ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
CMG ເນັ້ນພັດທະນາ3ວຽກງານໂຄສະນາເພື່ອການທ່ອງທ່ຽວໃນຍຸກໃໝ່ດວ້ຍຄຸນນະພາບສູງ
ໃນໂອກາດເຂົ້າຮ່ວມສົນທະນາໃນກອງປະຊຸມເວທີສາກົນເພື່ອໂຄສະນາການທ່ອງທ່ຽວລາວ ທີ່ຈັດໂດຍກະຊວງຖະແຫຼງຂ່າວ, ວັດທະນະທໍາ ແລະທ່ຽວ(ຖວທ)ເມື່ອວັນທີ 29 ພຶດສະພາ 2024ນີ້ທີ່ແຂວງອຸດົມໄຊ, ທ່ານນາງ ແສງແກ້ວ ຫົວໜ້າວິທະຍຸໂທລະພາບສູນກາງຈີນ CMG ປະຈໍາລາວໄດ້ປະກອບຄຳເຫັນໃນຫົວຂໍ້“ບົດບາດສື່ມວນຊົນໃນການຊຸກຍູ້ການພັດທະນາວຽກງານການທ່ອງທ່ຽວດ້ວຍຄຸນນະພາບສູງ”.
ກ່ອນອື່ນທ່ານນາງ ແສງແກ້ວ ໄດ້ຍົກໃຫ້ເຫັນກ່ຽວກັບບົດຮຽນຂອງ CMG ໃນການ ລາຍງານຂ່າວທີ່ມີຕໍ່ເສັ້ນທາງລົດໄຟລາວ-ຈີນ ແລະງານກິລາບານເຕະຊົນນະບົດຄືງານ“ຊຸບເປີລີກຊົນນະບົດ” ທີ່ຈັດຂຶ້ນຢູ່ເມືອງຢົງຈ່ຽງແຂວງກຸ້ຍໂຈວສປຈີນແມ່ນໄດ້ຮັບຜົນສຳເລັດເດັ່ນຢ່າງປະຈັກຕາຕໍ່ຜູ້ຊົມແລະຜູ້ຟັງ, ເຊິ່ງເປັນການສະແດງໃຫ້ເຫັນບົດບາດອັນໃຫຍ່ຫຼວງຂອງສື່ມວນຊົນໃນການຊຸກຍູ້ວຽກງານທ່ອງທ່ຽວພັດທະນາດ້ວຍຄຸນນະພາບສູງ.
ທ່ານ ນາງ ແສງແກ້ວ ກ່າວວ່າ: ແນວຄິດໃໝ່ໆຈາກການລາຍງານຂ່າວ ແລະການເຜີຍແຜ່ໂຄສະນາດ້ານສື່ມວນຊົນໃນຍຸກໃໝ່,ຍຸກແຫ່ງສື່ສັງຄົມອອນລາຍມີການຂະ ຫຍາຍຕົວຄວນສຸມໃສ່ 3 ວຽກງານສຳຄັນນີ້ໃຫ້ດີຄື:ໜຶ່ງ, ຍອມຮັບບົດບາດຂອງວິດີໂອສັ້ນໃນຍຸກໃໝ່ດວ້ຍການດຶງດູດໃຫ້ມີຜູ້ຕິດຕາມຢ່າງຫຼວງຫຼາຍ;ສອງ,ລາຍງານປະເດັນຮ້ອນຫຼືຂ່າວເດັ່ນຈາກຫຼາຍມຸມມອງທີ່ແຕກຕ່າງກັນ ເພື່ອເຮັດໃຫ້ປະເດັນເດັ່ນໄດ້ຮັບຄວາມສົນໃຈເທື່ອແລ້ວເທື່ອອີກ; ແລະສາມ,ການເບິ່ງໂຄສະນາ ແລະການສື່ສານຈາກທັດສະນະທີ່ສູງກວ່າ, ນຳໃຊ້ຊັບພະຍາກອນຂອງທຸກຝ່າຍໃຫ້ດີ, ສ້າງຮູບແບບການໂຄສະນາ ແລະການສື່ສານໃຫ້ກວ້າງຂວາງແບບໄຮ້ພົມແດນ.
