ການນໍາແຂວງຈໍາປາສັກ ເຄື່ອນໄຫວອວຍພອນ ນາຍ ແລະ ພົນທະຫານຫຼາຍກົມກອງ ຢູ່ເມືອງປະທຸມພອນ
ວັນທີ 12 ກຸມພາ 2025, ສະຫາຍ ສະນັ່ນ ສີພາພົມມະຈັນ ຮອງເລຂາຄະນະບໍລິຫານງານພັກແຂວງ ຫົວໜ້າຄະນະຈັດຕັ້ງແຂວງຈໍາປາສັກ ຮອງປະທານຄະນະກໍາມະກາຍປ້ອງກັນຊາດ – ປ້ອງກັນຄວາມສະຫງົບແຂວງ ພ້ອມຄະນະ ໄດ້ເຄື່ອນໄຫວອວຍ ພອນ ນາຍ ແລະ ພົນທະຫານຫຼາຍກົມກອງ ທີ່ຕັ້ງຢູ່ເມືອງປະທຸມພອນ ຄື: ກອງພັນ 608, ໂຮງຮຽນການທະຫານທ້ອງຖິ່ນແຂວງ (ປ່າອາວ), ກອງບັນຊາການທະຫານເມືອງປະທຸມພອນ, ກອງຕີພິເສດ ຫຼັກ 28, ກອງຮ້ອຍສືບຂ່າວ ແລະ ສູນອົບຮົມນ້ຳພາກ ທີ່ຂຶ້ນກັບກອງພົນທະຫານຮາບທີ 5 ເນື່ອງໃນໂອກາດວັນທີ 20 ມັງກອນ ເຊີ່ງເປັນວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ.
ສະຫາຍຮອງເລຂາຄະນະບໍລິຫານງານພັກແຂວງ ພ້ອມຄະ ນະ ໄດ້ຮັບຟັງລາຍງານໂດຍຫຍໍ້ ຈາກການນໍາບັນດາກົມກອງທີ່ເຄື່ອນໄຫວອວຍພອນ ໂດຍຍົກໃຫ້ເຫັນກ່ຽວກັບສະພາບລວມ ແລະ ການຈັດຕັ້ງປະຕິບັດໜ້າທີ່ວຽກງານຂອງແຕ່ລະກົມກອງໃນໄລຍະທີ່ຜ່ານມາ.
ສະຫາຍ ສະນັ່ນ ສີພາພົມມະຈັນ ໄດ້ມີຄຳເຫັນໂອລົມຕໍ່ຄະນະ ພັກ – ຄະນະບັນຊາ, ນາຍ ແລະ ພົນທະຫານແຕ່ລະກົມກອງທີ່ເຂົ້າຮ່ວມ, ພ້ອມທັງອວຍພອນໄຊຄະນະພັກ – ຄະນະບັນຊາ, ພະນັກງານ – ນັກຮົບກຳລັງປະກອບອາວຸດກອງຮ້ອຍດັ່ງກ່າວ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ວຽກງານ ພ້ອມກັນສືບຕໍ່ຮັກສາທາດແທ້ ແລະ ມູນເຊື້ອອັນສະຫງ່າອົງອາດຂອງກອງທັບປະຊາຊົນລາວ ເພື່ອເຮັດສຳເລັດໜ້າທີ່ອັນມີກຽດໃນການປົກປັກຮັກສາ ແລະ ສ້າງສາພັດທະນາປະເທດຊາດ.
ການເຄື່ອນໄຫວຄັ້ງນີ້ ຍັງໄດ້ມອບເຄື່ອງອຸປະໂພກ - ບໍລິໂພກ ໃຫ້ແຕ່ລະກົມກອງ ລວມມູນຄ່າທັງໝົດ 60 ລ້ລ້ານກວ່າກີບ.
Cr: ສີສົມບູນ
