ການຜະລິດດ້ານອັດສະລິຍະຂອງຈີນໄດ້ຮັບຄວາມຄືບໜ້າຢ່າງແທ້ຈິງ
ຫວ່າງມໍ່ໆມານີ້, ວິສາຫະກິດແຫ່ງໜຶ່ງໃນນະຄອນເສິນເຈິ້ນຂອງຈີນໄດ້ເຜີຍແຜ່ວິດີໂອທີ່ສະແດງໃຫ້ເຫັນຫຸ່ນຍົນມະນຸດຫຼາຍຮ້ອຍເຄື່ອງຍ່າງເຂົ້າຕູ້ບັນທຸກສິນຄ້າຢ່າງເປັນລະບຽບຮຽບຮ້ອຍ ເຊິ່ງໄດ້ປະຈັກຕາຊາວໂລກທີ່ສຸດ. ແຕ່ຜູ້ສ້າງຕັ້ງວິສາຫະກິດຫຸ່ນຍົນທ່ານໜຶ່ງຂອງອາເມຣິກາພັດເວົ້າວ່າ: ວິດີໂອຕອນນີ້ແມ່ນສ້າງຂຶ້ນດ້ວຍຄອມພິວເຕີ, ບໍ່ແມ່ນເລື່ອງຈິງ. ກ່ຽວກັບເລື່ອງນີ້, ວິສາຫະກິດດັ່ງກ່າວຂອງຈີນໄດ້ເຜີຍແຜ່ວິດີໂອທີ່ຄົບຖ້ວນອອກທາງສື່ສັງຄົມອອນລາຍ ເພື່ອລົບລ້າງຄວາມສົງໄສຂອງນັກວິສາຫະກິດອາເມຣິກາທ່ານນັ້ນ ດ້ວຍຂໍ້ມູນຕົວຈິງ.
ເບື້ອງຫຼັງທີ່ເຮັດໃຫ້ເກີດການໂຕ້ຖຽງດັ່ງກ່າວ, ທາດແທ້ແມ່ນອະຄະຕິທາງປັນຍາພື້ນຖານທີ່ເກີດຈາກຊ່ອງຫວ່າງດ້ານຄວາມສາມາດຕົວຈິງໃນດ້ານນີ້. ການເຄື່ອນໄຫວທີ່ແມ່ນຢຳ ແລະ ສອດຄ່ອງກັນຂອງຫຸ່ນຍົນມະນຸດໃນວິດີໂອໄດ້ເປັນສິ່ງພິສູດໃຫ້ເຫັນຄວາມກ້າວໜ້າດ້ານເຕັກໂນໂລຊີຂອງຈີນໃນດ້ານການຄວບຄຸມ ແລະ ວິທີໄລລຽງ, ຍິ່ງໄປກວ່ານັ້ນ ຍັງເປັນເຄື່ອງພິສູດໃຫ້ເຫັນວ່ານະຄອນເສິນເຈິ້ນມີທ່າແຮງການຜະລິດຢ່າງເປັນຂະໜາດໃນດ້ານອຸດສາຫະກຳອັດສະລິຍະ: ຈາກການຄົ້ນຄວ້າພັດທະນາຊິ້ນສ່ວນແກນກາງເຖິງການຜະລິດຢ່າງເປັນຂະໜາດໃຫຍ່, ນະຄອນເສິນເຈິ້ນມີຕ່ອງໂສ້ອຸດສາຫະກຳທີ່ຄົບຊຸດ, ເຮັດໃຫ້ສະພາບທີ່ລ້ຳສະໄໝໃນຮູບເງົາກາຍເປັນຄວາມຈິງ. ແຕ່ເມື່ອພວກເຮົາສັງເກດຜູ້ທີ່ມີຄວາມສົງໄສແລ້ວເຫັນວ່າ: ອາດແມ່ນຍ້ອນມີຂໍ້ຈຳກັດດ້ານເຕັກນິກ, ຈົນຍາກທີ່ເຊື່ອວ່າ: ວິສາຫະກິດຈີນສາມາດຜະລິດຫຸ່ນຍົນມະນຸດຫຼາຍຮ້ອຍເຄື່ອງແລະມອບໃຫ້ລູກຄ້າຢ່າງເປັນເອກະພາບກັນ, ຈິ່ງໃຊ້ຄຳເວົ້າທີ່ວ່າ “ໃຊ້ເຕັກໂນໂລຊີທາງຄອມພິວເຕີ” ມາປິດບັງຄວາມຮູ້ທີ່ຫຼ້າຫຼັງຂອງຕົນ, ແຕ່ໃນທີ່ສຸດ ພວກເຂົາເຈົ້າບໍ່ສາມາດສູ້ກັບຄວາມເປັນຈິງໄດ້.
