ວັນທີ 21 ພະຈິກນີ້, ກອງປະຊຸມໃຫຍ່ການຮ່ວມມືດ້ານສະ ບຽງອາຫານ ແລະກະສິກຳເຫີນານ-ອາຊຽນ 2024 ໄດ້ຈັດຂຶ້ນຢູ່ສູນປະຊຸມ ແລະວາງສະແດງສາກົນເຈິ້ງໂຈ່ວແຂວງເຫີນານຈີນຢ່າງຍິ່ງໃຫຍ່, ທ່ານ ສົມພອນ ສີຈະເລີນ ເອກອັກຄະລັດຖະທູດລາວປະຈຳ ສປ ຈີນ ໄດ້ເຂົ້າຮ່ວມພິທີເປີດກອງປະຊຸມ ແລະກ່າວຄຳເຫັນ.
ທ່ານ ສົມພອນ ສີຈະເລີນ ກ່າວວ່າ: ຂ້າພະເຈົ້າດີໃຈຫຼາຍ ແລະຮູ້ສຶກເປັນກຽດຢ່າງສູງທີ່ໄດ້ມານະຄອນເຈິ້ງໂຈ່ວແຂວງເຫີນານທີ່ສວຍງາມ, ເພື່ອເຂົ້າຮ່ວມກອງປະຊຸມໃຫຍ່ການຮ່ວມມືດ້ານສະ ບຽງອາຫານ ແລະກະສິກຳເຫີນານ-ອາຊຽນ 2024, ມິດຕະພາບທີ່ມີມາເປັນເວລາດົນນານລະຫວ່າງລາວກັບຈີນໄດ້ສ້າງພື້ນຖານຢ່າງໝັ້ນແກ່ນໃຫ້ແກ່ການຮ່ວມມືລະຫວ່າງສອງປະເທດໃນຂົງເຂດກະສິກຳ, ໃນຫຼາຍປີຜ່ານມານີ້, ພວກເຮົາໄດ້ເປັນສັກຂີພິຍານໃຫ້ແກ່ການພັດທະນາຢ່າງພົ້ນເດັ່ນດ້ານການພົວພັນຂອງທັງສອງປະເທດ, ໂດຍສະເພາະໃນດ້ານມາດຕະການທີ່ມີເປົ້າໝາຍຍົກສູງຄວາມສາມາດດ້ານການຜະລິດກະສິກຳ ແລະຄວາມໝັ້ນຄົງດ້ານສະບຽງອາຫານ, ການຮ່ວມມືລະຫວ່າງສອງຝ່າຍໄດ້ຮັບຜົນງານຢ່າງແທ້ຈິງ.
ໂດຍຜ່ານຂອບຕ່າງໆເຊັ່ນ: ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ເປັນຕົ້ນ, ສອງປະເທດໄດ້ເພີ່ມທະວີການເຊື່ອມໂຍງເຊື່ອມຈອດກັນ, ໄດ້ຊຸກຍູ້ການແລກປ່ຽນດ້ານເຕັກນິກ, ຄວາມຮູ້ ແລະພຶດຕິກຳທີ່ດີທີ່ສຸດ. ຢູ່ປະເທດລາວ, ພວກຂ້າພະເຈົ້າໄດ້ຮັບຜົນປະໂຫຍດຈາກການລົງທຶນຂອງຈີນໃນດ້ານພື້ນຖານໂຄງລ່າງກະສິກຳ, ລວມທັງການລົງທຶນໃນລະບົບຊົນລະປະທານ, ສິ່ງກໍ່ສ້າງປຸງແຕ່ງຜະລິດຕະພັນກະສິກຳ ແລະການຄົ້ນຄວ້າເຕັກນິກກະສິກຳແບບຍືນຍົງ, ການລົງທຶນເຫຼົ່ານີ້ບໍ່ພຽງແຕ່ໄດ້ຍົກສູງຜົນຜະລິດດ້ານກະສິກຳຂອງລາວເທົ່ານັ້ນ, ຍັງໄດ້ສະໜອງເຄື່ອງມື ແລະຄວາມຮູ້ທີ່ຈຳເປັນໃຫ້ແກ່ຊາວກະສິກອນລາວເພື່ອເຕີບໂຕຢ່າງແຂງແຮງໃນຕະຫຼາດໂລກທີ່ມີການປ່ຽນແປງຢ່າງບໍ່ຢຸດຢັ້ງຕື່ມອີກ.
ນອກຈາກນີ້, ການຮ່ວມມືລະຫວ່າງສອງປະເທດໄດ້ພັດທະນາກ້າວເຖິງຂັ້ນສ້າງຄວາມສາມາດ ແລະແຜນການເຝິກອົບຮົມທີ່ເນັ້ນໃສ່ການເຄື່ອນໄຫວດ້ານກະສິກຳແບບຍືນຍົງ, ໂດຍຜ່ານການແບ່ງປັນຄວາມຮູ້ດ້ານວິຊາການ, ພວກເຮົາໄດ້ສະໜອງເຕັກນິກປະດິດສ້າງໃໝ່ໃຫ້ແກ່ຊາວກະສິກອນລາວ, ເຕັກນິກເຫຼົ່ານີ້ໄດ້ຊຸກຍູ້ການອະນຸລັກສິ່ງແວດລ້ອມຂອງປະເທດລາວໃນຂະນະທີ່ຍົກສູງກຳລັງການຜະລິດ. ການຮ່ວມມືລະຫວ່າງຈີນກັບລາວໄດ້ສະແດງໃຫ້ເຫັນເຖິງຄຳໝັ້ນສັນຍາ ແລະຄວາມພະຍາຍາມຂອງພວກເຮົາກ່ຽວກັບການບັນລຸຄວາມໝັ້ນຄົງດ້ານສະບຽງອາຫານ ສ້າງຊົນນະບົດ ແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ.
