ກຽມຈັດງານຕະຫຼາດນັດວາງສະແດງ ແລະ ຂາຍສິນຄ້າ ທີ່ເມືອງໄຊທານີ ໃນເດືອນທັນວາ

ພິທີຖະແຫຼ່ງຂ່າວການກະກຽມຈັດງານຕະຫຼາດນັດວາງສະແດງ ແລະ ຂາຍສິນຄ້າກະສິກຳ ຫັດຖະກຳ ແລະ ອຸດສາຫະກຳຄັ້ງທີ VIII ປະຈຳປີ 2024 ຂອງເມືອງໄຊທານີ ນະຄອນຫລວງວຽງ ຈັດຂຶ້ນໃນວັນທີ 29 ພະຈິກ 2024 ທີ່ຫ້ອງວ່າການປົກຄອງເມືອງໄຊທານີ ໂດຍການຖະແຫຼງຂອງທ່ານ ວຽງຄຳ ສີຫາໂຄດ ເຈົ້າເມືອງໄຊທານີ.

ທ່ານ ວຽງຄຳ ສີຫາໂຄດ ໃຫ້ຮູ້ວ່າ: ສິນຄ້າທີ່ຈະເຂົ້າຮ່ວມວາງສະ ແດງ ແລະ ຂາຍໃນງານຄັ້ງນີ້ ແມ່ນຜົນງານການຜະລິດສິນຄ້າໂອ

ດ໋ອບຂອງເມືອງ ແລະ ເມືອງອ້ອມຂ້າງ ຕ່າງແຂວງ ແລະ ສິນຄ້າຄ້າຈາກຄອບຄົວຕົວແບບທີ່ເປັນໜໍ່ ແໜງຜະລິດເປັນສີນຄ້າຂອງແຕ່ລະບ້ານມີ 65 ຫົວໜ່ວຍ ຜົນຜະລິດຈາກບັນດາໂຮງຈັກ ໂຮງງານ ໂຮງຊ່າງຫັດຖະກຳ ແລະ ອຸດສາຫະກຳ 20 ຫົວ ໜ່ວຍ ຜົນງານການຜະລິດຈາກບັນດາຫົວໜ່ວຍທຸລະກິດ ບໍລິສັດ ແລະ ການຄ້າ-ການບໍລິການທົ່ວ ໄປ 30 ຫົວໜ່ວຍ.

ນອກຈາກນີ້ ຍັງຈະມີກິດຈະກຳກິລາ ວັນນະຄະດີ ຕ່າງໆ ລວມທັງການສະແດງບຸນກອງເຂົ້າ ສະແດງງົວງາມ-ຄວາຍງາມ ທີ່ເປັນຜົນງານຂອງຊາວກະສິກອນພາຍໃນ ເມືອງໄຊທານີຕື່ມອີກ.

ງານຕະຫຼາດນັດດັ່ງກ່າວ ຈະຈັດຂຶ້ນລະຫວ່າງວັນທີ 18-23 ທັນວາທີ່ຈະມາເຖິງນີ້ ທີ່ເດີ່ນດ້ານໜ້າຂອງສະໜາມກີລາຫຼັກ 16.

ໃນຕອນທ້າຍຂອງພິທີທ່ານ ໜູຄຳ ພັນທະວົງ ໄດ້ມອບເງິນສະໜັບສະໜູນງານຕະຫຼາດນັດດັ່ງກ່າວຈຳນວນ 120.000.000 ກີບ ທະນາຄານພັດທະນາລາວ ສາຂາດອນໜູນຈຳນວນ 3.000.000 ກີບ.

ຂໍ້ມູນ-ພາບ: ວຽງຈັນໃໝ່