃຫຍ່ຂະຫຍາຍຕົວທາງດ້ານການພັດທະນາເສດຖະກິດ-ສັງຄົມ ແລະ ອວຍພອນໃຫ້ສາຍພົວພັນ ແລະ ການຮ່ວມມືຂອງສອງປະເທດໃຫ້ເປັນຮູບປະທຳໃນຕໍ່ໜ້າ.

ໃນໂອກາດນີ້, ພະນະທ່ານ ປະທານາທິບໍດີ ໄດ້ສະແດງຄວາມຍິນດີຕ້ອນຮັບ ທ່ານທູດຄົນໃໝ່ ແລະ ໄດ້ເຫັນດີຕໍ່ຂໍ້ສະເໜີຂອງທ່ານທູດ, ຍິນດີທີ່ຈະໃຫ້ການຮ່ວມມືຊ່ວຍເຫຼືອທາງດ້ານເຕັກນິກໃນຂະແຫນງການທ່ອງທ່ຽວ ແລະ ການສຶກສາ ພ້ອມທັງ ໃຫ້ມີການຮ່ວມມືທາງດ້ານການພັດທະນາເສດຖະກິດ-ສັງຄົມຮ່ວມກັນໃນຕໍ່ໜ້າ.

ພະນະທ່ານປະທານາທິບໍດີ ໄດ້ຝາກຄວາມຢື້ຢາມຖາມຂ່າວ ແລະ ອວຍພອນໄຊອັນປະເສີດມາຍັງ ພະນະທ່ານ ບຸນຍັງ ວໍລະຈິດ, ປະທານປະເທດ ແລະ ປະຊາຊົນລາວທຸກທົ່ວໜ້າ ແລະ ອວຍພອນໃຫ້ທ່ານທູດໃໝ່ ຈົ່ງປະສົບຜົນສຳເລັດໃນການປະຕິບັດໜ້າທີ່ວຽກງານການທູດຂອງຕົນ.

ໃນໂອກາດເຄື່ອນໄຫວຍື່ນສານຕາຕັ້ງໃນຄັ້ງນີ້, ທ່ານທູດລາວຄົນໃໝ່ ຍັງໄດ້ຢ້ຽມຂ່ໍານັບ ແລະ ພົບປະກັບພະນະທ່ານປະທານສະພາແຫ່ງຊາດ, ທ່ານລັດຖະມົນຕີກະຊວງການຕ່າງປະເທດ, ເຈົ້າຫນ້າທີ່ກ່ຽວຂ້ອງຂອງກະຊວງການຕ່າງປະເທດ ແລະ ກະຊວງສຶກສາຂອງປະເທດມານຕາ ເພື່ອປຶກສາຫາລືການຮ່ວມມືທາງດ້ານການພັດທະນາເສດຖະກິດ-ສັງຄົມຮ່ວມກັນໃນຕໍ່ໜ້າ.

ຕະຫລອດໄລຍະການເຄື່ອນໄຫວຍື່ນສານ ແລະ ການເຂົ້າຢ້ຽມຂ່ຳນັບພົບປະນຳຂະແໜງການຕ່າງໆ ແມ່ນມີບັນຍາ ກາດໄມຕີຈິດມິດຕະພາບທີ່ດີ ແຕ່ຕົ້ນຕະຫລອດປາຍ.

ພະແນກສຶກສາທິການ ແລະ ກິລາ ແຂວງຊຽງຂວາງ ຈັດກອງປະຊຸມການລາຍງານສະພາບການກະກຽມ ແລະ ຈັດຕັ້ງ

ປະຕິບັດໄຂສົກຮຽນໃໝ່ 2017-2018 ໃນວັນທີ 20 ຕຸລາ 2017 ນີ້ ທີ່ຫ້ອງປະຊຸມພະແນກສຶກສາທິການ ແລະ ກິລາ ແຂວງ, ພາຍໃຕ້ການເປັນປະທານຂອງທ່ານ ບົວລີ ພັນນາວົງ ຫົວໜ້າພະແນກສຶກສາທິການ ແລະ ກິລາ ແຂວງ, ເຂົ້າຮ່ວມມີຄະນະພະແນກ, ຫົວໜ້າຫ້ອງການສຶກສາທິການ ແລະ ກິລາ ເມືອງ 7 ເມືອງ, ຫົວໜ້າ ຮອງຫົວໜ້າແຕ່ລະຂະແໜງການຂອງພະແນກ, ຜູ້ບໍລິຫານໂຮງຮຽນອ້ອມຂ້າງທີ່ຂຶ້ນກັບພະແນກຕະຫຼອດຮອດໜ່ວຍງານທີ່ກ່ຽວຂ້ອງເຂົ້າຮ່ວມ.

