ກອງປະຊຸມເຈົ້າໜ້າທີ່ອາວຸໂສປ້ອງກັນປະເທດອາຊຽນ-ບວກ (ADSOM-Plus) ໄດ້ຈັດຂຶ້ນໃນວັນທີ 26 ກັນຍາ 2024 ນີ້, ທີ່ນະຄອນຫຼວງວຽງຈັນ ສປປ ລາວ, ໂດຍການເປັນປະທານຂອງ ທ່ານ ພົນຕີ ສົມພອນ ມິດຕະພອນ ຮອງຫົວໜ້າກົມໃຫຍ່ເສນາທິການກອງທັບປະຊາຊົນລາວ, ຫົວໜ້າເຈົ້າໜ້າທີ່ອາວຸໂສປ້ອງກັນປະເທດອາຊຽນ ແຫ່ງ ສປປ ລາວ, ມີບັນດາຫົວໜ້າເຈົ້າໜ້າທີ່ອາວຸໂສປ້ອງກັນປະເທດອາຊຽນ, ຕີມໍ ເລດສະເຕ ໃນນາມຜູ້ສັງເກດການ ແລະ ກອງເລຂາອາຊຽນ ເຂົ້າຮ່ວມ.
ໃນກອງປະຊຸມ, ທ່ານ ພົນຕີ ສົມພອນ ມິດຕະພອນ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ມາຍັງບັນດາຄະນະຜູ້ແທນ ຈາກປະເທດສະມາຊິກອາຊຽນ-ບວກ (ADSOM-Plus), ຕາງໜ້າໃຫ້ກະຊວງປ້ອງກັນປະເທດ ຮູ້ສຶກເປັນກຽດ ແລະ ພາກພູມໃຈຢ່າງຍິ່ງ ທີ່ໄດ້ຮັບກຽດເປັນປະທານກອງປະຊຸມ ADSOM-Plus ແລະ ສະແດງຄວາມຂອບໃຈຢ່າງຈິງໃຈ ມາຍັງບັນດາຫົວໜ້າເຈົ້າໜ້າທີ່ອາວຸໂສປ້ອງກັນປະເທດອາຊຽນ-ບວກ ພ້ອມດ້ວຍຄະນະ ທີ່ໄດ້ເດີນທາງມາເຂົ້າຮ່ວມກອງປະຊຸມຄັ້ງນີ້. ໃນນາມປະທານກອງປະຊຸມ ທ່ານ ໄດ້ກ່າວວ່າ: ປັດຈຸບັນ, ພາກພື້ນ ແລະ ໃນໂລກ ປະເຊີນໜ້າກັບໄພຂົ່ມຂູ່ ແລະ ສິ່ງທ້າທາຍ ຕໍ່ຄວາມໝັ້ນຄົງ ທາງດ້ານການທະຫານ ແລະ ດ້ານຕ່າງໆ ທີ່ຫຍຸ້ງຍາກສັບສົນ ແລະ ສະຫຼັບສັບຊ້ອນ, ໂດຍສະເພາະ ການແຂ່ງຂັນທາງດ້ານຍຸດທະສາດ, ການປ່ຽນແປງສະພາບດິນຟ້າອາກາດ, ອາຊະຍາກໍາທາງໄຊເບີ, ຄວາມໝັ້ນຄົງທາງທະເລ ແລະ ອື່ນໆ. ບັນຫາດັ່ງກ່າວ ໄດ້ສົ່ງຜົນກະທົບຕໍ່ສັນຕິພາບ, ສະຖຽນລະພາບ ແລະ ຄວາມໝັ້ນຄົງຂອງພາກພື້ນ ແລະ ສາກົນ. ສະນັ້ນ, ກອງປະຊຸມໃນຄັ້ງນີ້ ຈະເປັນໂອກາດທີ່ດີສໍໍາລັບ ການປຶກສາຫາລືກ່ຽວກັບວິທີທາງຕ່າງໆ ເພື່ອສົ່ງເສີມການຮ່ວມມືດ້ານວຽກງານປ້ອງກັນຊາດ ເພື່ອສາມາດຮັບມືກັບບັນດາສິ່ງທ້າທາຍຕໍ່ຄວາມໝັ້ນຄົງໃນປັດຈຸບັນ ແລະ ອະນາຄົດ.
ກອງປະຊຸມເຈົ້າໜ້າທີ່ອາວຸໂສປ້ອງກັນປະເທດ ອາຊຽນ-ບວກ ເປັນກົນໄກການຮ່ວມມືທີ່ສໍາຄັນຂອງປະເທດສະມາຊິກອາຊຽນ ແລະ ອາຊຽນ-ບວກ ໃນການເຮັດວຽກຮ່ວມກັນ ແລະ ສົ່ງເສີມການຮ່ວມມືທີ່ເປັນຮູບປະທໍາ ແລະ ການເສີມສ້າງຂີດຄວາມສາມາດຕ່າງໆ ເພື່ອຮັບມືກັບໄພຂົ່ມຂູ່ຕ່າງໆຕໍ່ຄວາມໝັ້ນຄົງ ໃຫ້ມີປະສິດທິພາບ, ປະກອບສ່ວນເຂົ້າໃນສັນຕິພາບ, ຄວາມໝັ້ນຄົງ ແລະ ການພັດທະນາ ຂອງພາກພື້ນ. ດັ່ງນັ້ນ ຈຶ່ງຮຽກຮ້ອງໃຫ້ ບັນດາຄະນະຜູ້ແທນ ຈາກປະເທດສະມາຊິກອາຊຽນ-ບວກ ຈະຕ້ອງໄດ້ພ້ອມກັນປຶກສາຫາລື ແລະ ເປັນເອກະພາບກັນ ໃນຫຼາຍໆບັນຫາ, ເຊິ່ງເປັນພື້ນຖານອັນສໍາຄັນ ໃຫ້ແກ່ການສືບຕໍ່ຈັດຕັ້ງປະຕິບັດບັນດາແຜນການຮ່ວມມື ຂອງເຈົ້າໜ້າທີ່ອາວຸໂສປ້ອງກັນປະເທດອາຊຽນ-ບວກ (ADSOM-Plus) ແລະ ເປັນການກະກຽມຄວາມພ້ອມໃຫ້ແກ່ການຈັດຕັ້ງກອງປະຊຸມລັດຖະມົນຕີປ້ອງກັນປະເທດອາຊຽນ-ບວກ (ADMM-Plus) ຄັ້ງທີ 11 ແລະ ກິດຈະກໍາປິ່ນອ້ອມອື່ນໆ ທີ່ຈະຈັດຂຶ້ນໃນເດືອນພະຈິກ ທີ່ຈະມາເຖິງ ໃຫ້ມີບັນຍາກາດທີ່ສ້າງສັນ, ບັນລຸຜົນສຳເລັດຕາມຈຸດປະສົງ ແລະ ລະດັບຄາດໝາຍທີ່ກອງປະຊຸມໄດ້ວາງໄວ້.
