ໃນຕອນບ່າຍຂອງວັນທີ 09 ຕຸລາ 2024, ທີ່ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກຊສ), ນະຄອນຫຼວງວຽງຈັນ, ສປປ ລາວ ໄດ້ມີການຈັດກອງປະຊຸມພົບປະສອງຝ່າຍ ແລະ ການລົງນາມ ບົດບັນທຶກການຮ່ວມມືສະບັບໃໝ່ ລະຫວ່າງ ກຊສ ແຫ່ງ ສປປ ລາວ ແລະ ກຊສ ແຫ່ງ ສສ ຫວຽດນາມ, ໃນໂອກາດທີ່ ຄະນະຜູ້ແທນຝ່າຍຫວຽດນາມ ນຳໂດຍ ທ່ານ ໂດ ດຶກ ຊຸຍ (Do Duc Duy) ລັດຖະມົນຕີ ກຊສ ຫວຽດນາມ ໄດ້ເດີນທາງມາເຂົ້າຮ່ວມ ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ທີ່ນະຄອນຫລວງວຽງຈັນ.
ໃນໂອກາດນີ້, ຄະນະຜູ້ແທນຝ່າຍລາວ ນຳໂດຍ ທ່ານ ນ ບຸນຄຳ ວໍລະຈິດ ລັດຖະມົນຕີ ກຊສ ສປປ ລາວ ໄດ້ສະແດງຄວາມຍິນດີຕ້ອນຮັບ ພ້ອມທັງຮູ້ສຶກປິຕິຍິນດີ ທີ່ສອງຊາດ ລາວ ແລະ ຫວຽດນາມ ຍາມໃດກໍ່ເຮັດວຽກປະສານສົມທົບກັນ ເພື່ອເພີ່ມທະວີ ແລະ ຮັດແໜ້ນສາຍພົວພັນມິດຕະພາບ ລາວ-ຫວຽດນາມ ທີ່ເປັນສາຍພົວພັນພິເສດ ບົນພື້ນຖານຄວາມຮັກແພງ ສາມັກຄີ ຊ່ວຍເຫຼືອເຊິ່ງກັນ ແລະ ກັນ. ການພົບປະຄັ້ງນີ້ ແມ່ນການສືບຕໍ່ແລກປ່ຽນການຢ້ຽມຢາມ ຂອງສອງປະເທດຢ່າງເປັນປົກກະຕິ ທັງເປັນການຜັນຂະຫຍາຍ ແລະ ຈັດຕັ້ງປະຕິບັດຍຸດທະສາດການຮ່ວມມື ລະຫວ່າງ ລາວ -ຫວຽດນາມ ໄລຍະ 10 ປີ 2021-2030 ແລະ ສັນຍາຮ່ວມມືລະຫວ່າງ ລາວ-ຫວຽດນາມ ໄລຍະ 5 ປີ (2021-2025) ໃນຂົງເຂດການຮ່ວມມືດ້ານຊັບພະຍາກອນທໍາມະຊາດ ແລະ ສິ່ງແວດລ້ອມ.
ທ່ານ ໂດ ດຶກ ຊຸຍ (Do Duc Duy) ລັດຖະມົນຕີ ກຊສ ຫວຽດນາມ ກໍໄດ້ສະແດງຄວາມຂອບໃຈ ແລະ ຊົມເຊີຍ ຕໍ່ການຕ້ອນຮັບອັນອົບອຸ່ນ ພ້ອມທັງຝາກເອົາຄວາມຢື້ຢາມຖາມຂ່າວ ຂອງອາດີດ ລັດຖະມົນຕີ ກຊສ ສສ ຫວຽດນາມ ເຖິງ ອາດີດ ລັດຖະມົນຕີ ກຊສ ສປປ ລາວ. ນອກນີ້, ກໍໄດ້ເຊື້ອເຊີນ ທ່ານ ລັດຖະມົນຕີ ກຊສ ສປປ ລາວ ເດີນທາງຢ້ຽມຢາມ ສສ ຫວຽດນາມ ຢ່າງເປັນທາງການ ໃນໂອກາດທີ່ເໝາະສົມ.
ພິເສດ, ໃນການພົບປະຄັ້ງນີ້ ທັງສອງຝ່າຍໄດ້ເອກະພາບໃນການສືບຕໍ່ການຮ່ວມມືກັນ ໂດຍການລົງນາມບົດບັນທຶກການຮ່ວມມືສະບັບໃໝ່ ລະຫວ່າງ ທ່ານລັດຖະມົນຕີ ທັງສອງ ກະຊວງ ໃນ 7 ຂົງເຂດວຽກງານເຊັ່ນ: ການຮັບມືຕໍ່ກັບການປ່ຽນແປງດິນຟ້າອາກາດ, ການອະນຸລັກຊີວະນາໆພັນ, ການຄຸ້ມຄອງສິ່ງແວດລ້ອມ, ການຄຸ້ມຄອງມົນລະພິດ, ການຄຸ້ມຄອງຊັບພະຍາກອນນໍ້າ, ວຽກງານອຸຕຸນິຍົມ ແລະ ອຸທົກກະສາດ ແລະ ວຽກງານການບໍລິຫານທີ່ດິນ. ບົດບັນທຶກສະບັບດັ່ງກ່າວ ຈະເປັນພື້ນຖານສຳຄັນ ໃຫ້ສອງກະຊວງ ໃນການຈັດຕັ້ງປະຕິບັດວຽກງານການຮ່ວມມືຕົວຈິງ ໃຫ້ເປັນຮູບປະທໍາຫຼາຍຂຶ້ນ ແນໃສ່ເພີ່ມທະວີການຮ່ວມມືດ້ານວິຊາການ ເພື່ອຕອບສະໜອງກັບຄວາມຕ້ອງການໃນຍຸກສະໄໝໃໝ່ ໃນການແກ້ໄຂບັນຫາສິ່ງແວດລ້ອມ ແລະ ຮັບມືກັບການປ່ຽນແປງດິນຟ້າອາກາດ ເພື່ອບັນລຸເປົ້າໝາຍການພັດທະນາແບບຍືນຍົງ.
ຂ່າວໂດຍ: ອະພິເດດ ແສງດາລາ