ທ່ານ ສີພັນ ພັດທະນາ ຫົວໜ້າຂະແໜງສະຖິຕິ-ແຜນການ ພະແນກສຶກສາທິການ ແລະ ກິລາ ແຂວງຊຽງຂວາງ ໄດ້ລາຍງານໃຫ້ຮູ້ຈຸດປະສົງເປົ້າໝາຍຂອງກອງປະຊຸມ ແມ່ນເພື່ອຮັບຟັງລາຍງານການຫ້າງຫາກະກຽມ-ຈັດຕັ້ງປະຕິບັດ ການໄຂສົກຮຽນ

ໃໝ່ 2017-2018 ຈາກແຕ່ລະຫ້ອງການສຶກສາທິການ ແລະ ກິລາ ເມືອງ, ໂຮງຮຽນ ແລະ ສູນອ້ອມຂ້າງທີ່ຂຶ້ນກັບພະແນກ ລວມທັງຮັບຟັງການລາຍງານສະພາບບັນຫາຂອງນັກຮຽນ, ຄູສອນ, ອາຄານສະຖານທີ່ຫ້ອງຮຽນ ແລະ ອຸປະກອນຮັບໃຊ້ຕ່າງໆ ມີຄວາມພຽງພໍກັບຄວາມຕ້ອງການຂອງການຮຽນ-ການສອນ ຫຼື ບໍ່ ແລະ ຈະຫາວິທີທາງແກ້ໄຂຄືແນວໃດ, ພ້ອມນັ້ນ ກອງປະ ຊຸມຍັງຈະໄດ້ເປີດໂອກາດໃຫ້ຜູ້ແທນທີ່ເຂົ້າຮ່ວມ ໄດ້ປຶກສາຫາລື ປະກອບຄໍາຄິດຄໍາເຫັນ ເພື່ອພ້ອມກັນຊອກຫາວິທີທາງແກ້ໄຂບັນຫາ ແລະ ສິ່ງທ້າທາຍທີ່ເກີດຂຶ້ນໃຫ້ທັນກັບເວລາ ແນໃສ່ພັດທະນາລະບົບການສຶກສາ-ກິລາ ຢູ່ແຂວງຊຽງຂວາງ ນັບແຕ່ຮາກຖານລົງຮອດທ້ອງຖິ່ນ ໃຫ້ມີຄວາມເປັນເອກະພາບ, ມີຄວາມເຂັ້ມແຂງ ແລະ ມີຄຸນນະພາບ.

ໂອກາດນີ້ ປະທານກອງປະຊຸມ ໄດ້ຮຽກຮ້ອງໃຫ້ຜູ້ແທນທີ່ເຂົ້າຮ່ວມ ຈົ່ງພ້ອມກັນເອົາໃຈໃສ່ຄົ້ນຄ້ວາ ປະກອບຄໍາຄິດຄໍາເຫັນ ແລະ ລາຍງານຂໍ້ມູນໃຫ້ຊັດເຈນ ຈະແຈ້ງ ສົມບູນ ຄົບຖ້ວນ ເພື່ອເປັນພື້ນຖານໃຫ້ແກ່ການຈັດຕັ້ງປະຕິບັດວຽກງານໃນພາກ ຮຽນທີ II ກໍຄືສົກຮຽນຕໍ່ໄປໃຫ້ໄດ້ຮັບຜົນດີກ່ວາເກົ່າ.

 

ອິງຕາມກາຍລາຍງານຫ້ອງການກະສິກຳ ແລະ ປ່າໄມ້ເມືອງໃຫ້ຮູ້ວ່າ ການເກັບກູ້ເຂົ້ານາປີຂອງຊາວກະສິກອນ ຢູ່ເມືອງເງິນ ແຂວງໄຊຍະບູລີ ແມ່ນເປັນຂະບວນຟົດຟື້ນ ແລະ ກວ້າງຂວາງ ມາ ຮອດປັດຈຸບັນນີ້ແມ່ນສຳເລັດແລ້ວ 40% ຂອງເນື້ອທີ່ທັງໜົດ 702 ເຮັກຕາ ຄາດວ່າຈະໃຫ້ສໍາເລັດທ້າຍເດືອນຕຸລາ 2017ນີ້ 100%ໄປພ້ອມໆກັບ ການເກັບກູ້ເຂົ້ານາປີ ຊາວກະສິກອນຍັງໄດ້ສຸມໃສ່ ເກັບກູ້ພືດລະດູຝົນເປັນຕົ້ນ ແມ່ນໜາກເດືອຍ, ສາລີ ແລະ ພຶດອື່ນໆ ສຳເລັດ

ແລ້ວ 60% ຂອງເນື້ອທີ່ທັງໝົດ 7.189,46  ເຮັກຕາ.

ຖ້າທຽບໃສ່ປີຜ່ານມາ ການເກັບກູ້ເຂົ້ານາ ແມ່ນມີຄວາມຫຼ້າຊ້າ ກວ່າປີຜ່ານມາ  ເນື່ອງຈາກວ່າມີຝົນຕົກ ເຮັດໃຫ້ ການເກັບກູ້ຜົນຜະລິດ ພົບຄວາມຍຸ້ງຍາກ . ສະມັດຕະພາບເຂົ້ານາປີນີ້ແມ່ນໄດ້ 5,5 ໂຕນຕໍ່ເຮັກຕາ  ທຽບໃສ່ປີຜ່ານມາແມ່ນເພີ້ມຂື້ນ 4%.

