ພິທີຖະແຫຼງຂ່າວກ່ຽວກັບການກະກຽມຈັດງານປະກວດ ນາງສາວສິ່ງແວດລ້ອມ (MISS EARTH LAOS 2024) ຈັດຂຶ້ນໃນວັນທີ 10 ກໍລະກົດ 2024 ທີ່ໂຮງແຮມລາວເທວ ນະຄອນຫລວງວຽງຈັນ. ມີ ທ່ານ ສະຫວັນຄອນ ຣາຊມຸນຕີ ອະດີດຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ປະທານສະມາຄົມນັກຂ່າວແຫ່ງ ສປປ ລາວ ໃນນາມປະທານກິດຕິມະສັກທີ່ປຶກສາຈັດງານປະກວດນາງງາມສິ່ງແວດລ້ອມລາວ 2024; ທ່ານ ນາງ ມີນາ ສີວິໄລ ຫົວໜ້າກົມຂະບວນການຊາວໜຸ່ມສູນກາງຊາວໜຸ່ມປະຊາຊົນປະຕິວັດລາວ; ທ່ານ ນາງ ວົງຈັນ ບົວແພງ ປະທານຈັດງານປະກວດນາງງາມສິ່ງແວດລ້ອມລາ 2024; ພ້ອມດ້ວຍບັນດາບໍລິສັດຜູ້ສະໜັບສະໜູນ, ແຂກຮັບເຊີນ ແລະ ສື່ມວນຊົນເຂົ້າຮ່ວມ.
ພາຍໃນງານໄດ້ມີການເດີນແນະນໍາຕົວຂອງນາງສາວທີ່ຜູ້ເຂົ້າປະກວດ MISS EARTH LAOS 2024 ຈຳນວນ 16 ນ້ອງເຊິ່ງມາຈາກບັນດາແຂວງໃນທົ່ວປະເທດ ໂດຍມີກຳນົດຈັດພິທີປະກວດຮອບຕັດສິນສຸດທ້າຍໃນວັນທີ 19 ກໍລະກົດ 2024ນີ້ ທີ່ຫໍວັດທະນະທຳແຫ່ງຊາດ, ນະຄອນຫລວງວຽງຈັນ.
ພາຍຫຼັງການປະກວດສໍາເລັດຜູ້ທີ່ຜ່ານການຄັດເລືອກຈະກາຍເປັນຕົວແທນ MISS EARTH LAOS 2024 ໄປປະກວດຢູ່ປະເທດຟີລິບປິນຮ່ວມກັບສາວງາມທີ່ມາຈາກຫຼາຍປະເທດໃນໂລກ.
