ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

Covid-19 ເຮັດໃຫ້ລາຄາສິນຄ້າຢູ່ແຂວງຄໍາມ່ວນ ເພີ່ມສູງຂຶ້ນ:

ຈາກການລະບາດຂອງເຊື້ອພະຍາດ Covid-19 ໄດ້ເຮັດໃຫ້ລາຄາສິນຄ້າອຸປະໂພກ-ບໍລິໂພກຢູ່ແຂວງຄໍາມ່ວນ ມີການ ເໜັງຕີງເພີ່ມສູງຂຶ້ນ, ໂດຍສະເພາະແມ່ນ ຜ້າອັດປາກ ແລະ ເຈວລ້າງມື ມີລາຄາເພີ່ມຂຶ້ນຫຼາຍ, ໃນນີ້ ຜ້າອັດປາກ ແມ່ນຂາຍເກີນ 25.000 ກີບຕໍ່ກັບ ຕາມທີ່ລັດຖະບານກໍານົດໄວ້ຫລາຍກ່ວາທົບເຄິ່ງ.

ທ່ານ ບຸນໂຮມ ມຸກດາສັກ, ຫົວໜ້າພະແນກ ອຸດສາຫະກໍາ ແລະ ການຄ້າແຂວງຄໍາມ່ວນ ໃຫ້ຮູ້ວ່າ: ສາເຫດທີ່ເຮັດໃຫ້ລາຄາຜ້າອັດປາກເພີ່ມສູງຂຶ້ນແມ່ນຍ້ອນຄົນຊື້ຫຼາຍ ເຮັດໃຫ້ສິນຄ້າຂາດຕະຫລາດ; ສ່ວນສິນຄ້າປະເພດນໍ້າມັນພືດ, ໝີ່, ອາຫານກະປ໋ອງ ແລະ ອື່ນໆ ກໍ່ມີລາຄາເໜັງຕີງເພີ່ມຂຶ້ນເຊັ່ນດຽວກັນ. ຕົ້ນເຫດຫຼັກໆກໍ່ແມ່ນເນື່ອງຈາກແຂວງ ຄໍາມ່ວນ ໄດ້ປິດດ່ານປະເພນີ ແລະ ດ່ານທ້ອງຖິ່ນທີ່ມີທັງໝົດ 4 ແຫ່ງພາຍໃນແຂວງ ໄວ້ຊົ່ວຄາວ ເພື່ອປ້ອງກັນການແຜ່ລະບາດຂອງເຊື້ອພະຍາດ Covid-19 ຊຶ່ງໄດ້ເຮັດໃຫ້ປະຊາຊົນຈໍານວນໜຶ່ງຢ້ານວ່າ ນອກຈາກຈະປິດດ່ານປະເພນີ ແລະ ດ່ານທ້ອງຖິ່ນໄວ້ຊົ່ວຄາວແລ້ວ ຍັງຈະປິດດ່ານສາກົນຂົວມິດຕະພາບລາວ-ໄທ ແຫ່ງທີ 3 ຕື່ມອີກ ຈຶ່ງພາກັນອອກໄປຊື້ເຄື່ອງອຸປະໂພກ-ບໍລິໂພກຕ່າງໆ ມາກັກຕຸນໄວ້ ຈຶ່ງເຮັດໃຫ້ລາຄາສິນຄ້າມີການເໜັງຕີງເພີ່ມສູງຂຶ້ນເມື່ອທຽບໃສ່ເມື່ອກ່ອນ.

ທ່ານ ບຸນໂຮມ ມຸກດາສັກ ໃຫ້ຮູ້ອີກວ່າ: ເພື່ອແກ້ໄຂບັນຫາທີ່ເກີດຂຶ້ນ, ບັນດາໜ່ວຍງານທີ່ກ່ຽວຂ້ອງຂອງແຂວງ ໄດ້ອອກແຈ້ງການເຖິງຊາວຄ້າຂາຍທັງຫຼາຍ ຫ້າມສວຍໂອກາດຂຶ້ນລາຄາສິນຄ້າເກີນກໍານົດ ແລະ ຫ້າມກັກຕຸນສິນຄ້າຢ່າງເດັດຂາດ ເຊີ່ງຜ່ານມາກໍ່ໄດ້ພົບເຫັນຊາວຄ້າຂາຍຈໍານວນໜຶ່ງກັກຕຸນສິນຄ້າ ແລະ ໄດ້ກ່າວຕັກເຕືອນໃນຂັ້ນເບື້ອງຕົ້ນໄປແລ້ວ ແຕ່ຖ້າຍັງສືບຕໍ່ຝ່າຝືນອີກຕໍ່ໄປ ກໍ່ຈະດໍາເນີນມາດຕະການລົງໂທດຕາມລະບຽບກົດໝາຍທີ່ກໍານົດໄວ້.

ໂດຍ: ບຸນຕຽງ ຈັນທະວົງ