ສປ ຈີນ ເປັນປະເທດທີ່ມີບໍລິສັດກໍ່ສ້າງທີ່ໃຫຍ່ ແລະ ມີຊື່ສຽງລະດັບໂລກ ເນື່ອງຈາກບັນດາບໍລິສັດກໍ່ສ້າງຈາກຈີນ ໄດ້ກໍ່ສ້າງຫລາຍໂຄງການໃຫຍ່ຢູ່ຫລາຍປະເທດທົ່ວໂລກສໍາເລັດ ແລະ ໄດ້ຮັບການຍອມຮັບດ້ານຄຸນນະພາບເປັນຢ່າງດີ. CSCEC (China State Construction Engineering Corporation) ຫລື ບໍລິສັດລັດວິສາຫະ ກິດວິສາວະກໍາກໍ່ສ້າງແຫ່ງລັດຂອງຈີນ ກໍແມ່ນໜຶ່ງໃນບັນ ດາບໍລິສັດໃຫຍ່ອັນດັບຕົ້ນໆ ຂອງໂລກທີ່ມີໂຄງການກໍ່ສ້າງຢູ່ຫລາຍກວ່າ 100 ປະເທດ ແລະ ໄດ້ສໍາເລັດການກໍ່ສ້າງບັນດາໂຄງການໃຫຍ່ມາແລ້ວຢ່າງຫລວງຫລາຍ.
ເມື່ອບໍ່ດົນມານີ້, ສື່ມວນຊົນຕ່າງປະເທດເກືອບ 100 ຄົນ ຈາກຫລາຍກວ່າ 50 ປະເທດ ໄດ້ເດີນທາງໄປ ຢ້ຽມຢາມບໍລິສັດດັ່ງກ່າວທີ່ນະຄອນຫລວງປັກກິ່ງ ແລະ ໄດ້ຮັບຟັງກ່ຽວກັບການດໍາເນີນງານຂອງບໍລິສັດດັ່ງກ່າວຈາກບັນດາຜູ້ຕາງໜ້າທີ່ກ່ຽວຂ້ອງ.
CSCEC ໄດ້ຮັບການສ້າງຕັ້ງຂຶ້ນໃນປີ 1982, ມີສໍານັກງານໃຫຍ່ຕັ້ງຢູ່ນະຄອນຫລວງປັກກິ່ງ. ປັດຈຸບັນເປັນກຸ່ມລົງທຶນ ແລະ ກໍ່ສ້າງທົ່ວໂລກທີ່ມີການພັດທະນາແບບມືອາຊີບ ແລະ ການດໍາເນີນງານທີ່ເນັ້ນໃສ່ດ້ານການຕະຫຼາດ ເຊີ່ງດໍາເນີນກິດຈະການຜ່ານບໍລິສັດມະຫາຊົນທີ່ມີ 8 ບໍລິສັດຈົດທະບຽນ ແລະ ມີຫລາຍກວ່າ 100 ບໍລິສັດຍ່ອຍຮ່ວມຖືຮຸ້ນ ໂດຍດໍາເນີນທຸລະກິດທີ່ກວມເອົາຫລາຍຂົງ ເຂດການກໍ່ສ້າງ ເຊັ່ນ: ອາຄານສາທາລະນະ, ຫ້ອງການ, ສະໜາມບິນ, ໂຮງແຮມ, ວິທະຍາສາດ ແລະ ການສຶກສາ, ກິລາ, ທີ່ຢູ່ອາໄສ, ສະຖາບັນການແພດ, ສະຖານທູດ ແລະ ອື່ນໆ ໂດຍສະເພາະແມ່ນອາຄານທີ່ມີຄວາມສູງ ທັງຢູ່ພາຍໃນ ແລະ ຕ່າງປະເທດ ທີ່ການອອກແບບ ແລະ ການກໍ່ສ້າງທີ່ທັນສະໄໝ, ຄົບວົງຈອນ ແລະ ໄດ້ມາດຕະຖານສາກົນ ໂດຍຢຶດໝັ້ນໃນຍຸດທະສາດການຕະຫລາດ ຄື: “ເຈົ້າຂອງໃຫຍ່, ຕະ ຫລາດໃຫຍ່ ແລະ ໂຄງການໃຫຍ່” ແລະ ຍຸດທະສາດການບໍລິການຄຸ້ມຄອງບໍລິຫານວິສາຫະ ກິດ ຄື: “ການແຂ່ງຂັນຕົ້ນທຶນຕໍ່າ ແລະ ການບໍລິຫານຈັດ ການທີ່ມີຄຸນນະພາບສູງ”.
