ໄຫຫຼໍາ (ໄຫໜານ) ເປັນແຂວງເຊິ່ງເປັນເກາະຢູ່ໃຕ້ສຸດຂອງຈີນ ທີ່ຂຶ້ນຊື່ລືນາມດ້ານການທ່ອງທ່ຽວ ແລະ ເປັນທີ່ຍອມຮັບເປັນຢ່າງດີຈາກນັກທ່ອງທ່ຽວຕ່າງປະເທດ. ໃນນີ້ ເວົ້າສະເພາະເລື່ອງທີ່ພັກພາຍໃນແຂວງດັ່ງກ່າວ ແມ່ນມີຫລາກຫລາຍປະເພດ ແລະ ຫລາກຫລາຍລະດັບ, ເຊິ່ງໜຶ່ງໃນນັ້ນແມ່ນການພັກແຮມຢູ່ເຮືອນປະຊາຊົນ ຫລື ເອີ້ນວ່າ: Home Stay ໂດຍສະເພາະການພັກແຮມນໍາປະຊາຊົນຢູ່ບ້ານຢາວເສີງ (Yao Cheng) ເຊິ່ງໄດ້ຮັບການຍອມຮັບວ່າເປັນແຫລ່ງທ່ອງທ່ຽວແບບນິເວດທີ່ດີໃນຊົນນະບົດຂອງແຂວງໄຫຫຼຳ.
ບ້ານ Yao Cheng ແມ່ນໜຶ່ງໃນຫລາຍບ້ານປະຫວັດສາ ແລະ ວັດທະນະທໍາທີ່ມີຊື່ສຽງທີ່ຕັ້ງຢູ່ນະຄອນໄຫໂຂວ, ແຂວງໄຫຫຼໍາ, ສປ ຈີນ ເຊິ່ງໄດ້ຮັບການສ້າງຕັ້ງຂຶ້ນໃນລາດຊະວົງໝິງ ແລະ ຈະເລີນຮຸ່ງເຮືອງໃນລາດຊະວົງຊິງ.
ເມື່ອບໍ່ດົນມານີ້ ສື່ມວນຊົນຈີນ-ອາຊຽນ ຫລາຍກວ່າ 50 ຄົນ ທີ່ເຂົ້າຮ່ວມກິດຈະກໍາ “ຄູ່ຮ່ວມສື່ມວນຊົນອາຊຽນ ເບິ່ງຈີນຮ່ວມກັນ” ແລະ ໄດ້ໄປຢ້ຽມຢາມບ້ານດັ່ງກ່າວ ແລະ ໄດ້ຮັບຟັງການລາຍງານຈາກພະນັກງານນຳທ່ຽວປະຈຳບ້ານວ່າ: ບ້ານຢາວເສີງ ມີປະຫວັດຄວາມເປັນມາຍາວນານມານັບຮ້ອຍປີ, ເຊິ່ງປະຊາຊົນມີອາຊີບເປັນຊາວກະສິກອນ ໂດຍສະເພາະການປູກຝັງ. ເມື່ອກ່ອນເຂດນີ້ເປັນເຂດຊົນນະບົດທີ່ທຸກຍາກ ໄປມາຫາສູ່ກັນລຳບາກ.
ມາຮອດປີ 1999 ປະຊາຊົນໄດ້ເລີ່ມຍົກຍ້າຍພ່າຍໜີ, ປະເຮືອນຊານໃຫ້ເປັນເຮືອນຮ້າງ ແລະ ປະໄຮ່ນາຕາກ້າຮົ້ວສວນໄປອາໄສຢູ່ເຂດອື່ນ ຍ້ອນດິນດອນຕອນຫຍ້າເປັນດິນເຄັມດ່າງ ເພາະໄດ້ຮັບອິດທິພົນຈາກການກັດເຊາະຂອງນ້ຳທະເລ ແຕ່ຍ້ອນເຫັນໄດ້ຄວາມອຸດົມສົມບູນຂອງທຳມະຊາດ ໃນເນື້ອທີ່ 680 ກວ່າເຮັກຕ່າຂອງບ້ານເກົ່າແຫ່ງນີ້, ບວກກັບຄວາມເປັນເອກະລັກຂອງເຮືອນບູຮານທີ່ຫາຊົມໄດ້ຍາກ.
