ຫວ່າງມໍ່ໆມານີ້, ຜົນການສຳຫຼວດຄວາມຄິດເຫັນສາກົນສະບັບໜຶ່ງໄດ້ດຶງດູດຄວາມສົນໃຈຢ່າງກວ້າງຂວາງ: ນັບມາຮອດທ້າຍເດືອນພຶດສະພາຜ່ານມາ, ຄວາມມີສະເໜ່ຂອງຈີນຕໍ່ໂລກໄດ້ເພີ່ມຂຶ້ນເປັນ 8,8 ຄະແນນ, ຄວາມຄິດເຫັນຂອງຫຼາຍປະເທດໄດ້ງ່ຽງມາຫາຈີນ. ທີ່ຈິງແລ້ວ, ຜົນການສຳຫຼວດຄວາມຄິດເຫັນສາກົນຫຼາຍສະບັບໃນຊຸມປີຜ່ານມາ ລ້ວນແຕ່ໄດ້ເບິ່ງຈີນດ້ວຍທ່າທີທີ່ເປັນມິດ ແລະ ດ້ານດີນັບມື້ນັບຫຼາຍຂຶ້ນ ແລ້ວຄວາມມີສະເໜ່ຂອງຈີນເປັນຄືແນວໃດ?
ກ່ອນອື່ນໝົດ, ຄວາມມີສະເໜ່ຂອງຈີນຕໍ່ໂລກເພີ່ມສູງຂຶ້ນ ແມ່ນຍ້ອນຈີນໄດ້ປະຕິບັດຕາມຄຳໝັ້ນສັນຍາທີ່ຍຶດໝັ້ນເດີນຕາມເສັ້ນທາງການພັດທະນາໂດຍສັນຕິຢ່າງສະເໝີຕົ້ນສະເໝີປາຍ. ພາຍໃຕ້ສະຖາສະການສາກົນສັບສົນ ທີ່ມີຄວາມຫຍຸ້ງຍາກ, ຈີນໄດ້ເພີ່ມຄວາມແນ່ນອນໃຫ້ແກ່ໂລກທີ່ວຸ້ນວາຍ ດ້ວຍຄວາມສະຫຼາດສ່ອງໃສຂອງຕາເວັນອອກທີ່ “ຢູ່ຮ່ວມກັນຢ່າງກົມກຽວ”. ຂໍ້ລິເລີ່ມວ່າດ້ວຍການພັດທະນາທົ່ວໂລກ, ຂໍ້ລິເລີ່ມວ່າດ້ວຍຄວາມໝັ້ນຄົງທົ່ວໂລກ, ຂໍ້ລິເລີ່ມວ່າດ້ວຍອະລິຍະທຳທົ່ວໂລກ ແລະ ແນວຄວາມຄິດປະຊາຄົມຮ່ວມຊາຕາກຳຂອງມວນມະນຸດ ໄດ້ສະໜອງແຜນການຂອງຈີນທີ່ເປັນໄປໄດ້ໃຫ້ແກ່ການແກ້ໄຂບັນຫາທົ່ວໂລກ. ຈາກການໄກ່ເກ່ຍໃຫ້ອາຣັບບີຊາອຸດິດ ແລະ ອີຣານບັນລຸຄວາມປອງດອງກັນ ໄດ້ເພີ່ມພະລັງຂັບເຄື່ອນອັນແຂງແຮງໃຫ້ແກ່ສັນຕິພາບ ແລະ ສະຖຽນລະພາບໃນພາກພື້ນຕາເວັນອອກກາງ ເຖິງການຈັດຕັ້ງປະຕິບັດ “ສັນຍາປາຣີ” ຢ່າງຕັ້ງໜ້າ ໄດ້ນຳພາທົ່ວໂລກຮັບມືກັບການປ່ຽນແປງຂອງດິນຟ້າອາກາດ; ຈາກການຊຸກຍູ້ການປະຕິບັດ “ສັນຍາວ່າດ້ວຍການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນ” ຫຼື RCEP ເຖິງການຊຸກຍູ້ໃຫ້ກົນໄກການຮ່ວມມືບຣິກສ໌ເປີດຮັບສະມາຊິກໃໝ່ ໄດ້ເພີ່ມທະວີການມີສິດມີສຽງຂອງກຸ່ມເສດຖະກິດຈະເລີນໃໝ່ໃນການບໍລິຫານທົ່ວໂລກ. ຈີນໄດ້ປະຕິບັດຕາມພາລະໜ້າທີ່ຂອງປະເທດໃຫຍ່ທີ່ມີນ້ຳໃຈຮັບຜິດຊອບ ດ້ວຍການກະທຳຕົວຈິງ ເຊິ່ງເປັນການຫວ່ານແນວພັນແຫ່ງສັນຕິພາບ ແລະ ການພັດທະນາໄປສູ່ທຸກແຫ່ງຫົນໃນໂລກ.
