ກອງປະຊຸມຄະນະປະຈຳສະພາແຫ່ງຊາດ ປະຈຳເດືອນມິຖຸນາ 2024 ໄດ້ດໍາເນີນໃນລະຫວ່າງວັນທີ 08-10 ກໍລະກົດ 2024 ໂດຍການເປັນປະທານຂອງ ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານຄະນະປະຈໍາສະພາແຫ່ງຊາດ, ມີຮອງປະທານຄະນະປະຈໍາສະພາແຫ່ງຊາດ ແລະ ກຳມະການຄະນະປະຈໍາສະພາແຫ່ງຊາດ, ບັນດາລັດຖະມົນຕີ, ຮອງລັດຖະມົນຕີກະຊວງ, ອົງການທີ່ກ່ຽວຂ້ອງ ເຂົ້າຮ່ວມ.
ກອງປະຊຸມຄັ້ງນີ້, ໄດ້ພິຈາລະນາບັນຫາສໍາຄັນພື້ນຖານຂອງປະເທດຊາດ ຕາມທີ່ໄດ້ກໍານົດໄວ້ໃນລັດຖະທໍາມະນູນ, ກົດໝາຍ ເປັນຕົ້ນ ການສະເໜີຂອງລັດຖະບານກ່ຽວກັບການຫັນປ່ຽນທີ່ດິນປ່າໄມ້ທຳມະຊາດ ໄປເປັນດິນປະເພດອື່ນ ແລະ ຂໍຍົກເວັ້ນຄ່າທຳນຽມໃນການຫັນປ່ຽນທີ່ດິນປ່າໄມ້ ຢູ່ເຂດບ້ານປັກແຮດ ເມືອງນາຊາຍທອງ ນະຄອນຫລວງວຽງຈັນ ເພື່ອສ້າງຕັ້ງໂຮງຮຽນເຫລົ່າຮົບ; ລາຍງານຄວາມຄືບໜ້າການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ; ການສະເໜີແຕ່ງຕັ້ງຜູ້ພິພາກສາ ແລະ ຮອງປະທານສານປະຊາຊົນທ້ອງຖິ່ນ, ການສະເໜີຮັບຮອງເອົາການສ້າງຕັ້ງສານປະຊາຊົນເຂດ II ແຂວງເຊກອງ ຕາມໜັງສືສະເໜີຂອງສານປະຊາຊົນສູງສຸດ; ລາຍງານຜົນການຄົ້ນຄວ້າໜັງສືສະເໜີການປັບປຸງຮ່າງດຳລັດວ່າດ້ວຍການຄຸ້ມຄອງທຸລະກິດຄາຊິໂນ; ລາຍງານບາງເນື້ອໃນກົດໝາຍ ທີ່ຕິດພັນກັບກົດໝາຍວ່າດ້ວຍການສົ່ງເສີມການລົງທຶນ; ລາຍງານການກະກຽມຮອບດ້ານ ໃຫ້ແກ່ການເປັນເຈົ້າພາບກອງປະຊຸມສະມັດຊາໃຫຍ່ ລັດຖະສະພາລະຫວ່າງຊາດອາຊຽນ ຫລື ໄອປາ (AIPA) ຄັ້ງທີ 45; ລາຍງານຜົນສຳເລັດການຕ້ອນຮັບ ຮອງປະທານສະພາແຫ່ງຊາດ ສສ ຫວຽດນາມ; ລາຍງານແຜນການຕິດຕາມກວດກາການຈັດຕັ້ງປະຕິບັດຍຸດທະສາດ ການປະຕິຮູບລະບົບການສຶກສາ ແລະ ການພັດທະນາຊັບພະຍາກອນມະນຸດແຫ່ງຊາດ; ລາຍງານຜົນສຳເລັດ ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດຊຸດທີ IX; ລາຍງານຮ່າງມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດບັນດາຄາດໝາຍ ຂອງວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ.
ນອກນັ້ນ, ຍັງໄດ້ຮັບຟັງລາຍງານການປັບປຸງ 3 ຮ່າງມະຕິຄື: ຮ່າງມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດ ທະນາເສດຖະກິດ-ສັງຄົມແຫ່ງຊາດ ໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024; ຮ່າງມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ແລະ ແຜນເງິນຕາ ໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ແລະ ຮ່າງມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຄວາມຄືບໜ້າການແກ້ໄຂຕາມຜົນການກວດສອບ ປະຈຳປີ 2023 ຂອງອົງ ການກວດສອບແຫ່ງລັດ.
ຂ່າວ-ພາບ: ສພຊ
