ວັນທີ 17 ມັງກອນ 2025, ກອງບັນຊາການທະຫານ ແຂວງຈໍາປາສັກ ໄດ້ຈັດພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ (20/1/1949 - 20/1/2025). ພິທີຈັດຂຶ້ນຢູ່ທີ່ສະໂມສອນກອງບັນຊາການທະການແຂວງດັ່ງກ່າວ ໂດຍການເຂົ້າຮ່ວມຂອງ ສະຫາຍ ສະນັ່ນ ສີພາ ພົມມະຈັນ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ. ມີ ສະຫາຍ ພັນເອກ ສິດປະເສີດ ນວນມະນີວົງ ຮອງເລຂາຄະນະພັກ ຫົວໜ້າການທະຫານກອງບັນຊາການທະຫານແຂວງ ພ້ອມດ້ວຍຄະນະພັກ – ຄະນະບັນຊາ 5 ຫ້ອງ, ບັນດາແຂກທີ່ຖືກເຊີນຈາກພະແນກການ, ຫ້ອງການ, ກົມກອງອ້ອມຂ້າງແຂວງ, ພະນັກງານປະຕິວັດອາວຸໂສບຳນານ ຕະຫຼອດຮອດພະນັກງານຫຼັກແຫຼ່ງໃນທົ່ວກອງບັນຊາການທະຫານແຂວງ ເຂົ້າຮ່ວມ.
ໃນພິທີ, ສະຫາຍ ສະນັ່ນ ສີພາພົມມະຈັນ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ໄດ້ໃຫ້ກຽດກ່າວປາໄສ, ເນື້ອໃນບາງຕອນ ສະຫາຍກ່າວວ່າ: ກອງທັບປະຊາຊົນລາວ ມີທາດແທ້ ແລະ ມູນເຊື້ອອັນສະຫງ່າອົງອາດກ້າຫານ, ສູ້ຮົບ, ທົນທານໜຽວແໜ້ນ,ກ້າແກ່ນ ຕໍ່ສູ້ບໍ່ຍອມຈຳນົນໃນພາລະກິດ ຕໍ່ສູ້ກູ້ຊາດ ຕ້ານຈັກກະພັດຕ່າງດ້າວຜູ້ຮຸກຮານ ທັງແບບເກົ່າ ແລະ ແບບໃໝ່ເພື່ອຄວາມເປັນເອກລາດ, ອິດສະຫຼະພາບ ແລະ ນຳເອົາຄວາມສົມບູນພູນສຸກມາໃຫ້ປະຊາຊົນລາວບັນດາເຜົ່າ, ກອງທັບປະຊາຊົນລາວ ໄດ້ປະຕິບັດໜ້າທີ່ ພາຍໃຕ້ການນຳພາຂອງພັກອັນສະຫຼາດສອ່ງໃສ ໃນການປົກປັກຮັກສາປະເທດຊາດ, ເຄື່ອນໄຫວປັບປຸງກໍ່ສ້າງກອງທັບ ໃຫ້ມີຄວາມເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບຢ່າງບໍ່ຢຸດຢັ້ງ, ຍິ່ງສູ້ຮົບ ກໍຍິ່ງເຕີບໃຫຍ່ເຂັ້ມແຂງ, ຍິ່ງຕີກໍຍິ່ງໄດ້ຮັບໄຊຊະນະ ຈົນສາມາດປົດປອ່ຍປະເທດຊາດ ອອກຈາກແອກປົກຄອງ ຂອງພວກລ່າເມືອງຂຶ້ນ ໄດ້ຢ່າງສົມບູນ ແລະ ສະຖາປະນາ ເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ຂື້ນໃນວັນທີ 2 ທັນວາ 1975 ຢ່າງສະຫງ່າຜ່າເຜີຍ. ຈາກຜົນງານແລະ ໄຊຊະນະດັ່ງກ່າວ ທີ່ຍາດມາໄດ້ນັ້ນ ກອງທັບປະຊາຊົນລາວ ໄດ້ສືບຕໍ່ເສີມຂະຫຍາຍທາດແທ້ ແລະ ມູນເຊື້ອອັນສະຫງ່າງາມຂອງຕົນ, ຍາມໃດກໍເຊີດຊູສະຕິລະວັງຕົວກຽມພ້ອມສູ້ຮົບ, ເປັນກຳລັງຫຼັກແຫຼ່ງ ເຮັດໜ້າທີ່ປ້ອງກັນຊາດ – ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ, ປົກປັກຮັກສາເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດໄວ້ໃຫ້ໝັ້ນຄົງ, ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບປອດໄພ, ປະກອບສ່ວນຢ່າງຕັ້ງໜ້າເຂົ້າໃນການສ້າງເສດຖະກິດຂອງຊາດ. ໄປພອ້ມໆກັນນັ້ນ ກໍໄດ້ເອົາໃຈໃສ່ປັບປຸງກໍ່ສ້າງກົມກອງ, ກໍ່ສ້າງກຳລັງໃຫ້ມີຄວາມເຂັ້ມແຂງຮອບດ້ານ ແລະ ສ້າງກອງທັບໃຫ້ກາຍເປັນກອງທັບ ທີ່ມີແບບແຜນທັນສະໄໝດີຂຶ້ນເປັນກ້າວໆ.
ຂ່າວ: ດາວົງ ບຸດຕະວົງ
ພາບ: ນາງ ສີລິຄານ ສີດາວົງ
