ກອງປະຊຸມລັດຖະມົນຕີເສດຖະກິດອາຊຽນ ແບບວົງແຄບ ຄັ້ງທີ 30 ຈັດຂື້ນໃນຕອນເຊົ້າວັນທີ 9 ມີນາ 2024 ຢູ່ຫ້ອງປະຊຸມໂຮງເເຮມພູເເມນ ນະຄອນຫລວງພະບາງ ເເຂວງຫລວງພະບາງ ພາຍໃຕ້ການເປັນປະທານຂອງ ທ່ານມະໄລທອງ ກົມມະສິດ ລັດຖະມົນຕີກະຊວງອຸດສະຫະກໍາເເລະການຄ້າ ທັງເປັນ ລັດຖະມົນ ຕີເສດຖະກິດອາຊຽນຂອງລາວ, ມີລັດຖະມົນຕີເສດຖະກິດອາຊຽນທີ່ມາຈາກ10ປະເທດສະມາຊິກອາຊຽນ,ເລຂາທິການໃຫຍ່ອາຊຽນ,ກອງເລຂາອາຊຽນ ພ້ອມດ້ວຍພາກສ່ວນກ່ຽວ ຂ້ອງເຂົ້າຮ່ວມ.
ທ່ານມະໄລທອງ ກົມມະສິດ ລັດຖະມົນຕີກະຊວງອຸດສະຫະກໍາເເລະການຄ້າ ທັງເປັນ ລັດຖະມົນຕີເສດຖະກິດອາຊຽນຂອງລາວ ມີຄໍາເຫັນບາງຕອນວ່າ:ການຈັດກອງປະຊຸມຄັ້ງນີ້ມີຄວາມ
ຫມາຍຄວາມສໍາຄັນ ເນື່ອງຈາກວ່າເປັນການທົບທວນຄືນກ່ຽວກັບຫມາກຜົນການຈັດຕັ້ງປະຕິບັດວຽກວານການພົວພັນຮ່ວມ ມືທາງດ້ານເສົາຄໍ້າເສດຖະກິດຂອງອາຊຽນ ໃນໄລຍະຜ່ານມາ ເເລະ ວາງທິດທາງເເຜນການໃນຕໍ່ຫນ້າ ການເເກ້ໄຂດ້ານດີດ້ານອ່ອນ,ຂໍ້ຄົງຄ້າງ ເເລະ ຜົນກະທົບທີ່ມີຕໍ່ການພັດທະນາເສດຖະ ກິດຂອງບັນດາປະເທດອາຊຽນ,ໄລຍະຜ່ານມາກໍ່ຄືປັດຈຸບັນ ບັນດາປະເທດສະມາຊິກອາຊຽນໄດ້ສ້າງຕັ້ງສະພາທີ່ປຶກສາເສດ ຖະກິດອາຊຽນຮ່ວມກັນ ເຊີ່ງມີບົດບາດສໍາຄັນໃນການຂັບເຄື່ອນເສດຖະກິດຂອງອາຊຽນ ພ້ອມທັງເຮັດຫນ້າທີ່ເປັນຂົວຕໍ່ລະ ຫວ່າງພາກລັດ ເເລະ ພາກທຸລະກິດ,ເປັນຜູ້ຕີດຕາມຊຸກຍູ້ ເເລະ ໃຫ້ຄໍາປຶກສາໃນການຜັນຂະຫຍາຍການຈັດຕັ້ງປະຕິບັດ ເເຜນເເມ່ບົດປະຊາຄົມເສດຖະກິດອາຊຽນໃຫ້ບັນລຸຜົນ.
ໂອກາດດຽວກັນ ທ່ານໄດ້ ສະແດງຄວາມຊົມເຊີຍຕໍ່ປະເທດ ຕິມໍເລສເຕ ທີ່ໄດ້ເຂົ້າເປັນສະມາຊິກອົງການການຄ້າໂລກ ຫລື WTO ຢ່າງເປັນທາງການ ໃນໂອກາດກອງປະຊຸມລັດຖະມົນຕີອົງການການຄ້າໂລກຄັ້ງທີ 13 ທີ່ ອາບູດາບີ, ສະຫະລັດ ອາຣັບເອມິເລັດ ເເລະ ຫວັງວ່າຕີມໍເລສເຕ ຈະໄດ້ເຂົ້າຮ່ວມໃນຄອບຄົວອາຊຽນໃນໄວໆນີ້, ເຊິ່ງຈະເປັນການເພີ່ມທະວີຄວາມເຂັ້ມແຂງ ແລະ ຄວາມຈະເລີນຮຸ່ງເຮືອງ ໃຫ້ກັບພາກພື້ນຂອງພວກເຮົາ ຄຽງຄູ່ກັນນີ້ ທ່ານໄດ້ສະແດງຄວາມຊົມເຊີຍ ຕໍ່ອິນໂດເນເຊຍ ທີ່ໄດ້ເຮັດ ໜ້າທີ່ເປັນປະທານອາຊຽນໃນປີ 2023 ໄດ້ເປັນຢ່າງດີ ແລະ ມີຜົນສໍາເລັດຢ່າງຈົບງາມ ພາຍໃຕ້ການນຳພາຂອງອິນໂດເນເຊຍ ອາຊຽນໄດ້ເຮັດສໍາເລັດຫຼາຍໜ້າວຽກທີ່ສໍາຄັນ ໃນການກ້າວໄປສູ່ເປົ້າໝາຍຂອງການສ້າງປະຊາຄົມເສດຖະກິດອາຊຽນ 2025, ເຊິ່ງຖືເປັນການວາງພື້ນຖານ ແລະ ເສີມສ້າງຄວາມເຂັ້ມແຂງໃຫ້ແກ່ການບັນລຸເປົ້າໝາຍລວມຂອງອາຊຽນ, ທັງເປັນການສະແດງໃຫ້ເຫັນເຖິງຄວາມໝາຍໝັ້ນ, ຄວາມພະຍາຍາມ ແລະ ການປັບຕົວຂອງພວກເຮົາ ໃນການປະເຊີນໜ້າກັບສິ່ງທ້າທາຍຕ່າງໃນປີຜ່ານ ມາ ສໍາລັບລາວ ມີຄວາມພາກພູມໃຈ ທີ່ໄດ້ຮັບກຽດເປັນປະທານອາຊຽນ ເຊິິ່ງເປັນໄລຍະເວລາທີ່ມີທັງກາລະໂອກາດ ແລະ ສິ່ງທ້າທາຍຫຼາຍດ້ານ ໂດຍສະເພາະໃນເງື່ອນໄຂທີ່ສະພາບການຂອງໂລກ ແລະ ພາກພື້ນກໍາລັງຜັນແປໄປຢ່າງສະຫຼັບຊັບຊ້ອນ.
ຂ່າວ: ເດດອາລຸນ ແກ້ວວິໄລ
