ການລົງທຶນໃນຊັບສິນຢູ່ອາເມຣິກາຍັງຜະເຊີນກັບຄວາມຫຍຸ້ງຍາກ
ຫຼັງຈາກທີ່ອາເມຣິກາ ໄດ້ປະກາດທີ່ກ່ຽວຂ້ອງກັບກຣີນແລນ, ການຮຽກຮ້ອງໃຫ້ “ຂາຍອອກຈາກອາເມຣິກາ” ຍັງສືບຕໍ່ໄດ້ຮັບຄວາມສົນໃຈ. ໃນອາທິດແລ້ວນີ້, ດັດຊະນີເງິນໂດລາສະຫະລັດໄດ້ຂະຫຍາຍທ່າອ່ຽງຫຼຸດລົງ, ໂດຍຫຼຸດລົງຕໍ່າກວ່າຈຸດ 98. Bloomberg ລາຍງານວ່າ ຄວາມເຄັ່ງຕຶງທີ່ເພີ່ມຂຶ້ນລະຫວ່າງອາເມຣິກາ ແລະ ເອີຣົບໄດ້ສົ່ງຜົນກະທົບຕໍ່ເງິນໂດລາສະຫະລັດ, ໃນຂະນະດຽວກັນໄດ້ກະຕຸ້ນການເຈລະຈາຍົກເລີກການລົງທຶນທົ່ວໂລກຄັ້ງໃໝ່. ການລົງທຶນໃນກອງທຶນຕະຫຼາດໃໝ່ພົ້ນເດັ່ນຂຶ້ນເປັນປະຫວັດສາດ, ທັງຊຸກຍູ້ໃຫ້ດັດຊະນີຫຸ້ນຕະຫຼາດເກີດໃໝ່ປັບຕົວສູງຂຶ້ນສູ່ລະດັບສູງສຸດໃນປະຫວັດສາດເຊັ່ນດຽວກັນ.
ດັດຊະນີຕະຫຼາດເກີດໃໝ່ MSCI ໄດ້ປັບຕົວຂຶ້ນຕິດຕໍ່ກັນເປັນອາທິດທີ 5 ເຊິ່ງເປັນການປັບຕົວເພີ່ມຂຶ້ນທີ່ຍາວນານທີ່ສຸດນັບຕັ້ງແຕ່ເດືອນພຶດສະພາປີກາຍ. ມາຮອດປີນີ້, ດັດຊະນີໄດ້ປັບຂຶ້ນປະມານ 7%, ໂດຍມີຫຸ້ນກຸ່ມເຕັກໂນໂລຊີໃນອາຊີເປັນຕົວຂັບເຄື່ອນຫຼັກຂອງການເພີ່ມຂຶ້ນຂອງດັ່ງກ່າວ. ເວທີການວິເຄາະທາງດ້ານການເງິນ GoldSilver ໃຫ້ຄວາມເຫັນ “ຄວາມເຊື່ອໝັ້ນ ເມື່ອຖືກສັ່ນຄອນ, ບໍ່ມັກຈະກັບຄືນມາຢ່າງງຽບໆ. ຖ້າຫາກມີຜູ້ຖືຫຸ້ນຕ່າງປະເທດພຽງແຕ່ 2-3% ເທົ່ານັ້ນທີ່ຕິດຕາມມາ, ສິ່ງນີ້ອາດຈະສ້າງຜົນກະທົບອັນໃຫຍ່ຫຼວງໄດ້”. ເງິນໂດລາສະຫະລັດຍັງບໍ່ມີສັນຍານວ່າຈະເຖິງຈຸດຕໍ່າສຸດ: ໃນປີ 2025, ດັດຊະນີຄ່າເງິນດັ່ງກ່າວໄດ້ຫຼຸດລົງຈາກປະມານ 108 ໃນຕົ້ນປີ ມາເປັນປະມານ 98 ໃນທ້າຍປີ, ເຊິ່ງເປັນການຫຼຸດລົງສະສົມ 9,4% ແລະ ເປັນຜົນງານປະຈຳປີທີ່ຮ້າຍແຮງທີ່ສຸດໃນຮອບ 8 ປີ, ທັງເປັນຄັ້ງທຳອິດໃນຮອບຫຼາຍທົດສະວັດທີ່ທະນາຄານກາງຂອງອາເມຣິກາຖືຄອງຄໍາຫຼາຍກວ່າພັນທະບັດລັດຖະບານອາເມຣິກາ, ເຊິ່ງເປັນສັນຍານເຖິງການຕັ້ງຄຳຖາມຫຼາຍຂຶ້ນກ່ຽວກັບການຄອບງຳຂອງເງິນໂດລາສະຫະລັດ ແລະ ຄວາມຕ້ອງການທີ່ເພີ່ມຂຶ້ນສຳລັບການປ້ອງກັນຄວາມສ່ຽງທາງພູມສາດການເມືອງ.
