ກອງປະຊຸມເຈົ້າໜ້າທີ່ອາວຸໂສເສດຖະກິດອາຊຽນ ຄັ້ງທີ 3 ແລະ ກອງປະຊຸມປິ່ນອ້ອມ ຈັດຂຶ້ນໃນລະຫວ່າງວັນທີ 9 ຫາ 14 ກໍລະກົດ 2024ນີ້ ທີ່ໂຮງແຮມຄລາວພາຊານະຄອນຫລວງວຽງຈັນ ໂດຍການເປັນປະທານຂອງທ່ານ ໄຊຊະນະ ໄຊຍະກອນ ຫົວໜ້າກົມເຈລະຈາການຄ້າ ແລະ ຮ່ວມມືເສດຖະກິດສາກົນ ກະຊວງອຸດສາຫະກຳ ແລະ ການຄ້າ ທັງເປັນຫົວໜ້າເຈົ້າໜ້າທີ່ອາວຸໂສເສດຖະກິດອາຊຽນຂອງລາວ, ມີຫົວໜ້າເຈົ້າໜ້າທີ່ອາວຸໂສເສດຖະກິດຂອງບັນດາປະເທດສະມາຊິກອາຊຽນເຂົ້າຮ່ວມ
ທ່ານ ໄຊຊະນະ ໄຊຍະກອນ ຫົວໜ້າກົມເຈລະຈາການຄ້າ ແລະ ຮ່ວມມືເສດຖະກິດສາກົນ ກະຊວງອຸດສາຫະກຳ ແລະ ການຄ້າ ທັງເປັນຫົວໜ້າເຈົ້າໜ້າທີ່ອາວຸໂສເສດຖະກິດອາຊຽນຂອງລາວ ໃຫ້ຮູ້ວ່າ: ກອງປະຊຸມຄັ້ງນີ້ ມີຄວາມສຳຄັນໃນການກະກຽມໃຫ້ແກ່ກອງປະຊຸມລັດຖະມົນຕີເສດຖະກິດອາຊຽນ ຄັ້ງທີ 56 ທີ່ຈະຈັດຂຶ້ນຢູ່ນະຄອນຫລວງວຽງຈັນ ໃນເດືອນກັນຍາປີນີ້ ,ໃນກອງປະຊຸມ ໄດ້ປຶກສາຫາລືຫລາຍບັນຫາສຳຄັນ ໂດຍສະເພາະ ຄວາມຄືບໜ້າໃນການຈັດຕັ້ງປະຕິບັດ ແຜນວຽກບູລິມະສິດຂອງລາວ ແລະ ອາຊຽນ ສຳລັບປີ 2024 ແລະ ກະກຽມໃຫ້ແກ່ກອງປະຊຸມລະດັບລັດຖະມົນຕີ ເສດຖະກິດອາຊຽນ ຄັ້ງທີ 56 ,ໂດຍຈະມີການພົບປະກັບປະເທດຄູ່ຮ່ວມເຈລະຈາ ເປັນຕົົ້ນ: ຈີນ, ຍີ່ປຸ່ນ, ອົດສະຕຼາລີ, ນູແວນເຊລັງ, ສ.ເກົາຫລີ , ອິນເດຍ, ອີຍູ ແລະ ຣັດເຊຍ , ແນ່ໃສ່ເພື່ອຊຸກຍູ້ແຜນວຽກບູລິມະສິດໃນຖານະທີ່ລາວເປັນປະທານອາຊຽນ 2024 ໃຫ້ສຳເລັດ ແລະ ມີຄວາມຄືບໜ້າ. ເຮັດແນວໃດເພື່ອຊຸກຍູ້ໃຫ້ແຜນວຽກຕ່າງໆ ໄດ້ຮັບການຈັດຕັ້ງປະຕິບັດໃຫ້ມີຜົນສໍາເລັດຕາມຄາດໝາຍ
ໃນກອງປະຊຸມຄັ້ງນີ້ ຍັງມີກອງປະຊຸມກະກຽມຂອງປະເທດ CLMV ເພື່ອກະກຽມໃຫ້ ແກ່ກອງປະຊຸມລະດັບລັດຖະມົນຕີ CLMV ທີ່ຈະຈັດຂຶ້ນ ໃນເດືອນກັນຍາ ປີ 2024ນີ້.