ຕົກມາປີ 2019 ອົງການປົກຄອງເຂດ ເໝີຍຫລານ ຈຶ່ງໄດ້ລົງທຶນມູນຄ່າ 170 ລ້ານຢວນ ເພື່ອຟື້ນຟູບ້ານເກົ່າແກ່ຢາວເສີງ ໃຫ້ເປັນບ້ານທ່ອງທ່ຽວແບບອະນຸລັກນິເວດວິທະຍາ ໂດຍໄດ້ປັບປຸງເຮືອນໃຫ້ເປັນເຮືອນພັກແຮມສຳລັບນັກທ່ອງທ່ຽວ, ປັບປຸງດິນໃຫ້ສາມາດເພາະປູກພືດຊະນິດຕ່າງໆ, ໄດ້ ປະດັບປະດາ ແລະ ສ້າງສິ່ງອຳນວຍຄວາມສະດວກຕ່າງໆ ຈົນເຮັດໃຫ້ ບ້ານຢາວເສີງ ມີສີສັນໃໝ່ໃນຊົນນະບົດ ກາຍເປັນທີ່ຮູ້ຈັກຂອງສັງຄົມ ແລະໃນທີ່ສຸດກໍເປັນໄດ້ກາຍ ເປັນບ່ອນພັກແຮມນໍາປະຊາຊົນ ຫລື ໂຮມສະເຕ່ທີ່ນັບມື້ນັບມີຊື່ສຽງ ແລະ ໄດ້ຮັບການຕອບຮັບເປັນຢ່າງດີຈາກນັກທ່ອງທ່ຽວທັງພາຍໃນ ແລະ ຕ່າງປະເທດ.
ບ້ານຢາວເສີງ ມີຫ້ອງພັກສໍາລັບ້ອນຮັບນັກທ່ອງທ່ຽວ 82 ຫ້ອງ/ຫລັງ, ມີຫລາຍກວ່າ 100 ຕຽງ ໃນລາຄາ 800 ຢວນ/ຄືນ/ຫລັງ. ໃນເຮືອແຕ່ລະຫລັງແມ່ນມີການຕົກແຕ່ງຕາມແບບຈີນບູຮານ, ປະດັບປະດາດ້ວຍຮູບພາບ, ຂຽນບົດກອນ ແລະ ຄຳສຸພາສີດບູຮານທີ່ມີເນື້ອໃນສື່ເຖິງການສັ່ງສອນລູກຫລານ ເປັນຄະຕິເຕືອນໃຈໃຫ້ແກ່ການດຳລົງຊີວິດ ແລະອື່ນໆ ນັກທ່ອງທ່ຽວນິຍົມມາພັກຜ່ອນເປັນຄອບຄົວ ມາຈັດປະຊຸມຈັດສຳມະນາ ແລະກິດຈະກຳອື່ນຕາມລະດູການທ່ອງທ່ຽວຂອງຈີນ, ໃນນີ້ ສະເພາະໂອກາດວັນສໍາຄັນຕ່າງໆ ນັກທ່ອງທ່ຽວ ໄດ້ມາພັກອາໃສເຕັມທຸກຫລັງ.
ດັ່ງນັ້ນ, ຖ້າຫາກທ່ານໃດໄດ້ເດີນທາງໄປທ່ອງທ່ຽວທີ່ນະຄອນໄຫໂຂວ, ແຂວງໄຫຫຼໍາ, ສປ ຈີນ ບ່ອນພັກແຮມນໍາປະຊາຊົນ Yao Cheng ຄວນຫາໂອກາດໄປສໍາຄັນ ຫລື ພັກຜ່ອນຢູ່ສະຖານທີ່ແຫ່ງນີ້ ຮັບຮອງຈະບໍ່ຜິດຫວັງ ແລະ ຈະຫລົງໄຫລຕໍ່ຄວາມສວຍງາມຂອງທຳມະຊາດ, ຄວາມມີເອກະລັກຂອງການຈັດສັນຜັງ ແລະເຮືອນຢູ່ອາໄສ ຕາມແບບສະຖາປັດຕະຍາກຳສວນຈີນບູຮານຂອງບ້ານດັ່ງກ່າວນີ້ຢ່າງແນ່ນອນ.
