ກອງປະຊຸມຄະນະຜູ້ແທ່ນຂັ້ນສູງ ລະຫວ່າງແຂວງບໍລິຄໍາໄຊ ສປປ ລາວ ແລະ ແຂວງຮ່າຕິ່ງ ສສ ຫວຽດນາມ ປະຈໍາປີ 2024 ຈັດຂຶ້ນໃນວັນທີ 19 ມິຖຸນາ 2024 ຜ່ານມານີ້ ທີ່ແຂວງຮ່າຕິ່ງ ໂດຍມີທ່ານ ສອນທະນູ ທໍາມະວົງ ກໍາມະການສູຸນກາງພັກ ເລຂາພັກແຂວງ ເຈົ້າແຂວງ ບໍລິຄໍາໄຊ, ທ່ານ ຮວ່າງຈຸງຢຸ້ງ ກຳມະການສູນກາງພັກກອມມູນິດຫວຽດນາມ ເລຂາພັກແຂວງ ປະທານສະ ພາປະຊາຊົນແຂວງ, ມີບັນດາຫົວໜ້າຄະນະຜູ້ແທນ ແລະ ຜູ້ຕາງໜ້າພະແນກການຂອງແຂວງ, ບໍລິສັດ, ວິສະຫະກິດທັງສອງຝ່າຍເຂົ້າຮ່ວມ.
ກອງປະຊຸມຄັ້ງນີ້, ທັງສອງຝ່າຍ ໄດ້ຜັດປ່ຽນກັນລາຍງານສະພາບລວມໂດຍຫຍໍ້ ຕໍ່ກັບຜົນສໍາເລັດໃນການຈັດຕັ້ງປະຕິບັດບັນດາເນື້ອໃນ ຂອງບົດບັນທຶກການຮ່ວມມື ປະຈໍາປີ 2023 ລະຫວ່າງ ແຂວງຮ່າຕິ່ງ-ບໍລິຄຳໄຊ ທີ່ຄະນະນໍາທັງສອງຝ່າຍ ໄດ້ສຸມໃສ່ນໍາພາ – ຊີ້ນໍາຈັດຕັ້ງປະຕິບັດຢ່າງມີຜົນສໍາເລັດໃນໄລຍະຜ່ານມາ.
ພ້ອມນີ້, ທັງສອງຝ່າຍ ຍັງໄດ້ຍົກໃຫ້ເຫັນ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ການຮ່ວມມືຮອບດ້ານລະຫວ່າງ ສອງພັກ-ສອງລັດ ປະຊາຊົນສອງຊາດລາວຫວຽດດນາມ ເວົ້າລວມ, ເວົ້າສະເພາະ ກໍຄືສອງແຂວງບໍລິຄໍາໄຊ-ຮ່າຕິ່ງ ທີ່ໄດ້ພົວພັນຮ່ວມມືຮອບດ້ານ ຕະຫລອດໄລຍະຜ່ານມາຈົນຮອດປັດຈຸບັນ ເປັນຕົ້ນ ການພົບປະ-ຢ້ຽມຢາມຂອງຄະນະຜູ້ແທນຂັ້ນສູງຂອງສອງແຂວງ, ເນື່ອງໃນໂອກາດວັນສໍາຄັນຕ່າງໆ, ການອ່ວຍພອນເຊິ່ງກັນ ແລະ ກັນ ເນື່ອງໃນໂອກາດບຸນປີໃໝ່ປະຈຳຊາດ ຂອງສອງຝ່າຍ ການຈັດຕັ້ງພິທີມອບຫລຽນໄຊອັນສູງສົ່ງໃຫ້ບັນດາຄະນະນໍາ-ບຸກຄົນທີ່ມີຜົນງານດີເດັ່ນ ໃນການພັດທະນາສາຍພົວພັນມິດຕະພາບ ຫວຽດນາມ-ລາວ, ການເພີມທະວີການພົວພັນຄູ່ຮ່ວມມືຍຸດທະສາດ, ແລກປ່ຽນບົດຮຽນໃນຂົງເຂດກໍ່ສ້າງພັກ ແລະ ລະບົບການເມືອງ, ປ້ອງກັນຄວາມສະຫງົບ, ເສດຖະກິດ, ການຄ້າ, ການລົງທຶນ, ສາທາລະນະສຸກ, ວັດທະນະທໍາ, ການທ່ອງທ່ຽວ, ວິທະຍາສາດເຕັກໂນໂລຊີ, ການສໍາຫລວດ, ຄົ້ນຫາອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ທີ່ໄດ້ເສຍສະຫລະຊີວິດ ໃນປາງສົງຄາມຢູ່ລາວກັບຄືນປະເທດ ແລະ ອື່ນໆ.
ໃນກອງປະຊຸມຄັ້ງນີ້, ຄະນະຜູ້ແທນທັງສອງຝ່າຍ ຍັງໄດ້ພ້ອມກັນປະກອບຄໍາຄິດເຫັນ ຕໍ່ກັບບັນດາຈຸດດີ-ຈຸດອ່ອນຂໍ້ຄົງຄ້າງ ໃນການຈັດຕັ້ງປະຕິບັດວຽກງານໃນດ້ານຕ່າງໆ ໃນໄລຍະຜ່ານມາ ເພື່ອເພີ່ມທະວີການສົມທົບກັນຢ່າງແໜ້ນແຟ້ນ ລະຫວ່າງແຂວງບໍລິຄໍາໄຊ-ຮ່າຕິ່ງ ເຮັດໃຫ້ການຈັດຕັ້ງປະຕິບັດວຽກງານໃນຕໍ່ໜ້າ ສາມາດຍາດໄດ້ຜົນສໍາເລັດຕາມທິດທາງແຜນການທີ່ວາງໄວ້ ໂດຍສະເພາະ ການສຸມໃສ່ຈັດຕັ້ງປະຕິບັດວຽກງານການສຶກສາ- ພັດທະນາຊັບພະຍາກອນມະນຸດ, ວຽກງານຄົມມະນາຄົມຂົນສົ່ງ, ວຽກງານສົ່ງເສີມການປູກ-ການລ້ຽງ ສ້າງອາຊີບທີ່ໝັ້ນຄົງໃຫ້ພໍ່ແມ່ປະຊາຊົນ, ການຈັດສັນພູລໍາເນົາ-ຮັກສາຄວາມສະຫງົບ ປອດໄພ ຕາມບໍລິເວນເລາະລຽບຕາມຊາຍແດນ ແລະ ອື່ນໆ.
ໂອກາດດຽວກັນ, ທັງສອງຝ່າຍຍັງໄດ້ລົງນາມເຊັນບົດບັນທຶກ ການສືບຕໍ່ພົວພັນຮ່ວມມືຮອບດ້ານປະຈໍາປີ 2024 ຕື່ມອີກ.
ຂ່າວ-ພາບ: ສຸກທະວີ