ການເປີດເຜີຍສະພາບຕົວຈິງຂອງວິສາຫະກິດຈີນແມ່ນເກີດຈາກສະພາບການປະດິດສ້າງໃໝ່ໃນດ້ານນີ້ຂອງຈີນໄດ້ມີການບຸກທະລຸຕົວຈິງແລ້ວ. ຈາກການຜະລິດຊິ້ນສ່ວນແກນກາງນັບມື້ນັບຫຼາຍຂຶ້ນ, ເຖິງການພັດທະນາຂອງທົ່ວຕ່ອງໂສ້ອຸດສາຫະກຳ; ຈາກການຂຸດຄົ້ນຄວາມຕ້ອງການຂອງຕະຫຼາດຢ່າງອ່ອນໄຫວຂອງວິສາຫະກິດເອກະຊົນຂອງຈີນ, ເຖິງການສະໜັບສະໜູນດ້ານນະໂຍບາຍຕໍ່ການປະດິດສ້າງໃໝ່ດ້ານວິທະຍາສາດເຕັກໂນໂລຊີ, ຈີນໄດ້ສ້າງເປັນລະບົບນິເວດທີ່ຄົບຖ້ວນ ໃນການຄ້ຳຊູການບຸກທະລຸວິທະຍາສາດເຕັກໂນໂລຊີລ້ຳສະໄໝ. ໃນຊຸມປີຜ່ານມາ, ວິສາຫະກິດເອກະຊົນຂອງຈີນໄດ້ກາຍເປັນກຳລັງໃໝ່ໃນການປະດິດສ້າງໃໝ່ ເຊິ່ງໄດ້ປະກອບສ່ວນຜົນງານປະດິດສ້າງໃໝ່ດ້ານວິທະຍາສາດເຕັກໂນໂລຊີຫຼາຍກວ່າ 70%. ໃນຂົງເຂດຫຸ່ນຍົນມະນຸດ, ຈາກການຜະລິດຂະໜາດໃຫຍ່ລະດັບອຸດສາຫະກຳເຖິງການບໍລິໂພກທົ່ວໄປ, ຈາກການປະຕິບັດດ້ານກົນຈັກເຖິງການສື່ສານກັນແບບອັດສະລິຍະ, ທຸກບາດກ້າວລ້ວນແຕ່ບໍ່ສາມາດແຍກອອກຈາກຄວາມກ້າຫານດ້ານການທົດລອງຂອງວິສາຫະກິດ ແລະ ຍິ່ງໄດ້ເພິ່ງພາອາໄສທ່າແຮງຂອງຕ່ອງໂສ້ການສະໜອງ ແລະ ການເຕົ້າໂຮມຊັບພະຍາກອນປະດິດສ້າງໃໝ່ດ້ານອຸດສາຫະກຳຂອງຈີນທີ່ໄດ້ສະສົມມາເປັນເວລາຫຼາຍປີ. ການເປີດເຜີຍຄວາມຈິງເທື່ອນີ້, ບໍ່ພຽງແຕ່ເປັນການພິສູດໃຫ້ເຫັນເຕັກໂນໂລຊີຂອງວິສາຫະກິດໃດໜຶ່ງເທົ່ານັ້ນ, ຍິ່ງແມ່ນການເປີດເຜີຍກຳລັງຕົວຈິງຂອງຕ່ອງໂສ້ອຸດສາຫະກຳການຜະລິດແບບອັດສະລິຍະຂອງຈີນອີກດ້ວຍ.