ຈີນໄດ້ປະກອບສ່ວນຢ່າງພົ້ນເດັ່ນຕໍ່ການພັດທະນາເສດຖະກິດທົ່ວໂລກ ເຊິ່ງແມ່ນອີກດ້ານໜຶ່ງຂອງຄວາມມີສະເໜ່ຂອງຈີນ. ອັດຕາການປະກອບສ່ວນຕໍ່ການເຕີບໂຕຂອງເສດຖະກິດໂລກຂອງຈີນໄດ້ຮັກສາຢູ່ໃນລະດັບປະມານ 30% ເປັນເວລາຫຼາຍປີຕິດຕໍ່ກັນ, ຈັງຫວະການເຕີບໂຕດ້ານເສດຖະກິດຂອງຈີນໄດ້ຈັດຢູ່ອັນດັບນຳໜ້າໃນບັນດາກຸ່ມເສດຖະກິດຕົ້ນຕໍຂອງໂລກ. ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ໄດ້ປະຕິບັດມາເປັນເວລາສິບກວ່າປີແລ້ວ ເຊິ່ງສາມາດຍາດໄດ້ຜົນສຳເລັດອັນພົ້ນເດັ່ນ ທີ່ຄົນທັງຫຼາຍສາມາດເບິ່ງເຫັນໄດ້ຢ່າງຈະແຈ້ງ. ເມື່ອກອງປະຊຸມສຸດຍອດ G7 ຍັງສືບຕໍ່ປຶກສາຫາລືກ່ຽວກັບການສະກັດກັ້ນການພັດທະນາວິທະຍາສາດເຕັກໂນໂລຊີຂອງຈີນ, ກອງປະຊຸມສຸດຍອດຈີນ-ອາຊີກາງໄດ້ເຊັນສັນຍາຮ່ວມມືຫຼາຍກວ່າ 100 ສະບັບແລ້ວ; ເມື່ອອາເມຣິກາໄດ້ຂຶ້ນອັດຕາພາສີຕາມລຳພັງໃຈ, ຈີນໄດ້ເຊັນສັນຍາການຄ້າເສລີ 23 ສະບັບກັບ 30 ກວ່າປະເທດ ແລະ ເຂດແຄວ້ນ ພ້ອມທັງໄດ້ຍົກເວັ້ນພາສີຕໍ່ສິນຄ້າໃນບັນຊີລາຍຊື່ພາສີ 100% ຈາກ 53 ປະເທດ ໃນທະວີບອາຟຣິກາ ທີ່ໄດ້ສ້າງຕັ້ງສາຍພົວພັນທາງການທູດກັບຈີນ. ຄືດັ່ງຄຳເວົ້າຂອງທ່ານ ອັນວາ ອິບຣາຮິມ ນາຍົກລັດຖະມົນຕີມາເລເຊຍທີ່ວ່າ: “ຈີນບໍ່ພຽງແຕ່ໄດ້ນຳເອົາຄວາມໝັ້ນທ່ຽງມາໃຫ້ໂລກເທົ່ານັ້ນ, ຍິ່ງໄດ້ນຳເອົາຄວາມຫວັງທີ່ໝັ້ນຄົງມາໃຫ້ໂລກອີກດ້ວຍ.” ທົ່ວໂລກສາມາດສຳຜັດກັບນ້ຳໃຈຂອງຈີນທີ່ກວມລວມ ແລະ ຄວາມຫວັງດີທີ່ວ່າ “ປະເທດຕ່າງໆພັດທະນາຮ່ວມກັນ” ຈິ່ງແມ່ນພັດທະນາທີ່ແທ້ຈິງ.
ພະລັງອ່ອນທາງດ້ານວັດທະນະທຳຂອງຈີນໄດ້ເພີ່ມສູງຂຶ້ນຢ່າງຕໍ່ເນື່ອງ ໄດ້ເຮັດໃຫ້ໂລກມີຄວາມເຂົ້າໃຈຕໍ່ຈີນຢ່າງເລິກເຊິ່ງກວ່າເກົ່າ. ປັດຈຸບັນ, ຕຸກກະຕາ Labubu ໄດ້ຮັບຄວາມນິຍົມຊົມຊອບຈາກລູກຄ້າຕ່າງໆໃນໂລກ, ຜົນງານນະວັດຕະກຳດັ້ງເດີມ ເຊັ່ນ: ນາຈາ, ຫງໍຄົງ ແລະ ອື່ນໆຂອງຈີນໄດ້ຂຶ້ນຊື່ລືນາມໃນຂອບເຂດທົ່ວໂລກ, ຜູ້ໄດ້ຮັບຄວາມນິຍົມທາງອິນເຕີເນັດ ຫຼື ເນັດໄອດໍຕ່າງປະເທດໄດ້ເດີນທາງມາໄລສົດຢູ່ຈີນ ກໍໄດ້ຮັບການກົດຖືກໃຈເປັນຫຼາຍສິບລ້ານເທື່ອ, ວິດິໂອສັ້ນຂອງຈີນ ກໍໄດ້ຮັບຄວາມສົນໃຈຈາກຜູ້ຊົມທົ່ວໂລກເປັນຈຳນວນຫຼວງຫຼາຍ. ທັງໝົດນີ້ໄດ້ທັບມ້າງການໂຄສະນາທີ່ເປັນການປິດບັງ ແລະ ບິດເບືອນຄວາມຈິງຂອງສື່ຕາເວັນຕົກທີ່ໄດ້ປະຕິບັດມາເປັນເວລາຍາວນານ, ເຮັດໃຫ້ໂລກໄດ້ຮູ້ໄດ້ເຫັນຈີນໃນຍຸກປັດຈຸບັນ ທີ່ໄດ້ສືບທອດອະລິຍະທຳບູຮານພັນປີ ແລະ ເຕັມໄປດ້ວຍຄວາມມີຊີວິດຊີວາ.