ພາຍຫຼັງສຳເລັດການເກັບກູ້ພືດລະດູຝົນແລ້ວ ທາງຫ້ອງການທີ່ກ່ຽວຂ້ອງ ຍັງຈະໄດ້ພ້ອມກັນລົງຊຸກຍູ້ສົ່ງເສີມ ໃຫ້ປະຊາຊົນ ປູກພຶດລະດູແລ້ງ ໃຫ້ໄດ້ 640 ເຮັກຕາ.

 

ບັນຍາກາດດຳເນີນກອງປະຊຸມ ສະໄໝສາມັນເທື່ອ ທີ 4 ຂອງສະພາແຫ່ງຊາດຊຸດທີ 8 ໃນວັນທີ 17/10/2017 ທີ່ຫໍປະຊຸມສະພາແຫ່ງຊາດຫຼັຫ 6 ນະຄອນຫຼວງວຽງຈັນ ພາຍໃຕ້ການ ເປັນປະທານຂອງທ່ານ ນາງປານີ ຢາທໍ່ຕູ້ ປະທານສະພາແຫ່ງຊາດ. ສະມາຊິກສະພາແຫ່ງ ຊາດໄດ້ປະກອບຄໍາຄິດຄຳເຫັນເຂົ້າໃສ່ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດສັງຄົມ , ແຜນງົບປະ ມານ ແຫ່ງລັດ, ແຜນເງິນຕາ ປະຈຳ ປີ2017 ແລະແຜນການປະຈຳປີ 2018. ການປະກອບຄຳເຫັນມີລັກສະນະກົງໄປກົງມາແລະມີຄວາມຮັບຜິດຊອບສູງໂດຍຜູ້ແທນໄດ້ ເນັ້ນໜັກຫຼາຍບັນຫາເປັນຕົ້ນຜົນສຳເລັດການປະຕິບັດຄາດໝາຍທີ່ສະພາແຫ່ງຊາດຮັບຮອງ ເອົາ, ວິເຄາະວິໄຈກ່ຽວກັບສາເຫດທີ່ເຮັດໃຫ້ ມີຜົນສຳເລັດ ຄາດໝາຍ ເສດຖະກິດມະ ຫາ ພາກ, ການລົງທຶນ, ການພັດທະນາຊົນະບົດ  ແລະ ແກ້ໄຂຄວາມທຸກຍາກ, ການພັດທະ ນາເສດຖະກິດສັງຄົມ ແລະ ສິ່ງແວດລ້ອມ, ພ້ອມທັງວິເຄາະວິໄຈສາເຫດ ທີ່ບໍ່ສາມາດ ບັນ ລຸຄາດໝາຍທີ່ສະພາແຫ່ງຊາດວາງອອກ ມີ 5 ຄາດໝາຍໃຫຍ່ ແລະ 40 ຄາດໝາຍຍ່ອຍ , ບັນຫາການຈັດຕັ້ງຜັນຂະຫຍາຍມະຕິ ຂອງສະພາແຫ່ງຊາດເຂົ້າໃນຂະແໜງການຕ່າງໆ, ການອອກນິຕິກຳ ລວມທັງການສະໜອງງົບປະມານ, ການກຳນົດອັດຕາເຕີບໂຕ ທາງເສດ ຖະກິດທີ່ພົວພັນກັບພື້ນຖານ ແລະປັດໃຈຕ່າງໆ, ນະໂຍບາຍແລະມາດຕະ ການກະຕຸ້ນ ເສດ ຖະກິດ ແລະທິດທາງການປະຕິຮູບດ້ານການເງິນ  ລວມມີການຈັດແບ່ງສັດສ່ວນ ງົບປະມານ ລະຫວ່າງສູນກາງ ແລະທ້ອງຖິ່ນ, ລາຍຈ່າຍ ແລະການຂາດດຸນງົບປະມານ ລວມທັງ ຄາດ ໝາຍການພັດທະນາຊົນນະບົດ ແລະແກ້ໄຂຄວາມທຸກຍາກ ລວມທັງບັນຫາອື່ນໆ .

 

