USAID ແລະ UNDP ສະໜັບສະໜູນການຫັນເປັນທັນສະໄໝ ໃນ ສພຂ

ອົງການພັດທະນາສາກົນ ຂອງສະຫະລັດອາເມລິກາ (USAID) ແລະ ອົງການສະຫະປະຊາຊາດ ເພື່ອການພັດທະນາ (UNDP) ປະຈຳ ສປປລາວ ມອບອຸປະກອນ ໄອຊີທີ ແລະ ພາຫະນະໃຫ້ແກ່ສະພາປະຊາຊົນ ຂັ້ນແຂວງ (ສພຂ) ທົ່ວປະເທດ ລວມມູນຄ່າ 702,696 ໂດລາສະຫະລັດ ໂດຍຜ່ານການຮ່ວມມືໃນໂຄງການສ້າງຄວາມເຂັ້ມແຂງ ໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs).

ພິທີມອບ-ຮັບ ໄດ້ຈັດຂຶ້ນໃນວັນສຸກ ທີ 07 ມິຖຸນາ 2024 ທີ່ສະພາແຫ່ງຊາດ (ສພຊ), ຕາງໜ້າມອບໂດຍທ່ານ ໄມໂຄຣ ຊິບເຟີ ຮອງຜູ້ອຳນວຍການຝ່າຍບໍລິຫານອົງການພັດທະນາສາກົນ ປະເທດສະຫະລັດອາເມລິກາ ປະຈຳພາກພື້ນອາຊີ ແລະ ຕາງໜ້າຮັບໂດຍທ່ານ ປອ. ບຸນທັນ ບຸນວິໄລ ຮອງເລຂາທິການສະພາແຫ່ງຊາດ ໂດຍມີການນຳຂັ້ນສູງຈາກ ສພຊ ແລະ ສພຂ, ເຈົ້າໜ້າທີ່ກ່ຽວຂ້ອງຈາກສະຫະລັດອາເມລິກາ, ຜູ້ຕາງໜ້າ UNDP ແລະ ພະນັກງານໂຄງການສະເຕັບສ໌ ເຂົ້າຮ່ວມເປັນສັກຂີພະຍານ.