ອີງຕາມບົດລາຍງານການຄົ້ນຄວ້າທີ່ເຜີຍແຜ່ໂດຍ KTrade Securities ໃນວັນທີ 26 ມັງກອນ 2026, ການຫຼຸດລົງສະທ້ອນໃຫ້ເຫັນເຖິງການປ່ຽນແປງນະໂຍບາຍພາຍໃນ ແລະ ຄວາມບໍ່ແນ່ນອນທາງດ້ານເສດຖະກິດທີ່ເພີ່ມຂຶ້ນ:
ນະໂຍບາຍການເງິນ: ການຖົກຖຽງກັນກ່ຽວກັບພາສີທີ່ບໍ່ສາມາດຄາດຄະເນໄດ້ເຮັດໃຫ້ເງິນໂດລາສະຫະລັດມີຄວາມຫນ້າເຊື່ອຖືຫນ້ອຍລົງໃນຖານະຊັບສິນທີ່ປອດໄພ. ຂະນະທີ່ ຄວາມໄວ້ວາງໃຈຂອງສະຖາບັນ: ຄວາມກັງວົນກ່ຽວກັບຄວາມເປັນອິດສະຫຼະຂອງທະນາຄານກາງອາເມຣິກາ ແລະ ການປ່ຽນແປງຄວາມຄາດຫວັງກ່ຽວກັບອັດຕາດອກເບ້ຍໄດ້ສົ່ງຜົນໃຫ້ລາຄາຫຸ້ນຫຼຸດລົງ.
ການປະເມີນມູນຄ່າສູງເກີນໄປ: ຫຼາຍປີທີ່ເງິນໂດລາແຂງຄ່າຂຶ້ນໄດ້ຫຼຸດຜ່ອນຄວາມສາມາດໃນການແຂ່ງຂັນທາງການຄ້າຂອງອາເມຣິກາ. ການປ່ຽນແປງຂອງຕະຫຼາດໃນປັດຈຸບັນກຳລັງແກ້ໄຂການປະເມີນມູນຄ່າສູງເກີນໄປນີ້, ເຖິງວ່າພວກມັນເຮັດໃຫ້ເກີດຄວາມຜັນຜວນສູງກໍຕາມ.
(ຄາດຄະເນດັດຊະນີເງິນໂດລາສະຫະລັດຈະປັບຕົວຫຼຸດລົງໃນອີກຫຼາຍປີຕໍ່ໜ້າ. ຮູບໂດຍ: KTrade Securities)
ຄວາມຜັນຜວນໃນນະໂຍບາຍການຕ່າງປະເທດຂອງອາເມຣິກາໄດ້ເພີ່ມຄວາມກັງວົນໃຫ້ກັບບາງປະເທດກ່ຽວກັບການເພິ່ງພາເງິນໂດລາສະຫະລັດຫຼາຍເກີນໄປ. ການກະທຳທີ່ຜ່ານມາ, ລວມທັງການກະທໍາທີ່ກ່ຽວຂ້ອງກັບເວເນຊູເອລາ, ອີຣານ ແລະ ກຣີນແລນ ໄດ້ຊຸກຍູ້ໃຫ້ມີຄວາມຫຼາກຫຼາຍຂອງຄັງສຳຮອງ ແລະ ການວາງຕຳແໜ່ງປ້ອງກັນຄວາມສ່ຽງຫຼາຍຂຶ້ນ. ໃນອາທິດນີ້, ລາຄາຄຳໄດ້ທະລຸລະດັບ 5,000 ໂດລາ/ອອນສ໌ ເປັນຄັ້ງທຳອິດໃນປະຫວັດສາດ: ທ່ານ ມູຮໍາໝັດ ຟາຣ່ານຂ່ານ, ຮອງຜູ້ອຳນວຍການບໍລິສັດ KTrade Securities ໃຫ້ຄວາມເຫັນວ່າ: “ຄວາມບໍ່ແນ່ນອນຂອງເງິນໂດລາສະຫະລັດທີ່ກ່ຽວຂ້ອງກັບການຫຼຸດຄ່າເງິນໂດລາມີທ່າອ່ຽງທີ່ຈະເກີດຂຶ້ນເປັນໄລຍະ. ເມື່ອຄວາມເຄັ່ງຕຶງທາງພູມສາດການເມືອງເພີ່ມຂຶ້ນ ຫຼື ຄວາມສ່ຽງດ້ານນະໂຍບາຍເພີ່ມຂຶ້ນ, ແຮງກົດດັນຕໍ່ເງິນໂດລາສະຫະລັດຈະກັບຄືນມາ. ເມື່ອຄວາມສ່ຽງເຫຼົ່ານັ້ນຫຼຸດລົງ, ປັດໄຈແບບດັ້ງເດີມຫຼາຍກວ່າ ເຊັ່ນ: ອັດຕາດອກເບ້ຍ, ການເຕີບໂຕທາງເສດຖະກິດ, ແລະ ຄວາມຮູ້ສຶກຄວາມສ່ຽງໂດຍລວມມັກຈະຄອບງຳ.