ວັນທີ 16 ຕຸລາ 2017 ທີ່ຫ້ອງປະຊຸມຫ້ອງວ່າການປົກຄອງແຂວງອຸດົມໄຊ ໄດ້ຈັດກອງປະຊຸມສະຫຼຸບຕີລາຄາວຽກງານສົ່ງເສີ່ມ ແລະ ຄຸ້ມຄອງການລົງທຶນຂອງພາກເອກະຊົນພາຍໃນ ແລະ ຕ່າງປະເທດສົກປີ 2015-2017. ໂດຍການເປັນປະທານຂອງທ່ານ ເພັດສາຄອນ ຫຼວງອາໄພ ເລຂາພັກແຂວງ,ເຈົ້າແຂວງອຸດົມໄຊ ທັງເປັນປະທານຄະນະກຳມະການຄຸ້ມຄອງການລົງທຶນຂັ້ນແຂວງອຸດົມໄຊ,ເຂົ້າຮ່ວມມີຮອງເລຂາພັກແຂວງ,ຄະນະປະຈຳພັກແຂວງ,ຮອງເຈົ້າແຂວງ,ສະມາຊິກສະພາປະຊາຊົນແຂວງອຸດົມໄຊ,ຫົວໜ້າພະແນກການ-ອົງການ,ຫົວເຈົ້າເມືອງ-ຮອງເຈົ້າເມືອງ,ຫົວໜ້າຫ້ອງການແຜນການ ແລະ ການລົງທຶນຂັ້ນເມືອງ 7 ເມືອງພາຍໃນແຂວງອຸດົມໄຊ ພ້ອມດ້ວພະນັກງານວິຊາການເຂົ້າຮ່ວມ.

ໃນກອງປະຊຸມໄດ້ຮັບຟັງການສະຫຼຸບຕີລາຄາສະພາບການສົ່ງເສີ່ມ ແລະ ຄຸ້ມຄອງການລົງທຶນ ຂອງພາກເອກະຊົນພາຍໃນ ແລະ ຕ່າງປະເທດໃນສົກປີ 2015-2017 ແລະ ທິດທາງແຜນການປີ 2018 ທີ່ໄດ້ໃຫ້ຮູ້ເຖິງການຈັດຕັ້ງປະຕິບັດວຽກງານສົ່ງເສີ່ມ ແລະ ຄຸ້ມຄອງການລົງທຶນ ຂອງພາກເອກະຊົນ ພາຍໃນ ແລະ ຕ່າງປະເທດ ທີ່ແຂວງອຸດົມໄຊໄດ້ເອົາໃຈໃສ່ຈັດຕັ້ງປະຕິບັດ ແລະ ມີຜົນສຳເລັດຫຼາຍດ້ານ ສະແດງອອກໃນສົກປີ 2015-2017 ທົ່ວແຂວງອຸດົມໄຊໄດ້ອານຸຍາດການລົງທຶນໃໝ່ໃນກິດຈະກຳສຳປະທານ 10 ໂຄງການ ມີມູນຄ່າການລົງທຶນ 45,33 ລ້ານໂດລາສະຫະລັດ ເທົ່າກັບ 380 ຕື້ກີບ ໃນນັ້ນຂະແໜງກະສິກຳມີ 5 ໂຄງການ ມູນຄ່າການລົງທຶນ 9,5 ລ້ານໂດລາສະຫະລັດ,ຂະແໜງອຸດສະຫະກຳມີ 4 ໂຄງການ ມູນຄ່າການລົງທຶນ 34,6 ລ້ານໂດລາສະຫະລັດ ແລະ ຂະແໜງບໍລິການ-ການຄ້າມີ 1 ໂຄງການ ມີມູນຄ່າການລົງທຶນ1,2 ລ້ານໂດລາສະຫະລັດ. ພ້ອມດຽວກັນນີ້ກໍຍັງໄດ້ຍົກໃຫ້ຮູ້ເຖິງສາເຫດທີ່ພາໃຫ້ມີດ້ານດີ ດ້ານອ່ອນ ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ເພື່ອໃຫ້ຜູ້ແທນກອງປະຊຸມໄດ້ພ້ອມກັນສັງເກດຕີລາຄາ ແລະ ປະກອບຄຳຄິດຄຳເຫັນ ໃນການແກ້ໄຂບັນຫາຂໍ້ຄົງຄ້າງ ເຮັດໃຫ້ການຈັດຕັ້ງປະຕິບັດວຽກງານສົ່ງເສີ່ມການລົງທຶນຢູ່ແຂວງອຸດົມໄຊ ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ ບັນລຸຕາມຈຸດປະສົງຄາດໝາຍທີ່ວາງໄວ້. ໃນກອງປະຊຸມຄັ້ງນີ້ຍັງໄດ້ຜ່ານຮ່າງແຜນຍຸດທະສາດການສົ່ງເສີ່ມ ແລະ ຄຸ້ມຄອງການລົງທຶນພາກເອກະຊົນ ຂອງແຂວງອຸດົມໄຊແຕ່ນີ້ຮອດປີ 2025 ແລະ ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະກຳມະການສົ່ງເສີ່ມ ແລະ ຄຸ້ມຄອງການລົງທຶນຂັ້ນແຂວງຕື່ມອີກ.

