ວັນທີ 28 ຕຸລາ 2024, ສູນສົ່ງເສີມການຮຽນຮ່ວມ ກະຊວງ ສຶກສາທິການ ແລະ ກິລາ ຮ່ວມກັບເມືອງນາກາຍ ແຂວງຄໍາມ່ວນ ໄດ້ຈັດກອງປະຊຸມ ຊີ້ແຈງໂຄງການອາຫານທ່ຽງ ທີ່ສະໂມສອນຫຼັງໃໝ່ເມືອງນາກາຍ ໂດຍການເປັນປະທານຮ່ວມ ຂອງ ທ່ານ ສຸລິອຸດົງ ສູນດາຣາ ຮອງລັດຖະມົນຕີກະຊວງສຶກສາທິການ ແລະ ກິລາ ແລະ ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ.
ຈຸດປະສົງເພື່ອທົບທວນຄືນຜົນການຈັດຕັ້ງປະຕິບັດໂຄງ ການອາຫານທ່ຽງງໃນໄລຍະຜ່ານມາຕີລາຄາໃຫ້ເຫັນໄດ້ເຖີງດ້ານດີ ແລະ ດ້ານອ່ອນ, ຂໍ້ຄົງຄ້າງເພື່ອພ້ອມກັນປັງປຸງ ແລະ ແກ້ໄຂໃນຕໍ່ໜ້າເພື່ອໃຫ້ນັກຮຽນໃນໂຮງຮຽນໄດ້ຮັບສານອາຫານໃຫ້ພຽງພໍກັບ 5 ໝູ່ເພື່ອເຮັດໃຫ້ມີການຈະເລີນເຕີບໂຕທາງດ້ານຮ່າງກາຍ ແລະ ສະຕິປັນຍາ ພ້ອມທັງຜ່ານທີດທາງແຜນການທີ່ຈະຕ້ອງໄດ້ຈັດຕັ້ງປະຕິບັດໃນຕໍ່ໜ້າຕື່ມອີກ
ກອງປະຊຸມໄດ້ຟັງການນໍາສະເໜີ ພາບລວມຂອງໂຄງການ ແລະ ແຜນກິດຈະກໍາລະອຽດ ທີ່ກະຊວງສຶກສາທິການ ແລະ ກິລາຮັບຜິດຊອບ ແລະ ອື່ນໆອີກຫລາຍຢ່າງທີ່ກ່ຽວຂ້ອງ ເຊີ່ງໃນທົ່ວເມືອງມີໂຮງຮຽນເປົ້າໝາຍທີ່ຈະໄດ້ຮັບທືນໂຄງການອາຫານທ່ຽງທັງໝົດ 16 ແຫ່ງ, ແລະ ຜ່ານຂໍ້ຕົກລົງກະຊວງສຶກສາທິການ ແລະ ກິລາ ສະບັບເລກທີ 2877/ສສກ, ລົງວັນທີ 22 ມີຖຸນາ 2023.
ພາຍຫຼັງສໍາເລັດກອງປະຊຸມ, ທີມງານພ້ອມຄະນະໄດ້ລົງເຄື່ອນໄຫວຢ້ຽມຢາມໂຮງຮຽນ ແລະ ສະຖານທີ່ຈັດກິດຈະກຳອາຫານທ່ຽງ 2 ໂຮຽນ ຄື: ໂຮງຮຽນປະຖົມສົມບູນບ້ານໜອງບົວຄໍາ ແລະ ໂຮງຮຽນປະຖົມສົມບູນ ບ້ານ ນາກາຍ ໂດຍໂຄງການດັ່ງກ່າວນີ້ແມ່ນພາຍໃຕ້ທຶນສະໜັບສະໜູນຈາກ ບໍລິສັດໄຟຟ້ານໍ້າເທີນ 2 ໂດຍຜ່ານມູນນິທິການສຶກສາເພື່ອການພັດທະນາ.
ຂ່າວ: ຄຳໄໝ ວົງສາຄອນ