ໜີ້ສິນຂອງອາເມຣິກາ: ຄວາມບໍ່ແນ່ນອນຍັງຄົງມີຢູ່ໃນຕະຫຼາດ ຍ້ອນວ່ານັກລົງທຶນໃຫ້ຄວາມສົນໃຈດ້ານການເງິນຂອງອາເມຣິກາຫຼາຍຂຶ້ນ ຍ້ອນການຂາດດຸນທີ່ເພີ່ມຂຶ້ນ ເຊິ່ງເຫັນວ່າເປັນສິ່ງສະໜັບສະໜູນຕໍ່ລາຄາຄຳໃນໄລຍະກາງຫາໄລຍະຍາວ. ບົດລາຍງານຂອງ KTrade ຊີ້ໃຫ້ເຫັນວ່າ: ໜີ້ສິນແຫ່ງຊາດຂອງອາເມຣິກາ, ເຊິ່ງກໍາລັງມຸ່ງໜ້າໄປສູ່ລະດັບທີ່ບໍ່ເຄີຍມີມາກ່ອນ 39,000 ຕື້ໂດລາ, “ໄດ້ເຖິງຈຸດວິກິດທີ່ທຽບເທົ່າກັບເສດຖະກິດໂດຍລວມ, ໂດຍລະດັບໜີ້ສິນຕໍ່ GDP ທີ່ຄົງຢູ່ໃກ້120% ຫຼັງປີ 2020, ເຊິ່ງເຮັດໃຫ້ຈຳເປັນຕ້ອງມີການປ່ຽນແປງໂຄງສ້າງໃນນະໂຍບາຍການເງິນ”.
(ເສັ້ນໂຄ້ງຜົນຕອບແທນຂອງພັນທະບັດລັດຖະບານອາເມຣິກາໃນໄລຍະຍາວຈະຜະເຊີນກັບແຮງກົດດັນເພີ່ມຂຶ້ນ, ເຊິ່ງນຳໄປສູ່ການເພີ່ມຂຶ້ນອີກໃນປີ 2026 ຍ້ອນວ່າຜົນຕອບແທນຍັງສືບຕໍ່ເພີ່ມຂຶ້ນ. ຮູບພາບໂດຍ KTrade Securities)
ໂດຍພື້ນຖານແລ້ວ, ຄວາມເຊື່ອໝັ້ນໃນຄວາມຈະເລີນຮຸ່ງເຮືອງທາງດ້ານເສດຖະກິດຂອງອາເມຣິກາກຳລັງອ່ອນແອລົງ ເຊິ່ງເຮັດໃຫ້ສິ່ງທີ່ເປັນພື້ນຖານຂອງຄວາມດຶງດູດໃຈຂອງກະຊວງການເງິນອາເມຣິກາຫຼຸດລົງ. ຜູ້ຊ່ຽວຊານໃນການສຳຫຼວດ Blue Chip ຄາດວ່າການເຕີບໂຕຂອງ GDP ຂອງອາເມຣິກາຈະຢູ່ທີ່ 1.9% ໃນປີ 2026. ຂະນະທີ່ຊ່ອງຫວ່າງທີ່ຈະແຈ້ງຍັງຄົງຢູ່ລະຫວ່າງຂໍ້ມູນເສດຖະກິດຫຼັກ ແລະ ຄວາມຮູ້ສຶກຂອງປະຊາຊົນ. ໃນອາທິດແລ້ວນີ້, ສຳນັກງານວິເຄາະເສດຖະກິດອາເມຣິກາ (BEA) ໄດ້ປັບປຸງການເຕີບໂຕຂອງ GDP ໃນໄຕມາດທີສາມຂອງປີ 2025 ຂຶ້ນເປັນ 4,4%, ເຊິ່ງເປັນອັດຕາທີ່ໄວທີ່ສຸດໃນຮອບ 2 ປີ. ຢ່າງໃດກໍຕາມ ຕົວເລກການເຕີບໂຕທີ່ສູງເກີນຈິງຍ້ອນຜົນກຳໄລໃນບັນດາຄົນຮັ່ງມີ ແລະ ການຂະຫຍາຍຕົວຂອງການລົງທຶນຂອງອາເມລິກາໃນດ້ານ AI ທີ່ດີຂຶ້ນສະທ້ອນໃຫ້ເຫັນພາບ ທີ່ບໍ່ຄົບຖ້ວນກ່ຽວກັບບັນຫາພື້ນຖານຖານຂອງເສດຖະກິດ.