ໃນລະຫວ່າງວັນທີ 12-13 ຕຸລາ 2017, ທ່ານ ແພງສະຫວັນ ແກ້ວປະເສີດ, ຫົວໜ້າຫ້ອງການຄະນະກໍາມະການຊາຍແດນແຫ່ງຊາດ, ກະຊວງການຕ່າງປະເທດ ພ້ອມດ້ວຍຜູ້ຕາງໜ້າຈາກກົມໂຄສະນາ, ຄະນະໂຄສະນາອົບຮົມສູນກາງພັກ; ກົມໂຄສະນາ, ສູນກາງແນວລາວສ້າງຊາດ; ກົມທະຫານຊາຍແດນ, ກະຊວງປ້ອງກັນປະເທດ; ກົມຄຸ້ມຄອງພົນລະເມືອງ, ກະຊວງພາຍໃນ ແລະ ກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ, ກະຊວງປ້ອງກັນຄວາມສະຫງົບ ຮ່ວມກັບພະແນກການຕ່າງປະເທດແຂວງອັດຕະປື ໄດ້ເຄື່ອນໄຫວລົງໂຄສະນາເຜີຍແຜ່ແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດກ່ຽວກັບວຽກງານຊາຍແດນລະຫວ່າງປະເທດ ເວົ້າລວມ, ເວົ້າສະເພາະກໍຄືບັນດານິຕິກໍາຕ່າງໆທີ່ກ່ຽວຂ້ອງກັບການຄຸ້ມຄອງເສັ້ນຊາຍແດນລະຫວ່າງ ສປປ ລາວ ກັບບັນດາປະເທດໃກ້ຄຽງ ໃຫ້ແກ່ຜູ້ຕາງໜ້າຈາກຂະແໜງການກ່ຽວຂ້ອງຂອງແຂວງອັດຕະປືທີ່ມາຈາກ: ເມືອງສາມັກຄີໄຊ, ເມືອງພູວົງ, ເມືອງຊານໄຊ ແລະ ເມືອງໄຊເສດຖາ ຊຶ່ງການຈັດໂຄສະນາເຜີຍແຜ່ໃນຄັ້ງນີ້ ໄດ້ຈັດຂຶ້ນທີ່ຫ້ອງປະຊຸມຂອງສະພາປະຊາຊົນແຂວງອັດຕະປື.

ເອກະສານທີ່ນຳມາໂຄສະນາເຜີຍແຜ່ໃນຄັ້ງນີ້ປະກອບດ້ວຍ: ປະຫວັດຄວາມເປັນມາຂອງເຂດແດນຂອງ ສປປ ລາວ ກັບບັນດາປະເທດໃກ້ຄຽງໂດຍຫຍໍ້, ອະນຸສັນຍາວ່າດ້ວຍເສັ້ນຊາຍແດນ ແລະ ຫຼັກໝາຍຊາຍແດນປະເທດ ລາວ-ຫວຽດນາມ, ສັນຍາວ່າດ້ວຍລະບຽບການຄຸ້ມຄອງຊາຍແດນ ແລະ ດ່ານຊາຍແດນປະເທດ ລາວ-ຫວຽດນາມ, ນະໂຍບາຍຂອງລັດຖະບານລາວ ແລະ ຫວຽດນາມ ໃນການແກ້ໄຂບັນຫາຜູ້ຍົກຍ້າຍຕັ້ງພູມລຳເນົາຕາມລຳພັງໃຈ ແລະ ສ້າງຄອບຄົວບໍ່ຖືກລະບຽບຢູ່ຕາມບໍລິເວນຊາຍແດນ ລາວ-ຫວຽດນາມ, ສະພາບການກ່ຽວກັບຊາຍແດນ ລາວ-ກຳປູເຈຍ ໂດຍຫຍໍ້, ສະພາບລວມຂອງຂໍ້ສະດວກ ແລະ ຂໍ້ຫຍຸ້ງຍາກກ່ຽວກັບວຽກງານຊາຍແດນ; ທີ່ຕັ້ງ, ພາລະບົດບາດ ແລະ ສິດໜ້າທີ່ຂອງກອງຮ້ອຍທະຫານຊາຍແດນກອງທັບປະຊາຊົນລາວ, ການຄຸ້ມຄອງສຳມະໂນຄົວ ແລະ ການຄຸ້ມຄອງການເຄື່ອນຍ້າຍພົນລະເມືອງ.

ການໂຄສະນາເຜີຍແຜ່ໃນຄັ້ງນີ້, ນອກຈາກຜູ້ຕາງໜ້າຈາກພາກສ່ວນກ່ຽວຂ້ອງທີ່ກ່າວມາຂ້າງເທິງນັ້ນ ໄດ້ມີການຜັດປ່ຽນກັນຂຶ້ນບັນຍາຍຕາມພາລະບົດບາດ ແລະ ໜ້າທີ່ຂອງຕົນ ໃຫ້ຜູ້ເຂົ້າຮ່ວມແລ້ວ, ຍັງໄດ້ເປີດໂອກາດໃຫ້ແກ່ຜູ້ເຂົ້າຮ່ວມຈຳນວນ 87 ຄົນໄດ້ແລກປ່ຽນຄຳຄິດຄຳເຫັນ, ໂດຍສະເພາະບັນຫາທີ່ເຂົາເຈົ້າມີຄວາມສົນໃຈຍົກຂຶ້ນມາເປັນຄຳຖາມ ເພື່ອໃຫ້ຜູ້ບັນຍາຍອະທິບາຍຊີ້ແຈ້ງໃຫ້ເຂົາເຈົ້າເຂົ້າໃຈຢ່າງຖືກຕ້ອງຕາມແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດທີ່ມີຕໍ່ວຽກງານດັ່ງກ່າວ. ນອກຈາກການໂຄສະນາຢູ່ຫ້ອງປະຊຸມຂອງສະພາປະຊາຊົນແຂວງອັດຕະປືແລ້ວ, ໃນວັນທີ 13 ຕຸລາ 2017 ຄະນະດັ່ງກ່າວຍັງໄດ້ສືບຕໍ່ເຄື່ອນໄຫວໂຄສະນາເຜີຍແຜ່ວຽກງານທີ່ຫ້ອງການປົກຄອງເມືອງສະໜາມໄຊ, ແຂວງອັດຕະປືຕື່ມອີກ.

