ວັນທີ 13 ມັງກອນ 2024 ນີ້, ສະຫາຍ ພັນເອກ ພິມມະຈັນ ວົງປັນຍາ ຮອງຜູ້ບັນຊາການທະຫານອາກາດ ຫົວໜ້າຫ້ອງອົບຮົມການບິນ ພ້ອມດ້ວຍຄະນະໄດ້ຕ້ອນຮັບ ສະຫາຍ ພົນຕີ ຢູ ເຫີ ເຈ ຜູ້ອຳນວຍການມະວິທະຍາໄລການບິນ ກອງທັບປົດປ່ອຍປະຊາຊົນຈີນ ພ້ອມຄະນະ 68 ສະຫາຍ, ນັກບິນ 18 ສະຫາຍ, ຍົນບິນ LJ-8 ຈໍານວນ 9 ລໍາ ໄດ້ມາຢ້ຽມຢາມ ແລະ ສະແດງການບິນມິດຕະພາບ ຢູ່ ສປປ ລາວ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ໃນລະຫວ່າງວັນທີ 13-18 ມັງກອນ 2024 ນີ້.
ສະຫາຍ ພັນເອກ ພິມມະຈັນ ວົງປັນຍາ ໄດ້ຕີລາຄາສູງ ແລະ ສະແດງຄວາມຕ້ອນຮັບຢ່າງອົບອຸ່ນຕໍ່ຄະນະດັ່ງກ່າວ ທີ່ມາເຄື່ອນໄຫວຢ້ຽມຢາມ ແລະ ສະແດງການບິນມິດຕະພາບຢູ່ ສປປ ລາວ ໃນໂອກາດສະເຫຼີມສະຫຼອງວັນສ້າງຕັ້ງກອງກັບປະຊາຊົນລາວ ຄົບຮອບ 75 ປີ ເຊິ່ງເປັນເຫດການທີ່ມີຄວາມໝາຍຄວາມສຳຄັນ ແລະ ເປັນການປະກອບສ່ວນຮັດແໜ້ນສາຍພົວພັນມິດຕະພາບລະຫວ່າງສອງຊາດ, ສອງກອງທັບ ລາວ-ຈີນ, ຈີນ-ລາວ ປະເທດບ້ານໃກ້ເຮືອນຄຽງ ມີສາຍພູ ແລະ ແມ່ນໍ້າຕິດຈອດກັນ ທີ່ມີມູນເຊື້ອສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນມາແຕ່ດົນນານເຊິ່ງການເຄື່ອນໄຫວຢ້ຽມຢາມ ແລະ ສະແດງການບິນມິດຕະພາບຂອງຄະນະໃນຄັ້ງນີ້, ເປັນການສ້າງບັນຍາກາດຟົດຟື້ນມ່ວນຊື່ນ ແລະ ປຸກລະດົມ ກຳລັງໃຈຢ່າງໃຫຍ່ຫຼວງໃຫ້ແກ່ພະນັກງານ-ນັກຮົບໃນກອງທັບ ແລະ ປະຊາຊົນລາວບັນດາເຜົ່າປະກອບສ່ວນເຂົ້າໃນການແຂ່ງຂັນກັນສ້າງຜົນງານຂໍ່ານັບຮັບຕ້ອນວັນສຳຄັນຕ່າງໆຂອງຊາດ, ຂອງກອງທັບ ແລະ ພ້ອມດຽວກັນນີ້ຍັງເປັນການແລກປ່ຽນບົດຮຽນທາງດ້ານການບິນ ເຊິ່ງກັນ ແລະ ກັນອີກດ້ວຍ.
ໂອກາດນີ້, ສະຫາຍ ພົນຕີ ຢູ ເຫີ ເຈ ກໍໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ແລະ ເຕັມໄປດ້ວຍໄມຕີຈິດມິດຕະພາບ ຂອງ ສະຫາຍຮອງຜູ້ບັນຊາການທະຫານອາກາດ ພ້ອມທັງສະແດງຄວາມດີໃຈທີ່ໄດ້ນຳພາຄະນະນັກບິນ ຈາກກອງທັບປົດປ່ອຍປະຊາຊົນຈີນ ມາເຄື່ອນໄຫວສະແດງການບິນມິດຕະພາບ ໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ຢູ່ ສປປ ລາວ ໃນຄັ້ງນີ້.
ໂດຍ: ສຸເວດ ສີດາຄໍາ
