ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເປັນເຈົ້າພາບຮ່ວມກັບ CNN ຈັດງານລ້ຽງອາຫານທ່ຽງ ໃນໂອກາດ ສປປ ລາວ ເປັນເຈົ້າພາບ ຈັດກອງປະຊຸມທ່ອງທ່ຽວອາຊຽນຄັ້ງທີ 27 ໄດ້ຈັດຂຶ້ນໃນວັນທີ 25 ມັງກອນ ນີ້ ທີ່ໂຮງແຮມແລນມາກ ແມ່ຂອງຣີເວີໄຊ ນະຄອນຫຼວງວຽງຈັນ, ມີບັນດາລັດຖະມົນຕີ ທ່ອງທ່ຽວອາຊຽນ, ທ່ານ ນາງ ຄຣິສຕີ້ ລຸສເທົ້າ (Kristie Lu Stout), ນັກຂ່າວ ແລະ ຜູ້ປະກາດຂ່າວ, ປະຈໍາສໍານັກຂ່າວ CNN ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກ່າວວ່າ: ງານມະຫະກຳການທ່ອງທ່ຽວອາຊຽນ (ATF) ໄດ້ຈັດຂຶ້ນທຸກໆປີ; ສໍາລັບປີ 2024 ນີ້, ສປປ ລາວ ໄດ້ຮັບກຽດເປັນເຈົ້າພາບ ແລະ ເຮັດໃຫ້ພວກເຮົາໄດ້ມາພົບພໍກັນ, ດັ່ງທີ່ພວກເຮົາຮັບຮູ້ນໍາກັນ ແລ້ວວ່າ, ໃນຊຸມປີຜ່ານມາ, ຄວາມຍືນຍົງ ໄດ້ກາຍເປັນບັນຫາສໍາຄັນຂອງທຸກຂະແໜງການໃນທົ່ວໂລກເວົ້າລວມ, ເວົ້າສະເພາະແມ່ນຢູ່ໃນຂົງເຂດພາກພື້ນອາຊຽນຂອງພວກເຮົາກໍໄດ້ຖືເອົາບັນຫາຄວາມຍືນຍົງເປັນຕົວຊີ້ບອກ ໃນການປະເມີນ, ຕີລາຄາການຈັດຕັ້ງປະຕິບັດຍຸດທະສາດໃນໄລຍະສັ້ນ ແລະ ຍາວ. ເພື່ອເຮັດໃຫ້ກອງປະຊຸມ ແລະ ງານມະຫະກຳທ່ອງທ່ຽວອາຊຽນ 2024 ໄດ້ຮັບການຈັດຕັ້ງປະຕິບັດໃຫ້ ສຳເລັດຕາມລະດັບຄາດໝາຍທີ່ວາງໄວ້, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ເຊັນສັນຍາ ຮ່ວມມື ກັບສໍານັກຂ່າວ CNN ເພື່ອຊ່ວຍເຫຼືອໃນການໂຄສະນາກ່ຽວກັບງານ ATF 2024 ແບບບໍ່ເສຍຄ່າ ໂດຍ ມີການນໍາສະເໜີຜ່ານສື່ຊ່ອງທາງຕ່າງໆ ລວມທັງໂທລະພາບ ແລະ ສື່ສັງຄົມອອນລາຍທີ່ຂຶ້ນກັບສຳນັກຂ່າວ CNN. ໃນໄລຍະຜ່ານມາເຫັນວ່າ ການໂຄສະນາກໍສາມາດດຶງດູດ, ເຂົ້າເຖິງກຸ່ມເປົ້າໝາຍ ແລະ ເຮັດໃຫ້ຜູ້ຄົນທົ່ວໂລກໄດ້ຮັບຮູ້ ແລະ ເຂົ້າໃຈກ່ຽວກັບ ສປປ ລາວ ຫຼາຍຂຶ້ນ.
ທ່ານກ່າວຕື່ມວ່າ: ຕາງໜ້າໃຫ້ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເປັນເຈົ້າພາບຮ່ວມກັບ CNN ຈັດງານລ້ຽງອາຫານທ່ຽງໃນຄັ້ງນີ້ ເຊື່ອໝັ້ນວ່າ ຈະໄດ້ສືບຕໍ່ ໃຫ້ຄວາມຮ່ວມມື, ຊ່ວຍເຫຼືອ ເພື່ອປະກອບສ່ວນໃນການພັດທະນາ ອຸດສາຫະກຳການທ່ອງທ່ຽວອາຊຽນໃຫ້ມີຄຸນນະພາບ, ມີຄວາມຮັບຜິດຊອບ ແລະ ມີຄວາມຍືນຍົງ. ຖືເອົາໂອກາດນີ້ແຈ້ງໃຫ້ບັນດາທ່ານ ຊາບວ່າ ສປປ ລາວ ໄດ້ກຳນົດເອົາປີ 2024 ນີ້ ເປັນປີທ່ອງທ່ຽວລາວ. ສະນັ້ນ, ຂໍເຊີນຊວນບັນດາທ່ານ ສະມາ ຊິກຄອບຄົວ ແລະ ເພື່ອນຮ່ວມງານຂອງທ່ານ ມາຢ້ຽມຢາມປະເທດລາວ ເພື່ອມາສໍາຜັດກັບຄວາມງົດງາມ ທາງທຳມະຊາດ, ວັດທະນະທຳທີ່ຫຼາກຫຼາຍ ແລະ ປະຫວັດສາດອັນຍາວນານຂອງລາວ.
(ຂ່າວ-ພາບ: ສຳນານ)