ທ່ານ ນາງ ແສງແກ້ວ ກ່າວຢໍ້າຕື່ມອີກວ່າ: ໃນຍຸກອິນເຕີເນັດເຄື່ອນທີ່ແລະສື່ສັງຄົມອອນລາຍມີການຂະຫຍາຍຕົວແຮງ, ວິດີໂອສັ້ນແມ່ນມີບົດບາດໂດຍກົງທີ່ ສຸດ,ເຜີຍແຜ່ງ່າຍທີ່ສຸດ, ແລະມີປະສິດທິພາບຫຼາຍທີ່ສຸດ ເມື່ອທຽບກັບປະເພດບົດຂ່າວແລະຮູບພາບນີ້ງ, ເພາະມັນຈະມີຂໍ້ມູນຂ່າວສານຫຼາຍທີ່ສຸດ ແລະແລກປ່ຽນງ່າຍທີ່ສຸດ. ບໍ່ວ່າຈະເປັນສື່ວິຊາການ, ຫຼືສື່ບຸກຄົນ, ຜູ້ໃດກໍສາມາດຖ່າຍທຳໄດ້ທຸກເວລາ ແລະສົ່ງເຂົ້າອິນເຕີເນັດໄດ້ທຸກເວລາ, ມັນງ່າຍທີ່ຈະກາຍ ເປັນຈຸດສຸມຂອງຫາງສຽງ ແລະງ່າຍທີ່ສຸດໃນການສ້າງຈຸດຮ້ອນອອນລາຍ. ສະນັ້ນ, ສື່ມວນຊົນຄວນນຳໃຊ້ບົດ ບາດຂອງວິດີໂອສັ້ນຢ່າງເຕັມທີ່, ບໍ່ພຽງແຕ່ຕ້ອງປັບປຸງລະດັບການວາງແຜນວິດີໂອສັ້ນແລະການຜະລິດໂດຍຜ່ານວິທີການມືອາຊີບເທົ່ານັ້ນ,ຫາກຍັງຕ້ອງຖອດຖອນບົດ ຮຽນນຳວີດີໂອທີ່ດີເດັ່ນຂອງສື່ເອກະຊົນຢ່າງເຕັມທີ່, ຕິດຕາມຈຸດຮ້ອນຢ່າງໃກ້ຊິດ, ເພື່ອເປັນການນຳທາງຫາງສຽງ, ເສີມຂະຫຍາຍທ່າແຮງສື່ສານແບບວິຊາການຂອງຕົນ ແລະເຕົ້າໂຮມເປັນທ່າແຮງການສື່ສານທີ່ມີອິດທິພົນໃຫ້ດີທີ່ສຸດ.
