ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແລະ ພະແນກ ຖວທ ແຂວງຈໍາປາສັກ ສປປ ລາວ ຮ່ວມ ກັບ ບໍລິສັດ ພັດທະນາການທ່ອງທ່ຽວ ຈໍາກັດ ນໍາໂດຍ ທ່ານ ນາງ ດາລານີ ພົມມະວົງສາ ຮອງລັດຖະມົນຕີ ກະຊວງ ຖວທ, ທ່ານ ວັນນະໄຊ ຊາດຕາກຸນ ຫົວໜ້າພະແນກ ຖວທ ແຂວງຈຳ ປາສັກ ພ້ອມຄະນະ ໄດ້ເຂົ້າຮ່ວມງານວາງສະແດງສິນຄ້າການທ່ອງທ່ຽວ ແລະ ວັດທະນະທໍາສາກົນ ຢູ່ນະຄອນກວາງໂຈ ມົນທົນກ້ວາງຕຸງ ສປ ຈີນ ໃນວັນທີ 13 – 15 ກັນຍາ ນີ້.
ຈຸດປະສົງ ກໍເພື່ອເປັນການໂຄສະນາການທ່ອງທ່ຽວຂອງແຂວງຈຳປາສັກ ໃນເວທີສາກົນ ໃນໂອກາດທີ່ ສປປ ລາວ ເປີດປີທ່ອງທ່ຽວ 2024. ງານຄັ້ງນີ້ ມີຮ້ານວາງສະແດງ ຈາກ 50 ກວ່າປະເທດເຂົ້າຮ່ວມ. ສໍາລັບ ສປປ ລາວ ມີ 2 ຮ້ານເຂົ້າຮ່ວມວາງສະແດງ ຄື: ຮ້ານວາງສະແດງ ຂອງກະຊວງ ຖວທ ແລະ ຮ້ານວາງສະແດງຂອງ ພະແນກ ຖວທ ແຂວງຈຳປາສັກ. ສິ່ງທີ່ນໍາມາວາງສະແດງ ມີ ຜະລິດຕະພັນການທ່ອງທ່ຽວ ພ້ອມດ້ວຍບັນດາຂໍ້ມູນການທ່ອງທ່ຽວ ແລະ ເຄື່ອງທີ່ລະນຶກທີ່ສຳຄັນກ່ຽວກັບການທ່ອງທ່ຽວຈາກຜູ້ປະກອບການທ່ອງທ່ຽວຂອງ ສປປ ລາວ ເວົ້າລວມ, ເວົ້າສະເພາະ ແມ່ນແຂວງຈຳປາສັກ. ນອກນີ້ ກໍມີການສຳມະນາກ່ຽວກັບການພັດທະນາການທ່ອງທ່ຽວ ຕິດພັນກັບການສະແດງສີລະປະຊົນເຜົ່າ ແລະ ເຊັນສັນຍາຮ່ວມມືດ້ານການທ່ອງທ່ຽວ ກັບ ບໍລິສັດທ່ອງທ່ຽວ ທີ່ຢູ່ນະຄອນກວາງໂຈ ສປ ຈີນ ຕື່ມອິກ.
(ຂ່າວ: ທູນທອງໃຈ, ພາບ: ຂະແໜງທ່ອງທ່ຽວແຂວງ)