ສິ່ງທີ່ຄວນເວົ້າເຖິງທີ່ສຸດນັ້ນກໍຄື: ຈີນໄດ້ປະຕິບັດນະໂຍບາຍເປີດປະຕູສູ່ພາຍນອກຕ່າງໆ ໄດ້ເຮັດໃຫ້ປະຊາຊົນຈີນ ແລະ ປະຊາຊົນປະເທດຕ່າງໆໃນໂລກມີຄວາມໃກ້ຊິດກັນກວ່າເກົ່າ. ຈີນໄດ້ຍົກເວັ້ນວີຊາເຂົ້າຈີນແຕ່ຝ່າຍດຽວໃຫ້ແກ່ 47 ປະເທດ ແລະ ໄດ້ຍົກເວັ້ນວີຊາເປັນເວລາ 240 ຊົ່ວໂມງຕໍ່ພົນລະເມືອງຈາກ 55 ປະເທດ ທີ່ເດີນທາງຜ່ານຈີນໄປປະເທດທີ 3. ປີ 2024, ຊາວຕ່າງປະເທດທີ່ເດີນທາງເຂົ້າມາປະເທດຈີນໂດຍຍົກເວັ້ນວີຊາມີຫຼາຍກວ່າ 20 ລ້ານເທື່ອຄົນ, ເພີ່ມຂຶ້ນ 112% ເມື່ອທຽບໃສ່ປີ 2023. ການຂໍວີຊາເຂົ້າຈີນໄດ້ຮັບການແກ້ໄຂໃນທັນທີ, ຊາວຕ່າງປະເທດທີ່ຊື້ສິນຄ້າຢູ່ຈີນໄດ້ຮັບການຍົກເວັ້ນພາສີໃນທັນທີໃນເວລານຳເອົາສິນຄ້າເຫຼົ່ານີ້ອອກຈາກຈີນ, ການໃຊ້ຈ່າຍຜ່ານທາງມືຖືຢູ່ຕ່າງປະເທດມີຄວາມສະດວກສະບາຍ. ທັງໝົດນີ້ໄດ້ເຮັດໃຫ້ເພື່ອນມິດຕ່າງປະເທດຮັບຮູ້ເຖິງການເປີດປະຕູສູ່ພາຍນອກໃນລະດັບສູງຂອງຈີນຢ່າງຮອບດ້ານ.
ຄວາມມີສະເໜ່ຂອງຈີນໃນໂລກໄດ້ເພີ່ມສູງຂຶ້ນ ບໍ່ເພຽງແຕ່ເປັນການໂຄສະນາເຜີຍແຜ່ເທົ່ານັ້ນ, ຫາກຍັງແມ່ນການກະທຳຕົວຈິງ ທີ່ປະຕິບັດມາເປັນເວລາຫຼາຍປີ; ບໍ່ແມ່ນ “ການຈົງໃຈເຮັດ”, ຫາກແມ່ນການປະຕິບັດຕາມພາລະໜ້າທີ່ຂອງຕົນຢ່າງສະເໝີຕົ້ນສະເໝີປາຍ ເຊິ່ງບໍ່ພຽງແຕ່ເຮັດໃຫ້ປະຊາຄົມໂລກຮັບຮູ້ຕໍ່ການປະກອບສ່ວນຂອງຈີນເທົ່ານັ້ນ, ຫາກຍັງເປັນຫຼັກຖານທີ່ຈະແຈ້ງໃຫ້ແກ່ແນວຄວາມຄິດປະຊາຄົມຮ່ວມຊາຕາກຳຂອງມວນມະນຸດອີກດ້ວຍ. ເມື່ອໂລກພວມສະແຫວງຫາທິດທາງໃນທ່າມກາງສະຖານະການທີ່ສັບສົນວຸ້ນວາຍ, ຈີນພວມຂຽນປະຫວັດສາດໜ້າໃໝ່ ເພື່ອສ້າງຄວາມຈະເລີນຮຸ່ງເຮືອງຮ່ວມກັບປະເທດຕ່າງໆໃນໂລກ ດ້ວຍຄວມມີສະເໜ່ ແລະ ຄວາມສະຫຼາດສ່ອງໃສທີ່ມີເອກະລັກພິເສດຂອງຈີນ.
