ບໍລິສັດກໍ່ສ້າງໄຟຟ້າ ແຫ່ງ ສປ ຈີນ (POWERCHINA) ເປັນບໍລິສັດຂອງລັດທີ່ບໍລິຫານງານໂດຍຄະນະກໍາມະການຄຸ້ມຄອງ ແລະ ບໍລິຫານຊັບສິນຂອງຈີນ ໄດ້ຮັບການສ້າງຕັ້ງຂຶ້ນໃນວັນທີ 29 ກັນຍາ 2011, ເຊີ່ງເປັນກຸ່ມກໍ່ສ້າງແບບລວມສູນ ເພາະປະກອບດ້ວຍຫລາຍຮ້ອຍບໍລິສັດທີ່ສະຫນອງການລົງທຶນ ແລະ ການສະໜອງທຶນ, ການວາງແຜນອອກແບບ, ວິສະວະກໍາກໍ່ສ້າງ, ການຜະລິດອຸປະກອນ, ຄຸ້ມຄອງການດໍາເນີນງານສໍາລັບໂຄງການໄຮໂດຣລິກ ແລະ ໂຄງ ການໄຟຟ້າພະລັງງານນໍ້າ, ການກໍ່ສ້າງພື້ນຖານໂຄງລ່າງ ແລະ ອື່ນໆ. ນອກຈາກນີ້ ໂດຍໄດ້ຮັບການອະນຸຍາດຈາກກະຊວງການຕ່າງປະເທດ/ຄະນະກໍາມະການທີ່ກ່ຽວຂ້ອງ, POWERCHINA ຍັງເຮັດຫນ້າທີ່ຕ່າງໆ ເຊັ່ນ: ການວາງແຜນແຫ່ງຊາດ ແລະ ການທົບທວນຄືນພະລັງງານໄຟຟ້ານໍ້າຕົກ, ພະລັງງານລົມ, ພະລັງງານແສງຕາເວັນ ແລະ ພະລັງງານທີ່ສະ ອາດ ແລະ ແຫຼ່ງພະລັງງານໃຫມ່.
POWERCHINA ຈັດຢູ່ອັນດັບໜຶ່ງຂອງໂລກໃນດ້ານອຸດສາຫະກໍາກໍ່ສ້າງໄຟຟ້າໃນດ້ານການວາງແຜນ, ການອອກແບບ ແລະ ການກໍ່ສ້າງ, ລວມເຖີງດ້ານຄຸນນະພາບ. ນອກ ຈາກນີ້ ໃນປີ 2022 ບໍລິສັດດັ່ງກ່າວນີ້ໄດ້ຈັດຢູ່ອັນດັບທີ 100 ໃນຈໍານວນ 500 ບໍລິສັດທີ່ມີການຈັດອັນດັບ (Fortune 500), ຈັດຢູ່ອັນດັບທີ 15 ໃນຈໍານວນ 100 ບໍລິ ສັດຂ້າມປະເທດທີ່ດີເດັ່ນໃນປະເທດຈີນ ແລະ ອື່ນໆ.
ເມື່ອບໍ່ດົນມານີ້, ສື່ມວນຊົນຫລາຍກວ່າ 40 ຄົນຈາກຫລາຍກວ່າ 20 ປະເທດໃນອາຊີປາຊີຟຼິກ ແລະອາຟຼິກາ ໄດ້ເດີນທາງໄປຢ້ຽມຢາມບໍລິສັດດັ່ງກ່າວ ແລະ ໄດ້ຮັບຟັງການລາຍງານຈາກຄະນະຮັບຜິດຊອບຂອງບໍລິສັດວ່າ: POWERCHINA ໄດ້ລົງທຶນຢູ່ຫລາຍປະເທດທົ່ວໂລກ ທັງໃນອາຟຼິກກາ, ອາເມລິກາລາຕີນ, ຢູໂຣເຊຍ, ອາຊີຕາເວັນ ອອກສ່ຽງໃຕ້ ແລະ ອື່ນໆ. ໃນທ້າຍປີ 2021, ທຸລະກິດຂອງບໍລິສັດໄດ້ກວມເອົາ 131 ປະເທດ ແລະ ຈໍານວນສັນຍາທັງໝົດສໍາລັບໂຄງການທີ່ພວມຢູ່ໃນໄລຍະກໍ່ສ້າງຫລາຍກວ່າ 100 ຕື້ໂດລາສະຫະລັດ.