ຜະລິດຕະພັນປັນຍາປະດິດຂອງຈີນບໍ່ໄດ້ອາໄສກົນລະຍຸດເພື່ອດຶງດູດສາຍຕາຫຼື ຄວາມສົນໃຈຂອງຄົນອື່ນ, ແຕ່ໄດ້ຝັງຮາກເລິກໃນຕະຫຼາດ ແລະ ຂະຫຍາຍໄປສູ່ໂລກດ້ວຍຜົນສຳເລັດຕົວຈິງ. ຫຸ່ນຍົນລຸ້ນ Walker S2 ຂອງບໍລິສັດ UBTECH ຂອງຈີນໄດ້ຮັບໃບສັ່ງຊື້ມູນຄ່າຫຼາຍຮ້ອຍລ້ານຢວນ, ເຄື່ອງອາໄຫຼ່ແກນກາງຫຼາຍກວ່າ 70% ແມ່ນຜະລິດດ້ວຍຕົນເອງ, ຫຸ່ນຍົນເຫຼົ່ານີ້ໄດ້ເຂົ້າສູ່ໂຮງງານເພື່ອປະຕິບັດວຽກງານການຜະລິດ. ໃນພິທີສະເຫຼີມສະຫຼອງວັນສະຖາປະນາ ສປປ ລາວວັນທີ 2 ທັນວາຄົບຮອບ 50 ປິທີ່ຈັດຂຶ້ນໃນຫວ່າງມໍ່ໆມານີ້, ໂດຣນ 6.000 ລຳໄດ້ບິນຂຶ້ນສູ່ທ້ອງຟ້າ, ປະກອບເປັນຮູບພາບຕ່າງໆ ເຊັ່ນ: ທຸງຊາດລາວ, ເຄື່ອງໝາຍກາຊາດລາວ, ທາດຫຼວງ, ຊ້າງ ແລະ ຮູບພາບອື່ນໆ ລວມເຖິງຮູບຂອງທ່ານໄກສອນ ພົມວິຫານ ຜູ້ນຳພາກໍ່ຕັ້ງປະເທດລາວ ແລະ ເຄື່ອງໝາຍຂອງພິທີສະເຫຼີມສະຫຼອງດັ່ງກ່າວ ເຊິ່ງສາມາດຮຽກສຽງຮ້ອງໂຮມ່ວນຊື່ນຈາກມວນຊົນທີ່ເຂົ້າຮ່ວມຊົມຢ່າງຫຼວງຫຼາຍ. ການສະແດງໃນພິທີສະເຫຼີມສະຫຼອງດັ່ງກ່າວ, ທີມງານຂອງຈີນໄດ້ມີສ່ວນຮ່ວມນັບແຕ່ການການອອກແບບ, ການຂົນສົ່ງ ແລະ ຕິດຕັ້ງອຸປະກອນ ຈົນເຖິງການປັບປຸງ ແລະ ທົດລອງດ້ານເຕັກນິກຢູ່ສະຖານທີ່ຈັດງານ ແລະ ການຝຶກອົບຮົມບຸກຄະລາກອນ ເຊິ່ງບໍ່ພຽງແຕ່ໄດ້ສະແດງໃຫ້ເຫັນເຖິງຄວາມສາມາດຕົວຈິງໃນດ້ານວິທະຍາສາດເຕັກໂນໂລຊີຂອງຈີນກ້າວສູ່ສາກົນເທົ່ານັ້ນ, ຍັງໄດ້ສ້າງພະລັງຊີວິດໃໝ່ດ້ານວິທະຍາສາດເຕັກໂນໂລຊີໃນການຮ່ວມມືລາວ-ຈີນຕື່ມອີກ.
ຄວາມຈິງເປັນການພິສູດໃຫ້ເຫັນທີ່ດີກວ່າໝູ່. ຜະລິດຕະພັນປັນຍາປະດິດຂອງຈີນບໍ່ໄດ້ສຳເລັດຜົນພຽງຄ່ຳຄືນດຽວ ແຕ່ເກີດຈາກການຍຶດໝັ້ນການພັດທະນາອຸດສາຫະກຳ ແລະ ກ້າວເດີນໄປໜ້າຢ່າງໝັ້ນທ່ຽງ. ໃນອະນາຄົດ ຈີນຈະສືບຕໍ່ບຸກທະລຸກຳແພງດ້ານເຕັກໂນໂລຊີ ແລະ ເພີ່ມຄວາມສາມາດຕົວຈິງດ້ານອຸດສາຫະກຳ, ລົບລ້າງທຸກຄວາມສົງໄສດ້ວຍຜົນງານຕົວຈິງຫຼາຍກວ່າເກົ່າ ແລະ ຂຽນປະຫວັດສາດໜ້າໃໝ່ຕາມເສັ້ນທາງການພັດທະນາດ້ານການປະດິດສ້າງໃໝ່.