ທ່ານ ບຸນຊູ ບຸນພັກດີ ຫົວໜ້າຫ້ອງການອຸດສາຫະກຳ ແລະ ການຄ້າເມືອງແກ່ນທ້າວ ແຂວງໄຊຍະບູລີ ໄດ້ໃຫ້ສໍາພາດຕໍ່ນັກຂ່າວພວກເຮົາວ່າ: ໄລຍະ 9 ເດືອນປີ 2017 ນີ້, ພະນັກງານອຸດສາຫະກໍາ ແລະ ການຄ້າເມືອງແກ່ນທ້າວ ໄດ້ຕັ້ງໜ້າເອົາໃຈໃສ່ປະຕິບັດໜ້າທີ່ວຽກງານວິຊາສະເພາະ ທີ່ໄດ້ຮັບການມອບໝາຍດ້ວຍຄວາມຮັບຜິດຊອບສູງ ແລະ ສໍາເລັດຜົນເປັນຢ່າງດີ ໂດຍໄດ້ສົມທົບກັບຂະແໜງການທີ່ກ່ຽວຂ້ອງ ລົງກວດກາບັນດາຫົວໜ່ວຍທຸລະກິດ ທີ່ເປັນຜົນກະທົບຕໍ່ສິ່ງແວດລ້ອມ ທັງໝົດ 25 ຫົວໜ່ວຍ, ລົງກວດກາສິນຄ້າໝົດອາຍຸ 40 ຮ້ານ. ໃນນີ້ ໄດ້ເຮັດບົດບັນທຶກ 29 ຮ້ານ ພົບເປັນສິນຄ້າໝົດອາຍຸ 5 ປະເພດມູນຄ່າ  3 ລ້ານກວ່າກີບ, ໄດ້ສໍາເລັດການສ້າງຕັ້ງກຸ່ມເກັບຊື້ພືດກະສິກໍາ, ເຄື່ອງປ່າຂອງດົງ ແລະ ກຸ່ມການຄ້າບໍລິການຢູ່ບ້ານສາມສ້າງປາກແຄມ ແລະ ຫ້ວຍເລີກ.

ທ່ານ ບຸນຊູ ບຸນພັກດີ ກ່າວຕໍ່ວ່າ: ໄລຍະ 9 ເດືອນຜ່ານມາເມືອງແກ່ນທ້າວ ສາມາດສົ່ງອອກສິນຄ້າຕ່າງປະເທດທັງໝົດ 1 ແສນກວ່າໂຕນ, ມູນຄ່າ 14 ລ້ານກວ່າໂດລາ, ໃນນີ້ ສິນຄ້າທີ່ສົ່ງອອກຫຼາຍກວ່າໝູ່ແມ່ນມັນຕົ້ນແຫ້ງ ຈໍານວນ 84.000 ກວ່າໂຕນ, ມູນຄ່າ 9 ລ້ານກວ່າໂດລາ, ສາລີ 25.900 ກວ່າໂຕນ, ມູນຄ່າ  3 ລ້ານກວ່າໂດລາ, ມັນຕົ້ນດິບ 15.000 ກວ່າໂຕນ, ມູນຄ່າ 760.000 ກວ່າໂດລາ, ມັນຕົ້ນແຫ້ງ 84.600 ກວ່າໂຕນ, ມູນຄ່າ 9 ລ້ານກວ່າໂດລາ, ຖົ່ວແດງ 1.400 ກວ່າໂຕນ, ຖົ່ວດິນຝັກ 140 ໂຕນ, ມູນຄ່າ 43.400 ໂດລາ, ໝາກງາ 25 ໂຕນ, ມູນຄ່າ 18.000 ກວ່າໂດລາ, ປໍສາ 59 ໂຕນ, ມູນຄ່າ 29.500 ໂດລາ ແລະ ແກນສາລີ 3.500 ກວ່າໂຕນ, ມູນຄ່າ 35.500 ໂດລາ. ໄດ້ເຄື່ອນຍ້າຍສິນຄ້າພາຍໃນປະເທດມູນຄ່າ 4 ຕື້ກວ່າກີບ, ໃນນີ້ ເຄື່ອນຍ້າຍພາຍໃນແຂວງມູນຄ່າ 2 ຕື້ກວ່າກີບ ແລະ ເຄື່ອນຍ້າຍໄປຕ່າງແຂວງ ມູນຄ່າ 2 ຕື້ກວ່າກີບ.

