ວັນທີ 18 ຕຸລາ 2024, ທາງການຂອງຈີນໄດ້ເປີດເຜີຍຂໍ້ມູນເສດຖະກິດແຫ່ງຊາດໃນ 3 ໄຕມາດປີນີ້ ໂດຍສະແດງໃຫ້ເຫັນວ່າ: ລວມຍອດຜະລິດຕະພັນພາຍໃນຂອງ 3 ໄຕມາດປີນີ້ໄດ້ບັນລຸເຖິງ 94.974,6 ຕື້ຢວນ, ເພີ່ມຂຶ້ນ 4,8% ເມື່ອທຽບໃສ່ໄລຍະດຽວກັນຂອງປີກາຍ. ຈັງຫວະການເຕີບໂຕດັ່ງກ່າວໄດ້ມາບໍ່ແມ່ນງ່າຍ. ນັບແຕ່ຕົ້ນປີນີ້ເປັນຕົ້ນມາ, ສະພາບແວດລ້ອມມະຫາພາກມີຄວາມສັບສົນ ແລະ ມີການປ່ຽນແປງຢ່າງຫຼວງຫຼາຍ, ຄວາມກົດດັນຈາກພາຍນອກສືບຕໍ່ເພີ່ມຂຶ້ນ, ແຕ່ດັດຊະນີດ້ານເສດຖະກິດອັນສຳຄັນຂອງຈີນ ໄດ້ມີການປ່ຽນແປງຢ່າງຕັ້ງໜ້າ, ໄດ້ຮັກສາທ່ວງທ່າການເຄື່ອນໄຫວຢ່າງໝັ້ນທ່ຽງ ເຊິ່ງສ່ອງແສງໃຫ້ເຫັນເຖິງຄວາມໝັ້ນໜຽວ ແລະ ກຳລັງບົ່ມຊ້ອນອັນໃຫຍ່ຫຼວງຂອງເສດຖະກິດຈີນ.
ການປ່ຽນແປງດັ່ງກ່າວກໍໄດ້ສ່ອງແສງໃຫ້ເຫັນໃນດ້ານການລົງເລິກ ການດຳເນີນທຸລະກິດຢູ່ຈີນ ຂອງວິສາຫະກິດຕ່າງປະເທດເຊັ່ນກັນ. ກ່ອນໜ້ານີ້ບໍ່ດົນ, ຫ້ອງທົດລອງຄົ້ນຄວ້າການປະຍຸກຂອງບໍລິສັດ Apple ອາເມຣິກາ ປະຈໍານະຄອນເສີ່ນເຈີ້ນຂອງຈີນ ໄດ້ສ້າງສຳເລັດ; ໃນເດືອນກັນຍາທີ່ຜ່ານມາ, ບໍລິສັດ Audi ຂອງເຢຍລະມັນປະກາດຈະວາງແຜນຈັດວາງຜະລິດຕະພັນຢູ່ຈີນ ທີ່ມີຂະໜາດໃຫຍ່ທີ່ສຸດໃນປະຫວັດສາດຂອງຕົນ; ບໍລິສັດການແພດ GE ຂອງອາເມຣິກາປະກາດວ່າ: ຈະຈັດສັນງົບປະມານການຄົ້ນຄວ້າການພັດທະນາຢູ່ຈີນ ໃຫ້ເພີ່ມຂຶ້ນໜຶ່ງເທົ່າໃນ 3 ປີຕໍ່ໜ້າ. ວິສາຫະກິດຕ່າງປະເທດເຫຼົ່ານີ້ເຫັນວ່າ: ປະເທດຈີນເປັນຕະຫຼາດໃຫຍ່, ເຂົາເຈົ້າບໍ່ພຽງແຕ່ຈະຕ້ອງໄດ້ເຂົ້າເຖິງເທົ່ານັ້ນ, ຍິ່ງຈະຕ້ອງເຊື່ອມໂຍງເຂົ້າກັບຕະຫຼາດຂອງຈີນ ເຊິ່ງກໍຄື ເຮັດໃຫ້ຕະຫຼາດຈີນກາຍເປັນຕະຫຼາດໃຫຍ່ທີ່ທົ່ວໂລກໄດ້ຊົມໃຊ້ຮ່ວມກັນ ໂດຍ່ຜ່ານການຮ່ວມມືຢ່າງເລິກເຊິ່ງ.
