ຫວ່າງບໍ່ດົນມານີ້ ກະຊວງສຶກສາທິການ ແລະ ກິລາ ແຫ່ງ ສປປ ລາວ (ສສກ) ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ໂດຍຜ່ານໂຄງການແຜນງານບີຄວາ ໄດ້ຖ່າຍທຳວີດີໂອ ເພື່ອສົ່ງເສີມການສຶກສາ ໂດຍມີຈຸດປະສົງເພື່ອປຸກລະດົມຜູ້ຊົມ ແລະ ຫັນປ່ຽນທັດສະນະຄະຕິຕໍ່ການສຶກສາໃນທົ່ວປະເທດລາວ.
ທ່ານ ວົງເພັດ ອຸດົມລິດ, ຮອງຜູ້ອຳນວຍການສະຖາບັນຄົ້ນຄວ້າວິທະຍາສາດການສຶກສາ (ສວສ) , ໄດ້ກ່າວວ່າ : ລະຄອນວີດີໂອນີ້ ແມ່ນໄດ້ສະແດງໃຫ້ເຫັນການອຸທິດຕົນຂອງຄູ, ເລີ່ມແຕ່ການສຶກສາຂັ້ນພຶ້ນຖານໄປເຖິງການສຶກສາຂັ້ນສູງ, ສະແດງໃຫ້ເຫັນວ່າ ຄູແມ່ນກະດູກສັນຫຼັງຂອງລະບົບການສຶກສາ.
ທ່ານ ນາງ ວາເນັດຊາ ເຮັກກາທີ, ເລຂາເອກສະຖານທູດອົດສະຕຣາລີ, ໄດ້ອະທິບາຍເຖິງແຜນໂຄສະນາວ່າ: ຜ່ານເລື່ອງຈິງ ແລະ ການມີສ່ວນຮ່ວມຂອງຊຸມຊົນທີ່ມີຄວາມໝາຍ, ພວກເຮົາແນໃສ່ຊຸກຍູ້ໃຫ້ນັກຮຽນເຂົ້າໂຮງຮຽນ, ຮັບປະກັນໃຫ້ພໍ່ແມ່ຜູ້ປົກຄອງໄດ້ຮັບຜົນປະໂຫຍດດ້ານການສຶກສາຕະຫຼອດຊີວິດ ແລະ ສະເຫຼີມສະຫຼອງບົດບາດທີ່ຂາດບໍ່ໄດ້ຂອງຄູໃນການສອນໃຫ້ເດັກທີ່ຈະຜູ້ນຳໃນອະນາຄົດ. ລັດຖະບານອົດສະຕຣາລີ ຮູ້ສຶກເປັນກຽດທີ່ໄດ້ເຮັດວຽກຮ່ວມກັນກັບກະຊວງສຶກສາທິການ ແລະ ກິລາ ໃນແຜນໂຄສະນາການສຶກສາທີ່ສຳຄັນນີ້.
ເນື່ອງຈາກຜ່ານມາ ລະຄອນເລື່ອງ “ ສອງເສັ້ນທາງ ” ໄດ້ຮັບການຕອບຮັບຈາກສັງຄົມເປັນຢ່າງດີ ເພາະສະທ້ອນ
ໃຫ້ເຫັນເຖິງອະນາຄົດທີ່ກົງກັນຂ້າມກັນຂອງໄວໜຸ່ມທີ່ເລືອກການສຶກສາ ແລະ ຜູ້ທີ່ບໍ່ໄດ້ສຶກສາຮຽນຕໍ່, ເນັ້ນໃຫ້ເຫັນເຖິງວິທີທີ່ການສຶກສາເຮັດໃຫ້ຄົນມີທັກສະກາຄົ້ນຄິດແບບວິເຄາະ, ຄວາມຮູ້ກ່ຽວກັບຕົນເອງ ແລະ ໂລກ ແລະ ຄວາມສາມາດໃນການສ້າງໂອກາດໃຫ້ກັບຕົນເອງ. ດັ່ງນັ້ນຈຶ່ງໄດ້ສ້າງລະຄອນເລື່ອງທີ່ສອງເພີ່ມຕື່ມ ມີຊື່ວ່າ: “ ຄຸນຄ່າຂອງຄູ ”ເປັນບົດເລື່ອງທີ່ສ່ອງແສງເຖິງການອຸທິດຕົນຂອງຜູ້ເຮັດວຽກໃນຂະແໜງການສຶກສາ ແລະ ໝາກຜົນອັນຍິ່ງໃຫຍ່ຂອງວຽກງານ.
ວີດີໂອ ໄດ້ເຜີຍແຜ່ໃຫ້ຄູ, ຜູ້ເຮັດວຽກສຶກສານິເທດ ແລະ ຜູ້ເຮັດວຽກໃນຂະແໜງການສຶກສາ ເພື່ອຊ່ວຍກັນໂຄສະນາໃນຂັ້ນທ້ອງຖິ່ນໃນໂຮງຮຽນ ແລະ ແຕ່ລະບ້ານ ເຊິ່ງບໍ່ພຽງແຕ່ເພື່ອຊົມເຊີຍການສົ່ງເສີມການສຶກສາ, ແຕ່ເພື່ອປຸກລະດົມວິໃສທັດທີ່ດີຮ່ວມກັນກ່ຽວກັບການສ້າງອະນາຄົດທີ່ດີກວ່າ ໂດຍການສ້າງຄວາມຮູ້, ການອຸທິດຕົນໃນການສອນຂອງຄູ.