ທ່ານ ບຸນຊູ ບຸນພັກດີ ຍັງໃຫ້ຮູ້ຕື່ມວ່າ: ໄລຍະ 9 ເດືອນເມືອງແກ່ນທ້າວ ມີສິນຄ້ານໍາເຂົ້າຈາກຕ່າງປະເທດ ມູນຄ່າ 36 ລ້ານກວ່າໂດລາ. ໃນນີ້, ຫຼາຍກວ່າໝູ່ແມ່ນນໍ້າມັນເຊື້ອໄຟ ມູນຄ່າ 27 ລ້ານກວ່າໂດລາ, ໜວດເຄື່ອງອຸປະໂພກ ມູນຄ່າ 3.900.000 ກວ່າໂດລາ, ເຄື່ອງກໍ່ສ້າງ ມູນຄ່າ 3 ລ້ານກວ່າໂດລາ, ໜວດພາຫະນະ ມູນຄ່າ 550.000 ກວ່າໂດລາ, ອະໄລ ມູນຄ່າ 68.000 ກວ່າໂດລາ, ແລະ ເຄື່ອງໄຟຟ້າ ມູນຄ່າ 172.000 ກວ່າໂດລາ.

 

ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ 8 ໄຂຂື້ນຢ່າງເປັນ ທາງການໃນວັນທີ 16/10/2017 ຢູ່ຫໍປະຊຸມສະພາແຫ່ງຊາດຫຼັກ 6 ນະຄອນຫຼວງວຽງຈັນ ພາຍ ໃຕ້ການເປັນປະທານຂອງທ່ານ ປານີ ຢາທໍ້ຕູ້, ປະທານສະພາແຫ່ງຊາດ ມີທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ພ້ອມດ້ວຍ ການນຳພັກ – ລັດ ແລະ ສະມາຊິກສະພາ ແຫ່ງຊາດ ຈາກເຂດ ເລືອກຕັ້ງ ຕ່າງໆເຂົ້າຮ່ວມ.

 

ໂອກາດດັ່ງກ່າວໄຂກອງປະຊຸມຢ່າງເປັນທາງການ ທ່ານ ນາງ ປານີ ຢາທໍ້ຕູ້ ປະ ທານສະພາແຫ່ງຊາດ ຍົກໃຫ້ເຫັນວ່າ : ປີນີ້ເປັນປີທີ 2 ຂອງການຈັດ ຕັ້ງປະຕິບັດມະຕິ ກອງປະຊຸມໃຫຍ່ຄັ້ງທີ 10 ຂອງພັກ, ການຈັດຕັ້ງແຜນພັດທະນາເສດຖະກິດ – ສັງຄົມແຫ່ງ ຊາດ 5 ປີ ຄັ້ງທີ 8. ຕະຫຼອດໄລຍະ 9 ເດືອນກວ່າຜ່ານມາ ເຖິງວ່າສະພາບແວດລ້ອມ ຂອງພາກພື້ນ ແລະ ສາກົນ ມີທັງກາລະໂອກາດ ແລະ ສີ່ງທ້າທາຍ ຊຶ່ງໄດ້ສົ່ງຜົນກະທົບຕໍ່ ການພັດທະນາເສດຖະກິດ – ສັງຄົມຂອງປະເທດກໍ່ຕາມ ແຕ່ດ້ວຍຄວາມເອົາໃຈໃສ່ຊີ້ນຳຂອງ ພັກ – ລັດຖະບານ ແລະ ການເຂົ້າຮ່ວມຢ່າງຕັ້ງໜ້າຂອງປະຊາຊົນ ລາວບັນດາເຜົ່າໃນທົ່ວ ປະເທດ ເຮັດໃຫ້ປະເທດເຮົາສືບຕໍ່ມີສະເຖຍລະພາບດ້ານການເມືອງຢ່າງໜັກແໜ້ນ, ສັງຄົມ ມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ການພັດທະນາເສດຖະກິດ-ສັງ ຄົມຕໍ່ຂະຫຍາຍຕົວຢ່າງຕໍ່ເນື່ອງ, ການຄຸ້ມຄອງ ບໍລິຫານລັດຕາມລະບຽບກົດໝາຍໄດ້ຮັບ ການປັບປຸງ ແລະ ຈັດຕັ້ງປະຕິບັດສຳເລັດຫຼາຍເປົ້າໝາຍຂອງການພັດທະນາແບບຍືນຍົງທີ່ ກຳນົດໄວ້ໃນແຜນ, ການພົວພັນຮ່ວມມື ແລະ ການເຊື່ອມໂຍງເຂົ້າກັບພາກພື້ນ ແລະ ສາກົນ ສືບຕໍ່ໄດ້ຮັບການເສີມຂະຫຍາຍ, ບົດບາດ ແລະ ອິດທິພົນຂອງລາວນັບມື້ໄດ້ຮັບການເຊີດ ຊູຂື້ນໃນເວທີພາກພື້ນ ແລະ ສາກົນ. ຄຽງຄູ່ກັບຜົນສຳເລັດນັ້ນ ລາວຍັງປະສົບຄວາມຫຍຸ້ງ ຍາກ ແລະ ສິ່ງທ້າທາຍຈຳນວນໜຶ່ງ ເປັນຕົ້ນອັດຕາການເຕີບໂຕທາງດ້ານເສດຖະກິດ ເຖິງ ວ່າຂະຫຍາຍຕົວແຕ່ຍັງບໍ່ທັນຮັບປະກັນຄວາມໝັ້ນທ່ຽງ ແລະ ຍືນຍົງ, ບາງຄາດໝາຍໃຫຍ່ ທາງດ້ານເສດຖະກິດ, ການເງິນ, ສັງຄົມ ຍັງມີຄວາມສ່ຽງທີ່ອາດຈະບໍ່ບັນລຸຕາມແຜນ, ການ ຜະລິດກະສິກຳ, ອຸດສາຫະກຳ ແລະ ການແກ້ໄຂໜີ້ສິນຂອງລັດຍັງປະສົບກັບຄວາມຫຍຸ້ງ ຍາກ, ການລະເມີດກົດໝາຍແຜນການ ແລະ ການເງິນໃນຂົງເຂດການລົງທຶນຂອງລັດ, ການຄຸ້ມຄອງຊັບພະຍາກອນ, ບັນຫາສິ່ງແວດລ້ອມ, ການແກ້ໄຂປະກົດການຫຍໍ້ທໍ້ໃນສັງຄົມ ເຖິງວ່າໄດ້ມີຄວາມພະຍາຍາມແຕ່ຍັງບໍ່ທັນສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງການພັດທະນາ ແລະ ຄວາມຕ້ອງການຂອງປະຊາຊົນໄດ້, ສະນັ້ນ ໃນກອງປະ ຊຸມຄັ້ງນີ້ສະພາແຫ່ງຊາດຈະໄດ້ສຸມໃສ່ຄົ້ນຄວ້າພິຈາລະນາ ແລະ ຕົກລົງ ຫຼາຍບັນຫາສຳຄັນ ຂອງຊາດ.

ພາຍຫຼັງໄຂກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ 8 ຢ່າງ ເປັນທາງການແລ້ວ ຜູ້ເຂົ້າຮ່ວມໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດແຜນ ພັດທະນາເສດຖະກິດ – ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາປະຈຳປີ 2017 ແລະ ທິດທາງແຜນການປະຈຳປີ 2018 ທີ່ສະເໜີໂດຍທ່ານ ທອງລຸນ ສີສຸລິດ ນາຍົກລັດຖະມົນຕີ, ການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ປະຈຳປີ 2017 ແລະ ທິດທາງແຜນການປະຈຳປີ 2018 ຂອງລັດຖະບານ ທີ່ສະເໜີໂດຍທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ, ສະພາບການ ຈັດຕັ້ງປະຕິ ບັດແຜນງົບປະມານແຫ່ງລັດປະຈຳປີ 2017 ແລະ ທິດທາງແຜນ ການປະຈຳປີ 2018 ລວມເຖິງການຈັດຕັ້ງປະຕິບັດແຜນເງິນຕາ ແລະ ທິດທາງແຜນການປະຈຳປີ 2018 ຈາກ ທ່ານ ສົມພາວ ໄຟສິດ, ຜູ້ວ່າການທະນາຄານແຫ່ງ ສປປ ລາວ. ສ່ວນຕອນບ່າຍມື້ນີ້ຕາມ ວາລະແລ້ວກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ 8 ຈະໄດ້ຮັບ ຟັງການລາຍງານກ່ຽວກັບການຈັດຕັ້ງ ປະຕິບັດແຜນການເຄື່ອນໄຫວວຽກງານປະຈຳປີ 2017 ແລະ ທິດທາງແຜນການເຄື່ອນໄຫວວຽກງານ ປະຈຳປີ 2018 ຂອງອົງການກວດສອບ ແຫ່ງລັດ ແລະ ບົດລາຍງານກ່ຽວກັບຜົນ ການກວດສອບບົດສະຫຼຸບຂາດຕົວ ການຈັດຕັ້ງ ປະຕິບັດແຜນງົບປະມານແຫ່ງລັດ ສົກ 2015-2016 ຜົນການກວດສອບການຈັດຕັ້ງປະ ຕິບັດແຜນງົບປະມານແຫ່ງລັດ ສົກ 2013-2014 ແລະ ສົກ 2014-2015. ຈາກນັ້ນ, ປະ ທານກອງປະຊຸມຈະມີຄຳເຫັນ ເຈາະຈີ້ມ ແລະ ທິດຊີ້ນຳການປະກອບຄຳເຫັນຂອງສະມາຊິກ ສະພາແຫ່ງຊາດ ຕໍ່ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມປະຈຳປີ 2017ແລະ ແຜນການປະຈຳປີ 2018.