CSCEC ໄດ້ດໍາເນີນທຸລະກິດຢູ່ຫຼາຍກວ່າ 100 ປະເທດ ແລະ ພາກພື້ນໃນໂລກ, ໃນນີ້ ສະເພາະສະໜາມບິນຢູ່ພາຍ ໃນປະເທດຈີນ, 75% ແມ່ນ CSCEC ເປັນຜູ້ກໍ່ສ້າງ ເຊີ່ງທຸກໂຄງການລ້ວນແຕ່ສໍາເລັດຕາມເວລາທີ່ກໍານົດ ແລະ ຮັບປະກັນດ້ານຄຸນນະພາບ. ຂະນະດຽວກັນ ບໍລິສັດດັ່ງກ່າວຍັງເປັນຕົວແທນ ແລະ ເປັນຜູ້ນໍາໜ້າຂອງໂຄງການໜຶ່ງແລວໜຶ່ງເສັ້ນທາງຂອງຈີນຕື່ມອີກ.
ບັນດາໂຄງການໃຫຍ່ທີ່ CSCEC ກໍ່ສ້າງສໍາເລັດໃນຫລາຍກວ່າ 100 ປະເທດທົ່ວໂລກໃນໄລຍະຜ່ານມາ ມີຢ່າງຫລວງຫລາຍ ເປັນຕົ້ນ: ສະໜາມບິນແຫ່ງຊາດຂອງກໍາປູເຈ່ຍ, ສະໜາມບິນສຸວັນນະພູມຂອງໄທ, ຫໍຄອຍສັນຍາລັກຢູ່ມາເລເຊຍ, ອາຄານຂອງລັດຖະບານຢູ່ສິງກະໂປ, SUDIRMAN7 Sudirman 7 ຢູ່ອິນໂດເນເຊຍ, ໂຄງການ AVIC Astoria ຢູ່ສີລັງກາ, ໂຮງແຮມ Viceroy ຢູ່ສະຫະ ລັດອາຣັບ ເອມີເຣດ (UAE) ແລະ ອື່ນໆ.
ສໍາລັບຢູ່ ສປປ ລາວ, CSCEC ໄດ້ກໍ່ສ້າງຫໍປະຊຸມແຫ່ງ ຊາດລາວ, ຕັ້ງຢູ່ນະຄອນຫລວງວຽງຈັນ ເຊີ່ງໄດ້ຮັບທຶນຊ່ວຍເຫລືອຈາກລັດຖະບານຈີນ ເພື່ອຮອງຮັບການເປັນເຈົ້າພາບຈັດກອງປະຊຸມສຸດຍອດອາເຊັມ ຄັ້ງທີ 9 ຂອງລາວ ທີ່ຈັດຂຶ້ນໃນລະຫວ່າງວັນທີ 5-6 ເດືອນພະຈິກ ປີ 2012. ຫໍປະຊຸມດັ່ງກ່າວມີເນື້ອທີ່ 3.450 ຕາແມັດ, ປະ ກອບມີຫ້ອງໃຫຍ່ ສາມາດບັນຈຸໄດ້ 800-1.000 ຄົນ, ຫ້ອງປະຊຸມນ້ອຍ, ຫ້ອງຮັບແຂກລະດັບສໍາຄັນ ແລະ ອື່ນໆ ໂດຍເລີ່ມລົງມືກໍ່ສ້າງໃນທ້າຍປີ 2017 ແລະ ສໍາເລັດພາຍໃນ 24 ເດືອນຕາມທີ່ກໍານົດໄວ້.
ຍ້ອນມີຜົນງານຢ່າງຫລວງຫລາຍ ແລະ ການກໍ່ສ້າງທີ່ໄດ້ມາດຕະຖານສາກົນ ຈິ່ງເຮັດໃຫ້ CSCEC ໄດ້ຮັບລາງວັນຕ່າງໆ ທັງຢູ່ພາຍໃນປະເທດຈີນ ແລະ ລະດັບສາກົນຢ່າງຫລວງຫລາຍ. ນອກຈາກນີ້ ຈາກການຈັດອັນດັບຈໍານວນ 250 ບໍລິສັດທີ່ຮັບເໝົາກໍ່ສ້າງໃນປີ 2022 (The 2022 ENR: Engineering News-Record) ປະກົດວ່າ: CSCEC ໄດ້ດັບທີ 1 ເປັນເວລາ 7 ປີ ຕິດຕໍ່ກັນ ໂດຍວັດຈາກລາຍຮັບຂອງສັນຍາການກໍ່ສ້າງໃນຮັບທົ່ວໂລກ.