ອີງຕາມການສຳຫຼວດຂອງ The Economist/YouGov ພົບວ່າ: ມີພຽງ 27% ຂອງຜູ້ຕອບແບບສອບຖາມໃຫ້ຄະແນນເສດຖະກິດວ່າດີເລີດ ຫຼື ດີ, ໃນຂະນະທີ່ 72% ເຫັນວ່າຢູ່ໃນລະດັບປານກາງ. ມີພຽງ 29% ເທົ່ານັ້ນທີ່ເຊື່ອວ່ານະໂຍບາຍຂອງລັດຖະບານໄດ້ຊ່ວຍສ້າງວຽກເຮັດງານທຳ, ເມື່ອທຽບກັບ 75% ທີ່ລາຍງານວ່າລາຄາສິນຄ້າເພີ່ມຂຶ້ນ. 61% ເຊື່ອວ່ານະໂຍບາຍເຫຼົ່ານັ້ນໄດ້ຊຸກຍູ້ໃຫ້ຄ່າປະກັນໄພສຸຂະ ພາບເພີ່ມຂຶ້ນ.
ການສຶກສາພົບວ່າ: ຢູ່ເບື້ອງຫຼັງຕົວເລກທາງດ້ານເສດຖະກິດທີ່ເປັນໄປໄດ້, ຄວາມແຕກຕ່າງດ້ານຄວາມຮັ່ງມີແມ່ນເຫັນໄດ້ຊັດເຈນ. 10% ຂອງຜູ້ມີລາຍໄດ້ສູງສຸດຄິດເປັນປະມານເຄິ່ງໜຶ່ງຂອງການໃຊ້ຈ່າຍຂອງຜູ້ບໍລິໂພກທັງໝົດຂອງອາເມຣິກາ ເພີ່ມຂຶ້ນຈາກ 36% ໃນ 3 ທົດສະວັດກ່ອນ. ຄົວເຮືອນເຫຼົ່ານີ້, ໂດຍປົກກະຕິແລ້ວມີລາຍໄດ້ 250,000 ໂດລາຕໍ່ປີ, ສືບຕໍ່ໄດ້ຮັບຜົນປະໂຫຍດຈາກມູນຄ່າຊັບສິນທີ່ເພີ່ມຂຶ້ນ ແລະ ລາຍໄດ້ທາງທຸລະກິດທີ່ເຂັ້ມແຂງ. ການໃຊ້ຈ່າຍທີ່ແຂງແຮງຂອງພວກເຂົາໃນສິນຄ້າ ແລະ ການບໍລິການຟຸ່ມເຟືອຍໄດ້ປິດບັງຄວາມກົດດັນທາງດ້ານການເງິນທີ່ເພີ່ມຂຶ້ນເຊິ່ງປະຊາຊົນສ່ວນທີ່ເຫຼືອກຳລັງຜະເຊີນ.
