ຕອນເຊົ້າຂອງວັນທີ 21 ມີນາ 2024 ນີ້, ການນໍາແຂວງວຽງຈັນ, ນຳໂດຍ ສະຫາຍ ຄຳພັນ ສິດທິດຳພາ ເຈົ້າແຂວງວຽງຈັນ ໄດ້ເຂົ້າວາງພວງມະລາ ຢູ່ທີ່ອະນຸສາວະລີ ນັກຮົບນິລະນາມ ຢູ່ກອງບັນຊາການທະຫານແຂວງ ແລະ ວາງກະຕ່າດອກໄມ້ ທີ່ຫໍພິພິຕະພັນປະທານ ໄກສອນ ພົມວິຫານ ເນື່ອງໃນໂອກາດ ວັນສ້າງຕັ້ງພັກ ປະຊາຊົນປະຕິວັດລາວ ຄົບຮອບ 69 ປີ (22ມີນາ1955-22ມີນາ2024) ວັນເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 78 ປີ (21ມີນາ1946-21ມີນາ2024) ຕິດພັນກັບປະຫວັດສາດມູນເຊື້ອຕົ້ນແຕ້ຈາລຶກຄວາມແຄ້ນຂອງຊາວເມືອງເຟືອງ.
ການວາງພວງມະລາໃນຄັ້ງນີ້, ເພື່ອເປັນການສະແດງເຖິງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນເຖິງຄຸນງາມຄວາມດີ ແລະ ນ້ຳໃຈຕໍ່ສູ້ ຢ່າງພິລະອາດຫານ ແລະ ບໍ່ຍອມຈຳນົນຂອງບັນພະບູລຸດລາວ ກໍຄືບັນດານັກຮົບປະຕິວັດທີ່ເສຍສະຫລະຊີວິດ, ເລືອດເນື້ອ ເພື່ອປະເທດຊາດ ແລະ ປະຊາຊົນ ຢ່າງອົງອາດກ້າຫານ ພາຍໃຕ້ການຊີ້ນຳ-ນຳພາ ຂອງພັກປະຊາຊົນ ປະຕິວັດລາວ ຈົນໄດ້ຮັບໄຊຊະນະ ແລະ ປະກາດເອກະລາດ, ສະຖາປະນາ ເປັນສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975, ເຊິ່ງ ຄຸນງາມຄວາມດີ ແລະ ຜົນງານອັນໃຫຍ່ຫລວງດັ່ງກ່າວ, ໄດ້ຖືກຈາລຶກໄວ້ໃນຊີວິດຈິດໃຈ ຂອງທົ່ວປວງຊົນລາວທັງຊາດ ຕະຫລອດໄປ. ພັກເຮົາຈະຕ້ອງໄດ້ສືບຕໍ່ຍົກສູງຄວາມສາມາດ ແລະ ເພິ່ມທະວີບົດບາດການນຳພາຂອງພັກໃນທຸກດ້ານ, ສ້າງພັກໃຫ້ປອດໄສເຂັ້ມແຂງ ແລະ ໜັກແໜ້ນນັ້ນ, ພະນັກງານ-ລັດຖະກອນ ແລະ ສະມາຊິກພັກທັງໝົດ ຕ້ອງກໍາແໜ້ນສະພາບວຽກງານການເມືອງແນວຄິດ ແລະ ເອົາໃຈໃສ່ປັບປຸງຄົ້ນຄວ້າທິດສະດີບົນພື້ນຖານຢຶດໝັ້ນ ທິສະດີ ມາກ-ເລນິນ; ເພິ່ມທະວີວຽກງານກໍ່ສ້າງພັກໃຫ້ໜັກແໜ້ນ ໂດຍຢຶດໝັ້ນຫຼັກການລວມສູນປະຊາທິປະໄຕ ໄປພ້ອມກັບລະບຽບວິໄນພາຍໃນພັກຢ່າງເຂັ້ມງວດ; ເຊີດຊູຄວາມເປັນແບບຢ່າງນຳໜ້າຂອງພະນັກງານ, ສະມາຊິກພັກ ໃນການເຄື່ອນໄຫວວຽກງານ ແລະ ການດຳລົງຊີວິດ; ເອົາໃຈໃສ່ປັບປຸງວຽກງານປ້ອງກັນພັກ, ບຳລຸງສ້າງຖັນແຖວພະນັກງານທາງດ້ານຄຸນສົມບັດ ແລະ ຄວາມສາມາດມີນ້ຳໃຈຮັບໃຊ້ຊາດ-ຮັບໃຊ້ປະຊາຊົນ, ມີສະຕິຕໍ່ການຈັດຕັ້ງ ແລະ ລະບຽບວິໄນຂອງພັກຢ່າງເຂັ້ມງວດ.
ພາບ-ຂ່າວ: ບຸນມາ ແກ້ວບຸດດາ