ສໍາລັບຢູ່ໃນອາຊີຕາເວັນອອກສ່ຽງໃຕ້, POWERCHINA ໄດ້ດໍາເນີນທຸລະກິດຕາມປັດຊະຍາທີ່ເນັ້ນຄວາມຍືນຍົງທາງດ້ານສິ່ງແວດລ້ອມເປັນສໍາຄັນ ແລະ ໄດ້ເຂົ້າມາລົງທຶນໃນຂົງເຂດນີ້ເປັນເວລາຫລາຍກວ່າ 20 ປີແລ້ວ ໂດຍມີການລົງທຶນຢູ່ຫວຽດນາມ, ມາເລເຊຍ, ອິນໂດເນເຊຍ, ລາວ, ໄທ, ກໍາປູເຈຍ, ມຽນມາ ແລະ ຟິລິບປິນ ເຮັດໃຫ້ລັດວິສາ ຫະກິດຂອງຈີນເຂົ້າມາມີບາດບາດ ແລະ ປະກອບສ່ວນສໍາຄັນໃນການພັດທະນາເສດຖະກິດຂອງປະເທດເຫລົ່ານີ້, ໃນນັ້ນທີ່ເດັ່ນ ແລະ ຮູ້ຈັກກັນດີ ແມ່ນໂຄງການພະລັງງານແສງຕາເວັນ Dau Tieng ໃນປະເທດຫວຽດນາມ ເຊີ່ງເປັນໂຄງ ການພະລັງງານແສງຕາເວັນໃຫຍ່ທີ່ສຸດເທົ່າທີ່ເຄີຍລົງທຶນໃນອາຊີຕາເວັນອອກສ່ຍງໃຕ້ ແລະ ໄດ້ຮັບລາງວັນພະລັງງານແຫ່ງອາຊຽນ (Asian Power Award ) ປະຈໍາປີ 2019 ເຮັດໃຫ້ໂຄງການນີ້ບໍ່ພຽງແຕ່ເປີດໂອກາດໃຫ້ POWERCHINA ກາຍເປັນຜູ້ນໍາດ້ານພະລັງານເທົ່ານັ້ນ ແຕ່ຍັງເປັນປັດໃຈສໍາຄັນທີ່ຂັບເຄື່ອນໃຫ້ຕະຫລາດພະລັງ ງານໝູນວຽນຂອງຫວຽດນາມເຕີບໃຫຍ່ຂະຫຍາຍຕົວຢ່າງວ່ອງໄວອີກດ້ວຍ.
ຄະນະຮັບຜິດຊອບຂອງບໍລິສັດຂອງ POWERCHINA ໃຫ້ຮູ້ຕື່ມວ່າ: ສໍາລັບການລົງທຶນຢູ່ ສປປ ລາວ, POWERCHINA ໄດ້ສ້າງຕັ້ງຫ້ອງການທີ່ເປັນຕົວແທນບໍລິສັດຢູ່ລາວແຕ່ປີ 1996 ເຊີ່ງມາຮອດປັດຈຸບັນໄດ້ລົງທຶນຢູ່ລາວແລ້ວ 130 ໂຄງການ, ມູນຄ່າ 4,38 ຕື້ໂດລາສະຫະ ລັດ, ໃນນີ້ ທີ່ສໍາຄັນ ແມ່ນການກໍ່ສ້າງເຂື່ອນໄຟຟ້ານໍ້າຕົກນໍ້າອູຢູ່ພາກເຫນືອຂອງລາວ ເຊີ່ງມີກໍາລັງຕິດຕັ້ງລວມ 1.272 MW, ສາມາດຜະລິດໄຟສະເລ່ຍໄດ້ 5.000GWh/ປີ ເຊີ່ງເປັນໂຄງການລົງທຶນຕ່າງປະເທດແຫ່ງທໍາອິດທີ່ກວມເອົາທັງສາຍນໍ້າເຊີ່ງປະກອບມີ 7 ເຂື່ອນຂອງວິສາຫະກິດຂອງຈີນ.
ນອກຈາກນີ້ POWERCHINA ຍັງໄດ້ປະກອບສ່ວນໃນໂຄງການກໍ່ສ້າງທາງລົດໄຟລາວ-ຈີນ ໂດຍໄດ້ຮັບເໝົາກໍ່ສ້າງໃນສັນຍາທີ 5 ທີ່ບໍລິສັດດັ່ງກ່າວຊະນະການປະມູນສໍາເລັດຕາມຄາດໝາຍທີ່ກໍານົດໄວ້ ແລະ ໂຄງການອື່ນໆ ເຊີ່ງນອກຈາກດໍາເນີນທລຸະກິດແລ້ວບັນດາໂຄງການເຫລົ່ານັ້ນຍັງໄດ້ປະກອບສ່ວນຊ່ວຍເຫລືອຫລາຍດ້ານໃຫ້ແກ່ປະເທດລາວ ທັງທາງດ້ານການກໍ່ສ້າງພື້ນຖານໂຄງລ່າງ, ຊ່ວຍປັບປຸງຊີວິດການເປັນຢູ່ຂອງປະຊາຊົນໃນເຂດໃກ້ຄຽງໂຄງການ, ການສ້າງວຽກເຮັດງານທໍາໃຫ້ແຮງງານລາວ ແລະ ອື່ນໆ.
Cr: BT