ສຳລັບ 80% ຂອງຄົວເຮືອນທີ່ມີລາຍໄດ້ຕໍ່າສຸດ, ການເຕີບໂຕຂອງການໃຊ້ຈ່າຍເກືອບບໍ່ທັນກັບອັດຕາເງິນເຟີ້. ຫຼາຍຄົນໄດ້ປ່ຽນຈາກສິນເຊື່ອໄປເປັນບັດເດບິດ, ຫຼຸດຜ່ອນການຊື້ສິນຄ້າຕາມຄວາມຕ້ອງການ, ແລະພະຍາຍາມສ້າງເງິນຝາກປະຢັດຄືນໃໝ່. ອັດຕາການຄ້າງຊໍາລະໜີ້ບັດ ເຄຣດິດ ແລະ ເງິນກູ້ລົດຍົນໄດ້ເກີນລະດັບກ່ອນເກີດສະພາບຫຍຸ້ງຍ່ກທາງເາດຖະກິດ. ນັບແຕ່ໄຕມາດທີ 4 ປີ 2024 ອັດຕາການຄ້າງຊໍາລະໜີ້ໄດ້ເພີ່ມຂຶ້ນຢ່າງຫຼວງຫຼາຍເປັນປະຫວັດສາດໃນລະດັບສູງ. CNN ລາຍງານເມື່ອບໍ່ດົນມານີ້, ໂດຍອ້າງອີງຂໍ້ມູນຂອງ ທະນາຄານຂອງອາເມຣິກາ ວ່າ ໃນປີຜ່ານມາການເຕີບໂຕຂອງຄ່າຈ້າງສໍາລັບຄົວເຮືອນທີ່ມີລາຍໄດ້ປານກາງແມ່ນມີພຽງແຕ່ 2,3%, ໃນຂະນະທີ່ຄົວເຮືອນທີ່ມີລາຍໄດ້ຕໍ່າໄດ້ເຫັນການເພີ່ມຂຶ້ນພຽງແຕ່ 1,4%.
(ນັບຕັ້ງແຕ່ປີ 2019 ເປັນຕົ້ນມາ ອັດຕາສ່ວນການບໍລິໂພກຂອງອາເມຣິກາທີ່ກວມເອົາ 10% ຂອງຜູ້ມີລາຍໄດ້ສູງສຸດໄດ້ເພີ່ມຂຶ້ນເກືອບ 50%. ຮູບພາບໂດຍ KTrade SeSecurities ).
ການສຳຫຼວດຂອງ Bankrate ພົບວ່າ: 59% ຂອງຜູ້ຕອບແບບສອບຖາມບໍ່ສາມາດຄວບຄຸມຄ່າໃຊ້ຈ່າຍທີ່ບໍ່ຄາດຄິດ 1,000 ໂດລາໄດ້. ບົດລາຍງານປີ 2025 ຂອງທະນາຄານ PNC ສະ ແດງໃຫ້ເຫັນວ່າປະມານ 67% ຂອງພະນັກງານອາເມຣິກາດຳລົງຊີວິດດ້ວຍເງິນເດືອນຕໍ່ເດືອນ. ຮ່າງກົດໝາຍໃຫຍ່ ແລະ ງາມ (One Big Beautiful) ຄາດວ່າຈະເຮັດໃຫ້ຄວາມບໍ່ສະເໝີພາບຂອງລາຍໄດ້ເພີ່ມຂຶ້ນ, ໂດຍມີແຜນທີ່ຈະຕັດເງິນເດືອນເກືອບ 1,000 ຕື້ໂດລາຈາກ Medicaid ເຊິ່ງເປັນໂຄງການຊ່ວຍເຫຼືອດ້ານອາຫານ, ແລະໂຄງການສະຫວັດດີການສັງຄົມອື່ນໆໃນໄລຍະທົດສະວັດຕໍ່ໄປ.
ຫຸ້ນຂອງອາເມຣິກາບໍ່ໄດ້ສົດໃສຢ່າງທີ່ຄິດ. ໂດຍລວມແລ້ວ, ຫຸ້ນຂອງອາເມຣິກາໃຫ້ຜົນຕອບແທນເພີ່ມຂຶ້ນ 16% ໃນປີ 2025, ໂດຍມີກຳໄລສ່ວນໃຫຍ່ມາຈ່ກບໍລິສັດ “Magnificent 7” (Apple, Microsoft, Alphabet, Amazon, Nvidia, Meta, ແລະ Tesla), ເຊິ່ງກວມເອົາປະມານໜຶ່ງສ່ວນສາມຂອງມູນຄ່າຕະຫຼາດທັງໝົດ. ເນື່ອງຈາກມີພຽງປະມານ 30% ຂອງລາຍຮັບຂອງບໍລິສັດໃນດັດຊະນີ S&P 500 ທີ່ສ້າງຂຶ້ນຢູ່ຕ່າງປະເທດ, ສະຖານະພາບທີ່ປອດໄພຂອງຊັບສິນຂອງອາເມຣິກາທີ່ຊຸດໂຊມລົງຍ້ອນການຫຼຸດລົງຂອງຄ່າເງິນໂດລາຈະສົ່ງຜົນກະທົບຕໍ່ລາຍໄດ້ຂອງບໍລິສັດຕ່າງໆ.