ເມື່ອບໍ່ດົນມານີ້, ການນຳແຂວງວຽງຈັນ ແລະ ການນຳເມືອງໂພນໂຮງ ນຳໂດຍ ທ່ານ ສົມປະສົງ ສຸວົງຄຳຈັນ ກຳມະການພັກແຂວງ, ເລຂາພັກເມືອງ, ເຈົ້າເມືອງໂພນໂຮງມີ ພະອາຈານ ໃຫຍ່ຕຸ໋ງ ຈັນທະວົງ ກຳມະການສູນກາງ ອພສ ຮັກສາການ ປະທານ ອພສ ແຂວງວຽງຈັນ ພ້ອມຄະນະ ໄດ້ລົງຕິດຕາມ ແລະ ມອບເຄື່ອງຊ່ວຍເຫລືອຜູ້ປະສົບໄພນ້ຳຖ້ວມຢູ່ແຂວງຫລວງນ້ຳທາ ມູນຄ່າ 370 ລ້ານກີບ.
ໂອກາດນີ້, ທ່ານ ສີວິໄລ ປັນແກ້ວ ຮອງເຈົ້າແຂວງຫລວງນ້ຳທາ ກໍໄດ້ລາຍງານໃຫ້ຊາບສະພາບການແກ້ໄຂເບື້ອງຕົ້ນ, ການຕິດຕາມສະຖານະການຫລັງຈາກນໍ້າບົກແຫ້ງ, ການໃຫ້ຄວາມຊ່ວຍເຫລືອປະຊາຊົນ ໂດຍອົງການປົກຄອງແຂວງ, ບັນດາເມືອງ, ບ້ານ, ທຸກພາກສ່ວນທົ່ວສັງຄົມ ໄດ້ເອົາໃຈລົງຊ່ວຍເຫລືອປະຊາຊົນຂັ້ນເບື້ອງຕົນ ໂດຍສະເພາະຢູ່ເມືອງຫລວງນ້ຳທາ ມີ 5 ບ້ານທີ່ໄດ້ຮັບຜົນກະທົບໜັກ, ປັດຈຸບັນ ຢູ່ໄລຍະທີ 2 ຂອງການຊ່ວຍເຫລືອປະຊາຊົນ ໃນການຟື້ນຟູສະພາບແວດລ້ອມ ແລະ ສັງລວມຜົນກະທົບຕ່າງໆລະອຽດ ເພື່ອນຳສະເໜີຂັ້ນເທິງຊອກວິທີການແກ້ໄຂໃຫ້ທັນສະພາບການ, ໄລຍະຜ່ານມາທຸກພາກສ່ວນໄດ້ໃຫ້ຄວາມຊ່ວຍເຫລືອປະຊາຊົນຫລາຍຮູບແບບເຊັ່ນ: ໃຫ້ການແຈກຢ້າຍເຂົ້າສານ, ອາຫານ, ຢາ ແລະ ສິ່ງຂອງທີ່ຈຳເປັນ. ພ້ອມນີ້, ຍັງໄດ້ປຸກລະດົມປວງຊົນພາຍໃນແຂວງ, ຕ່າງແຂວງ, ຂັ້ນສູນກາງໃຫ້ຄວາມຊ່ວຍເຫລືອ ເຮັດໃຫ້ປະຊາຊົນໄດ້ຮັບການຊ່ວຍເຫລືອຢ່າງທົ່ວເຖິງ.
ພ້ອມກັນນີ້, ຄະນະນຳຂອງແຂວງ, ເມືອງ, ຄະນະພະສົງ ຈາກແຂວງວຽງຈັນ ຍັງໄດ້ມອບເຄື່ອງຊ່ວຍເຫລືອໃຫ້ປະຊາຊົນ 5 ບ້ານທີ່ໄດ້ຮັບຜົນກະທົບໜັກຄື: ປະຊາຊົນບ້ານວຽງໄຕ້, ບ້ານທ່າອໍ, ບ້ານໃໝ່, ບ້ານປ່າສັກ, ບ້ານດອນຄູນ ແລະ ບ້ານຂອນນາ ເພື່ອປະກອບສ່ວນຟື້ນຟູຊີວິດການເປັນຢູ່ ແລະ ເຮືອນຊານໃຫ້ກັບຄືນສູ່ສະພາບທີ່ດີຂຶ້ນ.