ຖ້າເບິ່ງຈາກງານແຂ່ງຂັນບານເຕະຊຸບເປີລີກຊົນນະບົດແຂວງກຸ້ຍໂຈ່ວແລ້ວ ເຫັນໄດ້ວ່າ: ເລື່ອງນີ້ກາຍເປັນເຫດການເດັ່ນທີ່ໄດ້ຮັບວິວຊົມຢ່າງຫຼວງຫຼາຍຕິດຕໍ່ກັນຫຼາຍຄັ້ງ, ການລາຍງານກ່ຽວກັບງານດັ່ງກ່າວກໍ່ມີຂຶ້ນຕະຫຼອດ, ນອກຈາກມີສາເຫດທີ່ວ່າ ເປັນງານແຂ່ງຂັນດຸເດືອດທີ່ສຸດທີ່ເກີດຂຶ້ນຢູ່ພື້ນບ້ານແລ້ວ,ອີກເຫດຜົນໜຶ່ງແມ່ນຍ້ອນວ່າສື່ມວນຊົນນອກຈາກລາຍງານຂ່າວດັ່ງກ່າວແລ້ວຍັງໄດ້ສຸມໃສ່ລາຍງານກ່ຽວ ກັບປະຕິກິລິຍາຂອງຜູ້ໄປຊົມງານແຂ່ງຂັນ, ສຸມໃສ່ລາຍງານ ໂຄສະນາຜົນຜະລິດກະສິກໍາທ້ອງຖິ່ນທີ່ມີເອກະລັກພິເສດ, ເຜີຍແຜ່ເພງສະໄໝນິຍົມທີ່ຮ້ອງໂດຍພາສາເຜົ່າມົ້ງ, ບົດຟ້ອນພື້ນເມືອງຂອງເຜົ່າມົ້ງ ກໍ່ຄືລາງວັນທີ່ເປັນຜະ ລິດຕະພັນທ້ອງຖິ່ນທີ່ຕິດດິນທີ່ສຸດ ແລະອື່ນໆ ຈັບຕາຜູ້ຊົມເປັນພິເສດ. ເຮັດໃຫ້ການລາຍງານຂ່າວໃນແຕ່ລະຫົວຂໍ້ລ້ວນແຕ່ເປັນທີ່ສົນໃຈຂອງຜູ້ຊົມຜູ້ອ່ານ, ສຸດທ້າຍກໍໄດ້ສ້າງເປັນຍີ່ຫໍ້ໜຶ່ງທີ່ດືງດູດການທ່ອງທ່ຽວໄດ້ດີທີ່ສຸດ.
ທ່ານ ນາງ ແສງແກ້ວ ກ່າວຕື່ມວ່າ: ບໍ່ວ່າຈະເປັນສື່ມວນຊົນສູນກາງ, ສື່ມວນຊົນແຂວງ, ເມືອງ ຫຼືພາກສ່ວນຂອງແຂວງ, ພະແນກການ ແລະ ຫົວໜ່ວຍຕ່າງໆ ລວມທັງສື່ເອກະຊົນ ທີ່ສອດຄ່ອງຕາມຄວາມຕ້ອງການຂອງການສົ່ງເສີມການທ່ອງທ່ຽວ ລ້ວນແລ້ວແຕ່ເປັນກຳລັງແຮງຊຸກຍູ້ການທ່ອງທ່ຽວພັດທະນາໃຫ້ມີຄຸນນະພາບສູງ. ພວກເຮົາຄວນຮຽນຮູ້ວິທີການນຳໃຊ້ທ່າແຮງຂອງຜູ້ອື່ນ, ຮູ້ຈັກໃຊ້ໃຫ້ຖືກບ່ອນ, ຈົນສຸດທ້າຍໄດ້ກາຍເປັນກຳລັງຮ່ວມທີ່ເຂັ້ມແຂງ.
ທ່ານ ນາງ ແສງແກ້ວ ໄດ້ໃຫ້ທັດສະນະວ່າ: CMG ປະຈຳລາວ ຍິນດີຮ່ວມມືກັບທຸກພາກສ່ວນດ້ານວັດທະນະທຳ ແລະການທ່ອງທ່ຽວຂອງລາວທຸກຂັ້ນເພື່ອຮ່ວມກັນຊຸກຍູ້ວຽກງານການທ່ອງທ່ຽວປີ 2024 ໃຫ້ກ້າວສູ່ຜົນສໍາເລັດອັນຍິ່ງໃຫຍ່, ທັງຊຸກຍູ້ການພັດທະນາວຽກງານທ່ອງທ່ຽວວັດທະນະທໍາຂອງລາວຂຶ້ນສູ່ລະດັບໃໝ່ ເພື່ອປະ ກອບສ່ວນເຂົ້າໃນການສ້າງຄູ່ຮ່ວມຊະຕາກໍາຈີນ-ລາວຢ່າງມີຜົນສຳເລັດ.